مه‌که‌ ئیخلافی ئه‌و وه‌عده‌ که‌ فه‌رمووت
ده‌خیلت بم که‌ که‌ خانووی سه‌بره‌که‌مسووت

له‌ ڕووت و قووتی وه‌ک من ڕوو مه‌پۆشه
که‌ وه‌سڵی تۆیه‌، قووتی عاشقی ڕووت

موژه‌ت قوللابیه‌، هه‌م تیر و هه‌م شیر
برۆت میحرابیه‌، هه‌م تاق و هه‌م جووت

له‌ سندووقی پڕی سینه‌م بترسه‌
که‌ ئاور به‌ر بداته‌ ته‌خت و تابووت

مامۆستا نالی

نالی شانازنی به‌ زمانی کوردییه‌وه‌ ده‌کات و ده‌ڵێت:

ته‌بعی شه‌ککه‌رباری من کوردی ئه‌گه‌ر ئینشا ده‌کا
ئیمتیحانی خۆیه‌ مه‌قسوودی، له‌ عه‌مده‌ن وا ده‌کا

با له‌ مه‌یدانی فه‌ساحه‌تدا به‌ میسلی شه‌هسوار
بێ ته‌ئه‌مول به‌و هه‌موو نه‌وعه‌ زبانیڕاده‌کا

که‌س به‌ ئه‌لفازم نه‌ڵێ خۆ کوردی یه‌ خۆ کردی یه
‌هه‌ر که‌سێ نادان نه‌بێ خۆی تالیبی مه‌عنا ده‌کا

بێته‌ حوجره‌م پارچه‌ پارچه‌ موسوه‌ده‌م بکڕێ به‌ ڕۆح
هه‌ر که‌سێ کوتاڵ و پارچه‌ی بێ به‌ دڵ سه‌ودا ده‌کا

شیعری خه‌لقی که‌ی ده‌گاته‌ شیعری من بۆ نازکی
که‌ی له‌ دیقه‌تدا په‌تک ده‌عوا له‌گه‌ڵ هه‌ودا ده‌کا

ده‌ڵێن ئاخری زه‌مانه‌ وا له‌ باسا
گه‌لێک که‌س به‌و هه‌واڵه‌ لێره‌ تاسا

که‌چی من هه‌ر، له‌ ده‌وری شه‌معی ڕووی تۆ
ده‌سوڕێم گیانه‌که‌م،،په‌روانه‌ ئاسا

له‌سه‌ر سینه‌ی زه‌وی دا به‌حری عیشقت
شه‌پۆلی دا له‌ ژێر ته‌نکی کراسا

نه‌ مه‌هدی و نه‌ خدری زینده‌ هاتن
نه‌ خۆی جارێ نیشان دا لێره‌ عیسا

په‌شیمان بوو له‌ وه‌ی دونیای خرا کا
که‌ چاوی تۆی نیشان دا هێزی ناسا

کوتی خاڵه‌ ئه‌به‌و ئاخری زه‌مانه‌ی
ئه‌تۆ چت داوه‌ ؟له‌و هه‌مزه‌ و هه‌باسا

خاڵه‌ قازی

گــــوڵ لـــه‌ گـــوڵزارا نه‌مـا بولبول ئــــه‌بــــێ زاری بکا
شێوه‌یی شادی لــــه‌سـه‌ر ده‌کــــــات و غــه‌مبــار بکا

نێرگسی شه‌هلا که‌ مه‌شهووره‌ به‌ مه‌خموری ئــه‌بێ
دایما له‌ چــــــاوه‌ کـــــه‌سبی عـــلــمــی بیماری بکا

فه‌سڵی ئه‌و ناسك غه‌زاله‌ ڕۆیی عورششاقی حه‌زین
هه‌ر ئه‌بێ سه‌یلی سروشکی خوێن له‌ چاو جاری بکا

تو خـودا ، بـــــادی سه‌بــــا ، بـــه‌و نازه‌نینه‌ تــــۆ بڵێ
به‌س ڕه‌قیب ته‌لتیف بــــکات و ده‌ردی دڵ کــــاری بکا

دلبـه‌رم لــــه‌م شـاره‌ ڕۆیـــی (ئه‌حمه‌دی) بێچـــاره‌ وا
بۆ سوپاهی غـــه‌م ، ئه‌بێ ڕه‌سمی سوپه‌هداری بکا

ئه‌حمه‌د موختار جاف

هه ر نازدارێ دڵی دامێ،
له بناری دڵدا ناشتم،
وه ك نه مامێ؛
تا وام لێ هات
له سایه ی سه ری خۆشه ویستان
بوومه ماخۆی شادارستان!

* * *
كه تۆم ناسی،
ئه ی نه مامی شلك و نه مر،

وام زانی تۆش ده چیته پاڵ ئه وانه ی تر:
ده ڕوێی،ده بی
به فێنكایی...بۆ هاوینم.
به گه رمایی...بۆ زستانم.
كه چی،له پڕ بووی به شه مچه و
گڕت به ردا دارستان!

عه بدووڵا په شێو

بە ئاسمانەوە ئەستێرەم دیوە
لە باخچەی بەهار گوڵم چنیوە

شەونمی درەخت لە ڕووم پژاوە
لەزەردەی زۆر کەل سەرنجم داوە

پەلکەزێڕینەی پاش بارانی زۆر
چەماوەتەوە بەرامبەر بەخۆر

هەتاوی نەورۆز مانگی جۆدرەو
زۆر هاتوون و چوون بەڕۆژ و بەشەو

خوڕەی قەڵبەزەی کەف زیوینی چەم

لەهەزار چەشنە پرشنگی ناو تەم

میوەی گەیشتووی زەرد و سووری باخ
جریوە و جووکەی دارستانی شاخ

لەگەرووی شمشاڵ، لەتەلی کەمان
گەلێ هەڵساوە,ئاوازی جوان جوان

ئەمانە,هەموو جوانن,شیرینن
ڕۆشنکەرەوەی شەقامی ژینن

بەڵام تەبیعەت,هەرگیزاو هەرگیز
بێ ڕووناکییە,بێ بزەی ئازیز

بێ ئاوازەیە,دەنگە نەرمەکەی
با نەیدا لەگوێم,تێر نەڵێم ئۆخەی

کام ئەستێرەی گەش,کام گوڵی کێوی
ئاڵە,وەک کوڵمی,گۆی مەمکی,لێوی؟

کام ڕەشیی ئەگا بە ڕەشیی چاوی
برژانگی،برۆی،ئەگریجەی خاوی؟

کام بەرزیی جوانە،وەک بەرزیی باڵای؟
کام تیشک ئەگاتە،تیشکی نیو نیگای؟

کام تاسە،کام مەیل،کام چاوەنواڕیی
تەلیسماوییە،وەک هی دڵداری؟

"مامۆستا گوران"