هاناکم

وره یارم وره ای تازه یارم
وره استیره که ی شو گار تارم
وره ای شاپری بالی خیالم
وره ای شو چرای روناکی مالم
وره ای خج وره ای خاتو زینم
وره با بژن و بالا که ت ببینم
وره با دامری آوات و تاسه م
وره با بسکه کت لا دا هنا سه م
وره ای نو نمامی باخی ژینم
وره با بژن و بالاکه ت ببینم
وره سور با له سه ر واده و بلینی
وره کرد به و مه که پیمان شکینی
وره یارم وره ای تازه یارم
وره استیره که ی شوگاری تارم
وره ماچم دیه ماچی خدایی
که بیزارم له ماچی سینمایی

هیمن

ريژنه

تو به لينيم پي بده تا من بره و ژوان ببمه وه
بمده يه ماچيكي ته ر له م ليوه با جوان ببمه وه

ده ستي له رزو كم هه تا تييدايه هيزي به ي گوشين

ليم گري تاوي له باخي سينه ميوان ببمه وه

شه نگه بيري بسره وه فرميسكي بي شواني ئيتر
ره نگه هيشتا له و چيا و زوزانه بو شوان ببمه وه

من گولي سه ر گوري ئاواتم له ميژينم به لام
ريژنه ييكم لي بده پيم وايه بو روان ببمه وه

شيخي سه نعان بو كچي گاور له ئيسلام وه رگه را

من خه ريكه بو كچه شيخي په ژيوان ببمه وه

ژووان

به‌رپه‌نجه‌ره‌ که‌سی لێ نه‌بوو
هیچ که‌سێ له‌به‌رپه‌نجه‌ره‌که‌ نه‌بوو
که‌سی لێ نه‌بوو
به‌رپه‌نجه‌ره‌که‌ هیچ که‌سی لێ نه‌بوو

قه‌ت له‌بیرم ناچێته‌وه‌
ئه‌م ڕووداوه...‌
ڕووداوترین به‌سه‌رهاتی خووساوی دیتنم

که‌سی لێ نه‌بوو
به‌رپه‌نجه‌ره‌که‌ هیچ که‌سی لێ نه‌بوو

چۆن له‌بیرم بچێته‌وه‌!

به‌رپه‌نجه‌ره‌که‌ که‌سی لێ نه‌بوو
هیچ که‌سی لێ نه‌بوو
له‌به‌رپه‌نجه‌ره‌که هیچ که‌سی لێ نه‌بوو...‌


ساماڵ

چوار کورته‌ شێعر : محه‌مه‌د ئه‌حمه‌دی (ساماڵ)

ئایدیالۆژیا

ئه‌و شه‌پۆلی دووکه‌ڵه‌ی
تاکوو سه‌ر ژێر سیگاره‌که‌
چاومی داگیراند
هه‌یکه‌لی خۆم بوو
ئه‌و شه‌پۆلی دووکه‌ڵه‌ی
تا سه‌ر ته‌پڵه‌کی جگه‌ره‌کان
دایشۆڕاند نیگام
هه‌یکه‌لی من بوو
تاکوو سه‌ر ژێرسیگاره‌که‌
چاوم ده‌یدی
هه ‌یکه ‌لێک
شـ ـــــــ ــی
ده‌بۆوه‌
ئیترنوستم ...

خوازه‌ی یه‌که‌م

له‌ سوێی هه‌ناره‌کانی تۆ
پیاوێکم له‌ ئاو
هه‌ر دڵۆپه‌م دڵۆپێکی تر

خه‌ریکه‌ له‌ش / به‌ ئاره‌زوویه‌کی بێ حه‌یاوه‌
خه‌ریکه‌ تۆ / ده‌تکێم له‌ حه‌یا

خه‌ریکه‌ شه‌پۆلانم له‌ پێست
ده‌لرفێ به‌ سه‌رانسه‌رتدا

خه‌ریکه‌ نمێک فێنکایی مه‌مکت
به‌ خوازه‌ی یه‌که‌م خه‌ونی مرۆڤه‌وه‌
ده‌گوورێ

کێ به‌ ڕووتی نابیسترێ!

