شه‌وانه‌ ئه‌و ده‌مانه‌ی شه‌و ده‌گاته‌ کاتی نیوه‌ی شه‌و
خه‌ڵک نووست و له‌ چاوی من که‌سه‌ر دیسان ڕه‌واندی خه‌و

سکووتێکی به‌سام سه‌رتاسه‌ری ئه‌م دێیه‌ داده‌گرێ
ده‌ڵێی هه‌ر زینده‌وارێکی هه‌یه‌ له‌و دێیه‌دا ده‌مرێ

له‌ هیچ لایه‌ک خشپه‌یه‌ک نایه‌،چرای ماڵێکی ناییسێ
به‌ ئه‌سپایی له‌ ماڵ دێمه‌ ده‌رێ،ده‌خوشم وه‌کوو نیسێ

ته‌ک و ته‌نیا به‌ئارامی ده‌چم بۆ گرده‌که‌ی به‌ردێ
به‌دڵته‌نگی و کز و خه‌مناکیی ڕاده‌کشێمله‌سه‌ر به‌ردێ

ده‌که‌م جا سه‌یری ئه‌ستێران و هه‌ڵده‌مژم شنه‌ی شه‌وبا
شه‌و و بێده‌نگیی چه‌ند خۆشه‌،هه‌میشه‌ خۆزگه‌ هه‌ر شه‌و با

وه‌کوو ئاواڵی چاک ،ئه‌ستێره‌کان گوێ ڕاده‌دێرن بۆم
هه‌تا بۆیان به‌یان که‌م، موو به‌موو ڕازی ده‌روونی خۆم

کوڵم هه‌ڵده‌ستێ ئه‌و جاره‌‌ و له‌به‌ر ده‌ردم ده‌ناڵێنم
هه‌تا ئاوری دڵم ده‌کوژێته‌وه،‌ ئه‌سرین ده‌بارێنم

شه‌وانه‌ گه‌ر نه‌که‌م ئه‌و شیوه‌ن و ناڵین و گریانه‌
ده‌سووتێنێ وجوودم ،ئاگری ئه‌م جه‌رگه‌ بریانه‌

به‌ڵی گریانی نیوه‌ی شه‌و ده‌کا ناسۆری دڵ، مه‌رهه‌م
کوڵ و کۆم داده‌مرکێنێ و به‌جێ دێڵێ دڵی من خه‌م

هیمن موکریانی

دڵ لەبەر دەردى فــــیراقى یـــارە مـــەیلى مــەى دەکــــا
گــوێ لە دەنگى ساز و عوود و بەزمى ناى و نەى دەکـــا

ســەردەمێ مەست و خــومارە خــــادیمى مەیخــــانەیە
وەقتى تەسبیحى لە دەستە صـۆفییە حەى حــەى دەکا

ڕۆژى وایــە هـەر بە کـــەیف و پێکـــــــەنین و خـــــەندەیە
بەعــزە جــــار مەجنوونە دائـــیم گـــریە بــۆ لەیلەى دەکا

بەعزە جـــــــــــــاران ( عالـم و عـامل و عـابد ) خــۆیەتى
وەقتى جـەهل و فیسقى زۆرە عالەمى لۆمەى دەکــــــا

پێـى ئەڵـــێم ئـەى دڵ وەرە ئـــێرانى بە یان طــــــوورانى
ئـەو لە بەینى هەردوو جێگا ڕوو لە دەشتى ڕەى دەکــــا

دڵ نــــزانم شـــــێتە یــا ســـەرخــــۆشە یـا دێـــوانـەیــە
یا ئیلاهـى ئیشـى وا عەکسى بە من تــــاکەى دەکــــا

دوور لـــە یـــارە دڵ لـــە بـــۆیى بێ ســـەبــاتە (صــافیا)
تاکــوو لەم ســـەگ مــەرگە دابێ ئیختیارى وەى دەکا!!!


"صافی هیرانی"

دڵم نایه‌ به‌جێت بێڵم برۆم و بۆخۆم به‌ دنیادا
سه‌ری خۆم هه‌ڵگرم وه‌ك شێت به‌ كێو و ده‌شت و سه‌حرادا

ده‌ڵێم ناكه‌م هه‌ڵێم راكه‌م عیلاجی ده‌ردی سه‌وداكه‌م
كه‌مه‌ندی تۆم له‌ گه‌ردندایه‌ سا چبكه‌م به‌رم نادا

له‌ سینه‌ی پڕ بڵێسه‌م هێند ده‌كێشم ئاهی گه‌رم و سارد
خه‌لیلی تۆیه‌ دڵ ، بۆیه‌ كه‌ناریش پێی زه‌ره‌ر نادا

ئه‌من قه‌ت مومكینم نابێ خه‌یاڵی تۆ له‌ دڵ ده‌ركه‌م
چ كه‌س بێ قووتی رۆح نابێ بژی بێ شك له‌ دنیادا

له‌به‌ر فكر و خه‌یاڵی كاكۆڵت قوربان وه‌ها ماتم
شه‌و و رۆژ نا بزووم ئه‌سڵه‌ن نه‌ به‌ملادا نه‌ به‌ولادا

مسته‌فابه‌گی ساحێبقران