جاده پشتی چه‌مانده‌وه سیگناڵی ئه‌ژدیهای سه‌فه‌ر
ناڵاندی و ته‌نیایی‌می لاوانده‌وه
ده‌ستی هانی خۆشه‌ویستم ، ده‌ستی گرتم
ووتی: پێم‌‌ده یادگارێ
ده‌سم نایه سه‌ری سنگم: نه‌مداوه‌پێت مه‌گه‌ر گوڵم ؟
وتی كوانێ ؟ وتم دڵم .
وتی: ئه‌وه ده‌یان ساڵه له‌لام‌دایه
ووتم: هانێ گیانیش له‌گه‌ڵ خۆتا ببه
گیانم بووبه سێ1 باڵنده‌ی لانه‌ی ئه‌وین
له‌گه‌ل دڵدارا هه‌ڵفڕین
گه‌ر بۆم بلوێ له‌سه‌ر نه‌خشه‌ی وڵاته‌كان
هه‌موو جاده و شه‌قامه‌كان ده‌سڕمه‌وه
ئیزنی كۆچ و سه‌فه‌ر ناده‌م
ئه‌م یاسایه دڵته‌زێنه
به‌كوودیتای ئه‌وینداران له‌ جیهانا ده‌بڕمه‌وه
به‌هاره‌كه‌م . به‌هاره‌ نادیاره‌كه‌م.......

(جه لال مه له کشا)

قه‌ڵه‌م ! من و تۆ و ژیان مه‌زڵوومین
هه‌ر سێ وێنه‌ی یه‌‌ك ، به‌ندو مه‌حكومین

من مه‌حكوومی چه‌رخ، تۆ مه‌حكوومی من
ژیان گیرۆده‌ی دۆستی دڵ دوژمن

هه‌ر سێ باخه‌وان باخی بێ‌به‌رین
هه‌ر سێ مه‌له‌وان گێژی خه‌ته‌رین

(قانع)

ئه‌رێ دڵ بێ‌شه‌رابی له‌علی گوڵ ڕه‌نگت له‌ گوڵ چبكا؟
كه‌جیلوه‌ی گوڵ له‌ گوڵشه‌ندا نه‌بێ، بولبول له‌ چڵ چبكا ؟

كه‌هه‌ڵگیرسا له‌ نۆره‌ی باده‌ شه‌معی حوسنی جانانه‌
نه‌چێته‌ سه‌ر ته‌ریقه‌ی حه‌زره‌تی په‌روانه‌، دڵ ،چبكا؟

له‌هه‌ر جێیه‌ك هه‌ڵێ خورشیدی عیشقی گوڵ‌ڕوخانمه‌حوی
ئه‌گه‌ر عه‌قڵی ببێ، له‌و جێگه‌ ئاونگی عه‌قڵ چبكا؟

(مه‌حوی)

به‌نوری باده‌ كه‌شفی زوڵمه‌تی ته‌قوا نه‌كه‌م ، چیبكه‌م !
به‌شه‌معێكی وه‌ها چاری شه‌وێكی وا نه‌كه‌م، چیبكه‌م !

له‌خه‌زنه‌ی دڵم دا هه‌رچی هه‌یه‌، هه‌رداغی سه‌ودایه‌
ده‌سا ئه‌م نه‌قده‌ ده‌ردی عیشقی پێ سه‌ودا نه‌كه‌م ،چیبكه‌م !؟

له‌گه‌ڵ ده‌ستی مه‌لا ڕێ ناكه‌وێ زونناری زوڵفی یار
وه‌كو (شێخ) ئیختیاری مه‌زهه‌بی (ته‌رسا) نه‌كه‌م ،چیبكه‌م !؟

(مه‌حوی)

خه‌رامی ناز ئه‌گه‌ر هێنایه‌ له‌نجه‌ سه‌روی مه‌وزونت
وه‌كو له‌یلا، له‌سه‌ر ڕێ پرسشێ كه‌ حاڵی مه‌جنونت