شه‌وێک ڕووت ده‌بمه‌وه‌ ڕووت
که‌س به‌ ڕووتی ته‌نیا نییه‌

جێ و بانه‌که‌م
ده‌نگی تۆ ڕاده‌خا و
پێستم بین ده‌خواته‌وه‌ بین.

کێ به‌ ڕووتی نابیسترێ؟

من ڕووت بوومه‌وه‌ ڕووت
هانێ...ها...
"ئه‌وه‌ جه‌سته‌ی منه‌ بیخۆن"*
ئێره‌ کۆڵانێکی ته‌نگه‌به‌ره‌
باریک تر ده‌بێته‌وه‌ تێیدا / که‌سێک
له‌ په‌نجه‌ره‌ڕا .. تا ئاسۆیه‌کی دوور .../ حه‌ز ده‌کا
لاسایی بکاته‌وه‌ ده‌نگێک ... نایبیستێ و ڕووت ده‌بێته‌وه‌ ڕووت
کێ به‌ ڕووتی نابیسترێ ؟

*عیسا مه‌سیح-ئینجیلی مه‌تا-ئایه‌تی 26

من لێت زیزم

هه‌موو ڕۆژێ کاتێ هه‌تاو

هه‌ڵدێ و ماچی ئاسمان ئه‌کات

کاتێ شه‌ماڵ دێت و

یاری به په‌رچه‌می خاوم ئه‌کات

دڵم زیز ئه‌بێت له ژیان

چاوم پڕ ئه‌بێت له گریان

ئاخر گوڵم وات فێر کردووم

هه‌موو سپێده‌یه‌ک به تیشکی خۆرا

نامه‌یه‌کم بۆ بنێریت

وا ڕاهاتووم هه‌موو شه‌وێ

به چاوی ئه‌ستێره‌کان و

تریفه‌ی مانگدا

شیعری جوانم بۆ بنێریت

که‌چی عه‌یامێکه ونیت

نامه‌یه‌کی تۆم پێ ناگات

ته‌نهاییت ڕاسپاردووه

بێت له جیاتیت باوه‌شم کات

ئه‌مڕۆ دڵم بڕیاری دا

به هه‌ورێکی دڵ پڕی وه‌ک خۆی

ئه‌م نامه‌یه‌ت بۆ بنێرێت

تێیدا پێت ئه‌ڵێت ده‌رکه‌وه

چاوه‌ڕوانیت شێتم ئه‌کات

ده‌رکه‌وه پێش ئه‌وه‌ی سه‌راب

بۆ چاوانی ڕاکێشم کات

له بیرت دێ؟

له بیرت دێ پێت ئه‌وتم

گه‌ر زیز بی لێم، من دڵ ته‌نگم؟

ئیتر له خۆم نابورم و

ئاوێزانی مه‌رگم؟

ده‌وا پێت ئه‌ڵێم زیزم

زیزم له‌وه‌ی که لێم ونیت

ده‌ده‌رکه‌وه....

ده ده‌رکه‌وه نه‌کا زیزیم

وه‌ک گه‌رده‌لولێ هه‌ڵکا و

چی یادگاری نێوانمانه

بۆ ئامێزی گۆڕێ به‌رێت

ده‌رکه‌وه ده‌ی مه‌یه‌ڵه زیزیم

بێته شه‌پۆلێکی توڕه‌ و

خۆم و عه‌شقم به‌ره‌و که‌نارێ

له فه‌نابوون به‌رێت....

