لێره‌و له‌وێ

لێره‌دا

شه‌قام

دوگمه‌کانی کردۆته‌وه‌و

سه‌د کلیل خه‌ریکی کردنه‌وه‌ی قوفڵێکن

لێره‌دا گلێنه‌ی چاویش

وه‌ک دوو کۆتری شپرزه‌ن

له‌وێدا

بان و کۆڵانان

که‌ڕ و کاسی

فڕه‌ی باڵی بێ ئۆقره‌ییانن و

لێره‌دا

هێڵی قه‌ڵه‌می وێنه‌ونه‌که‌ت

ئه‌وه‌نده‌له‌دوو توێی

په‌ڕه‌ی کاغه‌زی ئاڵاواڵای

تامه‌زرۆ

له‌سه‌ر لاقێک راوه‌ستاوه‌

به‌رگی تۆزی پشت‏گوێخراوی

خۆی له‌خۆی ئاڵاندوه‌

شوشه‌عه‌تره‌که‌یش

ئه‌وه‌نده‌بۆنی به‌خۆوه‌کردوه‌

چ ماچی دی هیچ بۆنێکی‏تر ناناسێته‌وه‌و

لێره‌دا

هه‌واڵ وه‌ک پۆسته‌چی

کۆڵان به‌کۆڵان و

قوژبن به‌قوژبن

له‌گه‌راندایه‌

له‌وێدا

نه‌هه‌وای هه‌واڵێک له‌پرسینه‌و

نه‌باسی له‌خواستی بوخچه‌که‌ی سینگم له‌ئارادایه‌

لێره‌دا پیته‌کانی ناو کتێب و جه‌ریده‌کانیش

جموجۆڵ و مقۆ مقۆیانه‌

ئاره‌زوی نوسین و

دارشتنی چیرۆکێکی‏تریان له‌سه‌ردایه‌

لێره‌دا

من نامه‌وێ ده‌ست له‌م چیرۆکه‌هه‌ڵگرم

عه‌تا سه‌لیمپور

ئالپاچینۆ

پیره‌مێردێک ئاوه‌ژوو چه‌ترێکی به‌ده‌سته‌وه‌یه‌

خه‌تی دامێنی پاڵتۆکه‌ی خیابانێکی بێ بڕانه‌وه‌یه‌‌

باران له‌ناو چه‌تره‌که‌یدا حه‌وزێکی ره‌ش دروست ئه‌کات و

ماسیه‌کانی حه‌وزه‌که‌له‌گیرفانیا تینویانه‌

که‌سێکیش له‌ته‌نیشتیه‌وه ‌ته‌نیایه‌

جگه‌له‌دڵۆپی باران و ئاوی دامێنی گوێسپانه‌کان که‌سێک ده‌نگی لێ نایات

پیره‌مێردێک ده‌ستی که‌سێکی ته‌نیای گرتووه‌

ئاوه‌ژوو سه‌مای تانگۆ ئه‌که‌ن

دنیاش ره‌ش و سپییه‌ ...

بێ ئه‌وه‌ی هه‌ستی پێبکه‌م ئالپاچینۆ کۆتایی به‌فیلمه‌که‌ی هێنابوو

ره‌زا سوری

سنوور

سه‌رم په‌یوه‌ستی سنگت ده‌بێ

مه‌مکه‌کانت ته‌ر

پرچه‌کانت ئاڵۆز

ده‌ستم به‌تاڤگه‌کانیدا دیته‌خوار

نیگات روبارێکی بێ بڕانه‌وه‌یه‌

له‌ناکاو ...

ئاسمانم لێ ده‌بێته‌وێرانه‌شارێک

زه‌ویم لێ ده‌بێته‌کوێره‌رێگایه‌ک

ناتوانم پێخاوستر له‌وشه‌کانی تۆ بم

به‌رداوی تر له‌نیگای تیزپێت

سێبه‌رێک دێته‌نێوان ئا‌مێزمان

په‌ڵه‌هه‌وری نامۆیی یه‌خه‌مان به‌رنادات

مه‌مکه‌کانت له‌رومه‌تم جیا ده‌بنه‌وه‌

تاڤگه‌ی پرچه‌کانت له‌هاژه‌ئه‌که‌وێ ...

