ده‌زگیرانی به‌ جی ماوی ژوانی چۆلم
به‌ نه‌شته‌ری بیری نا ئازادم كیوی بیستونت بۆ هه‌ڵده‌كۆڵم
ده‌زگیرانی وه‌ك خۆم به‌دبه‌خت و كڵۆڵم
له‌ ده‌فته‌ری دیوانی دێوانه‌ی شه‌می ئه‌م سه‌رده‌مه‌ هه‌رچیت بۆ بنوسرێ كه‌مه‌ .

(مه‌لا علی )

((دڵێكی تیك شكاو ))

به‌ سه‌رسامی له‌سه‌ر لوتكه‌ی بلندی گه‌نجی وه‌ستاوم
شریتی عومری رابردووم وه‌ك خه‌و دیته‌ به‌رچاو
شریتی چی ؟ سه‌راپا سه‌رگوزشته‌ی نا ئومیدیمه‌
فلیمی پر له‌ ناسۆری هه‌ره‌سهینانی لاویمه‌
تروسكه‌ی تیا به‌دی ناكه‌م سه‌رنجم چه‌نده‌ لیداوه‌
له‌ تاپۆی نامورادیم و ته‌می ناسۆری به‌ولاوه‌
ئه‌وه‌ی ئه‌وساكه‌ روناكی ئه‌دا به‌ ژینه‌ شیواوه‌
دلیكی پر له‌ ئاهه‌نگ بوو كه‌ ئیستا پاكی رووخاوه‌
به‌لی ئه‌وسا دلیكم بوو ، كه‌ سه‌رچاوه‌ی ژیانم بوو
دلی كه‌ مه‌لبه‌ندی ئاوات و ته‌وژم و تینی گیانم بوو
دلی گولزاری دلداری و به‌هه‌شتی خۆشه‌ویستی بوو
وه‌كو بتخانه‌ مه‌یدانی بتی جوانی په‌رستی بوو
له‌گه‌ل گریان و هاواری هه‌ژارانا له‌ شینا بوو
له‌گه‌ل ناله‌ی كه‌سانا له‌ خورپه‌ و راچه‌نینا بوو
له‌ ژیر سایه‌ی ئه‌وینیكا هه‌موو سحریكی پۆشی بوو
له‌ كونجیكی خه‌راباتا خه‌ریكی باده‌ نۆشی بوو
دلی بوو دار و دیواری هه‌موو مه‌ستی نیگاری بوو
هه‌موو سوچیكی ده‌ستكردی به‌لینی تاقه‌ یاری بوو
دلی خونچه‌ی ته‌مای وابوو له‌ خۆشی ئه‌و ده‌می واكا
كه‌ تیشكی ئه‌و له‌ لیوی دا گوڵاو پرژینی دونیاكا
دلی ئاماده‌بوو تاری هه‌زار ئاوازی لی هه‌ستی
به‌ مه‌رجی گولبده‌م جاری به‌ مه‌ستی لی بدا ده‌ستی
ته‌لاری دل كه‌ دیواری وه‌ها مه‌ستی ئه‌وینی بوو
له‌ باوه‌ش گرتنی باڵای هه‌موو ئاواتی ژینی بوو
وه‌نه‌وشه‌و نیرگز و شه‌وبۆ هه‌موو سه‌رخۆشی تاسه‌ی بون
له‌ ته‌ك سروه‌ی به‌یانیدا ته‌ما داری هه‌ناسه‌ی بوو
هه‌موو پیكیكی مه‌ینۆشی به‌ یادی ئه‌و كه‌ پر (مه‌ی ) بوو
له‌ مه‌یخانه‌ی دلا كه‌یلی بزه‌ی ئه‌و جووته‌ لیوه‌ی بوو
هه‌موو پارانه‌وی وابوو به‌ شیوان و سبه‌ینانی
كه‌ رۆژی لیوی پر تاسه‌ی له‌سه‌ر دوو لیوی ئه‌و دانی
كه‌چی ئه‌و كۆشكی چه‌ند ساله‌ی دلم بنچینه‌كه‌ی دانا
به‌ ته‌نها گه‌رده‌لولیكی نه‌هامه‌تی چوو به‌ ئاسمانا
هه‌موو ئه‌و نیاز و ئاواته‌ی له‌ناو ناخی ده‌رونا بوو
له‌ داخی بی به‌لینی ئه‌و به‌ جاری ته‌فرو تونا بوو
به‌لی كاتی به‌خۆمم زانی به‌هاری پر ئه‌وین رۆیی
خه‌و و ئاواتی چه‌ند ساله‌ و به‌لینی پیگه‌ین رۆیی
گه‌لیكم پشكنی دونیا له‌ دووی ئه‌و جوته‌ لیوه‌ی ئه‌و
هه‌زار ئه‌فسوس نه‌ ئه‌و رۆژه‌م به‌دی كرد و نه‌ شیوه‌ی ئه‌و
نه‌ پرشنگی له‌ خونچه‌ی دا نه‌ په‌نجه‌ی دا له‌ تاری دڵ
نه‌ به‌ژنی شۆخ و شه‌نگی بوو به‌ میوانی ته‌لاری دڵ
نه‌ چاوانی گوڵی رشت و نه‌ كلچیوكیكی پیا هینا
نه‌ پرچی نیرگزی مه‌ست و وه‌نه‌وشه‌ی شینی داهینا
نه‌ پیكی نایه‌ سه‌ر لیو نه‌ بیستم رازی شیرینی
نه‌ مالئاوای لیكردم نه‌ئیتر شیوه‌یم بینی
به‌لی ئیستا ئه‌وه‌ی جیماوه‌ بۆ من یادگاریكه‌
به‌سه‌رهاتی دڵی ورد و به‌سه‌رچونی به‌هارێكه‌
((ئه‌حمه‌د هه‌ردی ))

