ئه‌ی دڵ،،به‌سه‌رت ئه‌مڕۆ هه‌موو عاشق و شێتن
ئه‌ و عاله‌مه‌ گشتی هه‌موو شێتی به‌ری پێتن

ئه‌م تۆز و غوباره‌ی که‌ له‌سه‌ر سه‌رمه‌ ده‌بینی
تۆزی به‌ری پێی سوار و پیاده‌ن که‌ له‌ ڕێتن

کاروانی ئه‌وینداری له‌ سینه‌ی غه‌زه‌لم دا
چاویان له‌ دوو ئه‌ستێره‌یی پڕ شۆقی شه‌وێتن

پائییزه‌ و دار و به‌ری باخان ده‌ڕنن ،هه‌ر
ده‌ستم نه‌گه‌یه‌ دارێ ،،له‌وێ زه‌ردی به‌هێتن

گه‌رمێنی دڵم چاوی له‌ ڕێی سوێسکه‌ و که‌و بوو
زستانی له‌شم،باوه‌شی بۆ ڕه‌وتی که‌وێتن

خاڵه‌ که‌ به‌ پیریش هه‌موو ده‌م دێته‌وه‌ بیری
شێعری ،له‌ ژوانی شه‌وی جومعانه‌ له‌ جێتن.

خاڵه‌قازی

ته رمی هەژارێک دەچوو بەرەوگۆڕ
کوڕ بۆێ ئەگریا هاوار و گابور :

باوه گیان دەتبەن بۆ کۆنێکی تەڕ
نه چراێ لێه نه ‌‌حەسیر نه بەڕ

نه نان و نه ئاۆ ،نه هاودەم نه یار
تەنگ و تاریک و پر له مشک و مار

مناڵێک بیستی و بەهەڵه داوه

ڕاێکرده ماڵ و بانگی کرد : باوه

سه رباری دەرد و ژیانی تاڵمان
کەلاکه مردووش ئەهێننه ماڵمان

مامۆستا هەژار

سريشكى سورو گەشم ، كانى مرادم

ئەتوى وێنەو نيشانەو شين و دادم

كەسێك نێ غەيرى تۆ سەبورى حالم

به دايم دڵ پروو شەيدايى خالم

وەره روحو رەوانم

گوڵى بوون خۆش و جوانم

له هيجرى تۆ دەنالێم
كزەى جەرگ و هەناوم

به خالى گەردنى جەرگى بريوم
دەلێى شەش دانگى ئيمانى كريوم

به دانەى خالەكەى كەوتومه داوى
كەوا بومه ئەسيرى زولفى خاوى

وەره ئەى بولبولى من
كزەى جەرگو دڵى من

له هيجرى خالى لێوت
شكا باڵو پەرى من

ئەم شێعرە کاک باست حەمە غەریب هۆنیویەتیەوە بۆ کۆچی مامۆستا شوکروڵا بابان

وەفایەکی سادە، بۆ دەنگێکی زیندوو،،بۆ مامۆستا شوکروڵای بابان

تۆ ئەو دەنگە بەسۆزە بوویت
سەرەتاکانی ژیانم
هێشتا تفلی دەبستان بووم
دنیای شیعرت پێناسانم

ئەو دەمانە
خۆمان و شڕە ڕادیۆیەک
لەماڵ و لە دەر بووینایە
لە هەرکوێیەک
هێندەی کاتی شێوان ئەهات
هەموو لا کش ئەبوون و مات
تا گوێ بۆ دەنگت ڕادێرن
هۆش و هەستیان
بە سیحری وشە بسپێرن
بەخەیاڵێکی بێگەردا
لەشەوانی گەرم و سەردا
لەگەڵ چریکەی ئاوازت
بەباڵی دەنگەکەی سازت
ئەفڕینە ناو دنیای ئەوین
ئەبووین بە خەم، بە پێکەنین
(تایەر بەگ) ئەهاتە ماڵمان
(حەمدی) ئەیپرسی ئەحواڵمان
(مەحوی) ئەبووە خانەخوێمان
(ئەحمەد موختار) خۆشی ئەبەخشی بە گوێمان
جەژنمان ئەکرد لەگەڵ نەورۆزی (وەفایی)
لەماڵەکەی (هێمن)ەوە، ئەچووینەوە
بۆ ژێر باڵی ڕەشی شەوگاری تەنیایی
لەگەڵ (بێکەس)،
دەردەڵمان ئەکرد بۆ مانگەکەی هاودەرد
بەبارانی شیعری (گۆران)،
سەفای ئەبەخشی بە گیانمان پایزی زەرد
(مەولەوی) ئەبووە هاودەممان بۆ کوێستان و
(سەید کامیل)یش ئەیداینە دەست کەیبانوو
بەسنگی دێڕی(ناری) یەوە بۆنی مێخەکبەندمان ئەکرد
لەباخی خەیاڵی(نالی)، دەستمان بۆ بەی و سێو ئەبرد
بەئاسمانی کەلتوورەوە، هەتاهەتایە گەش ئەبیت
وەک ئەستێرە و مانگی تابان
ئەی دەنگە هەرگیز نەمرەکە،
مامۆستام،(شوکرڵای بابان).