ده‌ستم به‌له‌مێکی له‌وشکانی که‌وتوه‌

تارمایی چاوه‌کانمان ماچ ئه‌کات

تۆ... په‌یوه‌ستی سێبه‌ره‌که‌ئه‌بیت و

سه‌رم ... په‌یوه‌ستی دیوار

ره‌زا سووری

سکاڵا

هێشتا کوڵمی گه‌شی کیژی ئه‌نفال خۆڵ نه‌یڕزاندبوو

سکاڵای ده‌رونم برد بۆ نیشتمان

هه‌ناسه‌ی هه‌ڵکێشاو وتی :

خۆڵ له‌هه‌موو که‌س باشته‌ره‌،

جه‌سته‌ی ناسکی کیژه‌کان و چاوی گه‌شی مناڵه‌کانمان به‌ئه‌مانه‌ت هه‌ڵئه‌گرێ

وتم : ئه‌گه‌ر ده‌می سه‌گی لێدرابێ چی ؟

وتی خوا به‌ده‌می سه‌گ پیس نابێ

ره‌زا سووری

پرچ

پرچ دێته‌خوار ...

پرچ دێته‌لا ...

پرچ هه‌ڵئه‌گه‌ڕێته‌وه‌ ...

به‌ڵام پرچ نایاته‌قسه‌ ...

باسی ئه‌وه‌ناکات که‌دوێشه‌و تا کازیوه‌ده‌ستم له‌کۆڵانه‌کانیا پیاسه‌ی ئه‌کرد

ره‌زا سووری

ئێره‌بێجگە لە رەزا کەسی لێ نیە

حەزم لە گوزەرە

مژدی تێپەر بوون ئەکەم
لە تاسەی رۆشتنام
تۆ لە ناوەختا شەیدا ئەبی
بێ پاسپۆرت تێپەر ئەبیت
لەهەرچی منە
ناتوانم لە بزافی سینەتا هەڵپروێم
ناتوانم لە گۆڤەندی دەنگتا میڕا بم
ناتوانم لە شیددەتی تۆدا سپی بم
قووڵم لەبزاف
پڕم لە گوزەر
حەزم لەشتێکە کە ناوەختە
مژدی داکوتران ئەکەم
لەتاسەی هەڵواسینام
لەم شارەدا پڕ بەدڵ حەزم لە وەستانە
...
رەزا ئەبم لە تۆدا
...
لەتاسەی هەڵوەرینام
مژدی بۆ رووخان ئەکەم
هەناسەکانم تێپەڕی وەستان ئەبن
مژدی بۆ هەرچی هەرچیە ئەکەم
حەزم لە داڕمانە
پێویستم بۆ هەڵپروان
رەزا نابم لەناوەختا
لەتاسەی هەموو هەرچیەکانام
لەم دێڕەدا پڕ بەدڵ تاسەی گوناە ئەکەم
لەم شێعرەدا پڕ بەدڵ مژدی بۆ وڕمانێک ئەکەم
تاسە ئەکەم پڕ بە جێیەک
تۆ لە مندا غوربەتیت
تۆ لەناخمدا پڕ پڕیت
لەوانەیە زەرووریم بۆ داهێنان
تۆش
دزە ئەکەیتە ناخم
بەڵام

ئێره‌بێجگە لە رەزا کەسی لێ نیە

ره‌زا سووری

هه‌نگاوم که‌هه‌ڵێنا

ده‌ستێک له‌سه‌ر شانم بزوا

روم کرده‌ته‌نیا په‌نجه‌ره‌ی ژووره‌که‌م

ده‌ستێک دایخستبوو

رووم کرده‌ده‌رگای ژوره‌که‌م

ده‌ستێک توند گرتبوی

ده‌ستم برد بۆ ته‌نبوره‌که‌م

ده‌ستێک سیمه‌کانی پچراندبو

ده‌ستم برد گڵۆپه‌کان داگیرسێنم

ده‌ستێک شکاندبوونی

ویستم دانیشم که‌سێک فه‌رشه‌کانی بردبو

شله‌ژام ، ویستم سه‌رم به‌م به‌دیوارا

که‌سێک دیواره‌کانی روخاندبو

ویستم هاوار بکه‌م ئه‌ی خوا ...

که‌سێک ئه‌ویشی لێستاندبوم