ده‌ترسم گه‌ردی خوێنی من له‌ شیشه‌ی گه‌ردنت نیشێ
وه‌گه‌رنا ، غه‌م نیه‌ بمرم له‌ حه‌سره‌ت لێوی مه‌یگونت

(مه‌حوی)

دڵم ئه‌مشه‌و نه‌خۆشی نیسبه‌تی چاوێكی بیماره‌
جگه‌ر غه‌ڵتانی خوێنی حه‌سره‌تی لێوێكی خۆنخواره‌

سه‌رم شێواوی شێوه‌ی فیتنه‌ هه‌ڵگیرسێنی شوخێكه‌
حه‌واسم ته‌فره‌قه‌ی عیشوه‌ی دڵ ئاشووبێكی عه‌ییاره‌

خه‌یاڵی زوڵفی ده‌رناچێ له‌ دڵ تا ده‌رنه‌چێ ڕۆحم
سپێراوه‌ خه‌زینه‌ی به‌ختی ئێمه‌ به‌و سیاماره‌

له‌شینی فیرقه‌تی ئه‌ودا ئه‌وه‌نده‌ش ئه‌شكی سورم ڕێت
به‌ده‌وری جێگه‌ما تا بڕ ده‌كاتن دیده‌، گوڵزاره‌

(مه‌حوی)

کاتێ سێبه‌ری قژت له‌په‌نجه‌به‌حه‌زه‌کانی خۆمدا ته‌ی ئه‌که‌م
و
له‌ناو خه‌یاڵی خۆمدا سه‌رم له‌سینه‌ت ئه‌نه‌خشینم ئه‌بم به‌پادشایه‌ک و خۆم له‌ئاسمانی سینه‌ی به‌رینی تۆدا ئه‌بینمه‌وه‌
ئه‌بم به‌زستانێ کڵۆ به‌فرینه‌کانم له‌ناوله‌پی ده‌ستی چێژدا ئه‌دۆزمه‌وه
تۆ ئه‌و باڵا باریک وچاو ئه‌ستێره‌یه‌ی که‌زمانی ئه‌شقم له‌ وڵاتی هێمنیتدا ئه‌شنێته‌وه‌
تۆ ئه‌و قژ به‌هارییه‌ی که‌هه‌رچی مانا هه‌یه‌له‌ئاستتدا ئه‌له‌رزێته‌وه
هۆ بوکه‌سپی پۆشه‌که‌ی‌غوربه‌تگای من‌
ئاشنام که‌ره‌وه‌
به‌و جه‌سته‌گه‌رمۆڵه‌یه‌ی که‌بۆ هه‌رچی سه‌رما هه‌یه‌ بیکه‌به‌گژیا ئه‌و باسی ئه‌شق ئه‌کا
ئاشنام كه‌ره‌وه‌به‌باوه‌شه‌ حه‌زینه‌ یه‌ی که‌هه‌رچی دیکتاتۆر هه‌یه‌باسی داگیرکردنی بکا ئه‌و باسی فانتازیای ماچ ئه‌کا
ئه‌ڵێت زمانم بگره‌به‌زمانت
با که‌مێ وه‌ک چۆله‌که‌یک بچم له‌ناو به‌هه‌شتی حه‌زه‌ کانم دا یاری بکه‌م
ده‌سته‌کانم بگره‌به‌ده‌ستت
با وه‌ک کۆترێ له‌پانتایی شینایه‌تی دا باڵ فڕکێن بکه‌م
ئه‌ڵێت سینه‌م بگره‌به‌سینه‌ت با وه‌ک لانه‌یه‌ک بۆ کۆرپه‌کانی
لێوم بگره‌به‌لێوت با نه‌چێژم ماچی په‌شیمانی ؟؟

هاوڕێ ڕه‌ش