چ خۆشــــــــــــــه‌

ئه‌گر دلبه‌ر دڵ ئارا بێ چ خۆشـــــــــــــه‌

به‌ زه‌وق و ئاڵ و واڵا بێ چ خۆشـــــــــــه‌

شه‌راب هه‌ر چه‌نده‌ تاڵ و تونه‌ چـــــــاوم

كه‌ ساقی وا دڵ ئاوابێ چ خۆشــــــــــه‌

كه‌وا مه‌ستی له‌ نه‌شئه‌ی چاوی مه‌سته‌

بڵێ ده‌ك جامی مه‌ی بابێ چ خۆشــــــه‌

له‌ كاتی مردن و ده‌رچونی ڕوحـــــــــــم
كه‌یادی ویم له‌ دڵ دابێ چ خۆشـــــــــه‌

له‌ گیر و داری ڕۆژی واپه‌ســــــــــــــینم
كه‌ سینه‌م(لا)(ئه‌لف)(لا) بێ چ خۆشــــه‌

ئه‌گه‌ر فكرم له‌ سه‌ر لا بێ چ ناخــــــۆش
كه‌ ئیمانم به‌ ئه‌ولا بێ چ خۆشــــــــــه‌

ئیمامی تۆ كه‌ لا ئیلایه‌ زیــــــــــــــكرت
ئومێدت هه‌ر به‌ ئه‌ولا بێ چ خۆشـــــــــه

سه‌ید كامیلی زه‌مبیلی

یاری من هه‌رگیز له‌ قه‌تلی عاشقی په‌روا نیه‌
چونكه‌ روومه‌ت شه‌معه‌ بۆیه‌ حه‌ز به‌ سوتانم ده‌كا

ئاو له‌ به‌ر چاوانم له‌ به‌ر زوڵف و عوزارت دێته‌ خوار
دوكه‌ڵی ئه‌و مه‌جمه‌ره‌ هه‌ر ده‌م له‌ گریانم ده‌كا

من ده‌ڵێم : یاقوت و ره‌یحان خه‌تتی كامیان خۆشتره‌؟
ئه‌و به‌ عه‌ییاری له‌علی خه‌ندانم ده‌كا

قامه‌تی تۆ نه‌خڵی طوره‌ طه‌لعه‌تی تۆ نوری طوره‌
ده‌م به‌ ده‌م وه‌جهی جیلوه‌ت (مه‌ست)و حه‌یرانم ده‌كا

فیكری زوڵفتعیلله‌ته‌ ،وه‌صفی ده‌مت ناكه‌م به‌ دڵ
نیكته‌ گۆیی پیشه‌مه‌ سه‌ودا په‌رێشانم ده‌كا

وه‌فایی

ده‌ردی عه‌شقت وێڵی ده‌شت و هه‌رده‌ وو سه‌حرام ئه‌كا
توشی سه‌د به‌د ناوی و دووچاری سه‌د سه‌ودام ئه‌كا..

وه‌سڵی تۆ هه‌ر باعیسی فه‌وتان و سووتانی منه‌
شه‌وقی رووت په‌روانه‌ ئاسا ئه‌مكوژێ و ئیفنام ئه‌كا

چاوه‌كانت ئه‌مكوژن لاكین شه‌كه‌ر خه‌نده‌ی ده‌مت
دائیما بۆ كوشتنێكی تازه‌ تر ئیحیام ئه‌كا

وه‌ك چرای فانۆسه‌ ناشارێته‌وه‌ عه‌شقی نیگار
بام له‌ په‌رده‌شدا بێ ئاخر سه‌ر سه‌ری و ریسوام ئه‌كا

من ئه‌بێ سووچم چبێ رۆژی ئه‌زه‌ل سوڵتانی عه‌شق
دیل و یه‌خسیر و كه‌مه‌ندی په‌رچه‌می تام تام ئه‌كا

چاوه‌كه‌ی مه‌ستت نیگاری مه‌ه جه‌بین بۆته‌ سه‌به‌ب
وا كه‌ مه‌خمووری شه‌راب و باده‌ و سه‌هبام ئه‌كا

دیوانی (كه‌مالی) ساڵی 1951 كه‌ركووك

مه‌ستێکم، باده‌ی ئاره‌قم ناوێ
سارد نابێته‌وه‌ دڵ به‌ هیچ ئاوێ

چه‌ند خۆشه‌ له‌ توێی په‌رده‌ی نیهانا
شه‌و نور ئه‌بینم له‌ ئاسماندا

***پیره‌مێرد***

هه‌ندێك هه‌ن سه‌د جار روو شكێن بكرێن
هه‌ر دێنه‌ پێشه‌وه‌ (روو قایم) شێخ ره‌زا ده‌ڵێت:

چه‌رمی رووی هێند قایمه‌ شمشێری میسری نایبڕێ
گه‌ر به‌ كه‌وشی كه‌ی ده‌مێنێ تا قیامه‌ت نادڕێ.

شێخ ره‌زای تاڵه‌بان