هەوری پایز

له‌ ده‌ریاوه‌ قه‌تاری هه‌وری باڕشت که‌وته‌ دووی پێشه‌نگ
به‌ سه‌ر سینگی چیادا چۆکی داداوه‌، کش و بێده‌نگ

به‌ سه‌ر پاییزی زه‌ردا با به‌ خوڕ بگری، به‌ کوڵ بگری
له‌ سه‌ر ئاخر گه‌ڵا ، ئاخر چڵی ته‌نیایی گوڵ بگری

به‌ خوڕ بگری، به‌ کوڵ بگری، به‌ سه‌ر ده‌شت و ده‌ری وشکا
به‌ سه‌ر داری گه‌ڵا زه‌ردا، به‌ سه‌ر پووشا، به‌ سه‌ر دڕکا

به‌ سه‌ر سه‌رچاوه‌یی کزرا، به‌ سه‌ر زیخی چه‌می دێما
به‌ سه‌ر هه‌ر وشکی پێکا وا له‌ هاوینی گه‌رم جێ ما

به‌ڵی بگری، به‌ کوڵ بگری، هه‌تا ئاخر دڵۆپ بگری،
به‌ گریه‌ی هه‌وری پاییز با نوقم بێ سینه‌ی کزری!

به‌فر ئاسۆی بڵند بگرێته‌ چوارچێوه‌ی بلوورینی،
له‌ چه‌م هه‌ڵسێ خوڕه‌و هاژه‌ی شه‌پۆلی ئاوی خوێنینی!

دڵۆپی سارد و فێنک با له‌ سه‌ر دار و ده‌وه‌ن بـڕژێ،
په‌پووله‌ی زه‌ردی ئاڵتوونی له‌ سه‌ر لق هه‌ڵوه‌رێ، بپژێ

به‌ڵێ! بگری هه‌ور، بارانی پاییز بێ وچان بگری،
له‌ سه‌ر باغچه‌ی گوڵێ وا سیس ئه‌بێ ئاخر چڵی عومری!

بگرمێنێ، ته‌پ و نم دابکا، بیکاته‌ شه‌ست، هه‌رگیز،
نه‌وه‌ستێ قوڵپی گریانی، نه‌وه‌ستێ هه‌وره‌که‌ی پاییز

ته‌بیعه‌ت زه‌ردو ژاکاوه‌، له‌ حاڵی گیان که‌نشتایه‌،
نیشانه‌ی ماته‌می پاییز له‌ فرمێسکی درشتایه‌!

"مامۆستا گۆران"