وا هه‌ست ئه‌كه‌م خۆشم ئه‌وێی

عه‌یامێكه وا هه‌ست ئه‌كه‌م

له به‌ر ده‌رگای خه‌یاڵه‌كانمدا وه‌ستاوی و

نه شه‌و نه ڕۆژ به‌ری ناده‌ی

من هه‌ست ئه‌كه‌م گشت چركه‌یه‌ك

زێده تر و زێده‌تر بیرت ئه‌كه‌م

ئه‌بینم ڕێگای دییه‌كانمت گرتوه‌و

هه‌رچی ئه‌ڵێم خۆت لا ناده‌ی

من هه‌ست ئه‌كه‌م گشت ترپه‌یه‌كی دڵم

به پیتێكی ناوت گۆرانی ده‌ڵێ و

ئه‌بینم تۆش به هێمنی

له‌گه‌ڵ ستارنه‌كه‌ی دڵما سه‌ما ئه‌كه‌ی

هه‌ر كه سه‌یری ئاسمان ئه‌كه‌م

شێوه‌و چاوی تۆم دێته پێش چاو

له ئه‌ستێره‌كان فرمێسكه‌كانت ئه‌بینم و

له مانگه‌شه‌ویش ئه‌و خه‌نده‌یه‌ی

به ماچێكی نێرگزی, پێشكه‌شم ئه‌كه‌ی

نازانم چییه ئه‌م هه‌سته

هه‌ست به ژین ئه‌كه‌م

به خه‌نده به جوانی

به ناسكی به ڕاستگۆیی

هه‌ست به دووری ناپاكی

نازانم چییه…. ئه‌م هه‌سته

بۆ هه‌ر كوێ بڕۆم تۆش هه‌ر له‌وێی

ڕوو له هه‌ر كه‌نارێكی چۆڵی یادگاری كه‌م

له‌وێشدا تۆ بۆم چاوه‌ڕێی

هه‌ر كه ته‌نهایی یه‌خه‌م ده‌گرێ و

ئه‌سرین دێته لام، تۆ بۆم هاوڕێی

گه‌ر بچمه بن دره‌ختێكی زه‌ردی پایزیشه‌وه

له‌گه‌ڵ گشت گه‌ڵایه‌كی ئه‌و داره‌و

گشت گه‌ڵایه‌كی ته‌مه‌نم

هێدی هێدی هه‌ڵده‌وه‌رێی

به‌ڵێ ڕوو له هه‌ر شوێنو هه‌ر جێیه‌ك كه‌م

تۆ ده‌ستت بۆ ده‌ستم درێژ كردوه‌ و

بۆم چاوه‌ڕێی

من هه‌ست ئه‌كه‌م خۆشم ئه‌وێی

بۆ هه‌ر لایه من باڵ بگرم

یان بۆ هه‌ر هه‌وارێكی وێران

من سه‌ر هه‌ڵگرم

ئه‌بینم تۆش له‌وێی

به هێمنی بۆم چاوه‌ڕێی

من هه‌ست ئه‌كه‌م خۆشم ئه‌وێی

وا هه‌ست ئه‌كه‌م خۆشم ئه‌وێی

ئه‌مڕۆ به سووراوی لێوه‌کانم

گوڵه نێرگزێ ماچ ئه‌که‌م

په‌ڕه ناسک و سپییه‌کانی

وه‌ک و ئه‌م ڕۆژه سوور ئه‌که‌م

ئه‌مجا دێم و ئه‌چرپێنم

هه‌موو ساڵێ به خۆشی بێ

خۆشه‌ویستم ڤه‌ڵانتاینت

گشت ساتێکت هه‌ر ئه‌شق بێ و

ڤه‌ڵانتاین بێ چرکه‌کانت

گوڵم ڕۆژی ئاشقانه

هه‌زار جارت لێ پیرۆز بێ

هه‌موو ساڵێ ئه‌م دڵه‌ی من

ووڵاتی خۆشه‌ویستیت بێ

وا هاتووم و بۆم هێناوی

گووڵی سووری وه‌ک خۆت ڕندک

چه‌ن دیڕێکم بۆ نووسیوی

وه‌ک دڵه ساواکه‌ت ناسک

ڤه‌ڵانتاینت لی پیرۆز بێ

ئه‌ی شازاده‌ی ووڵاتی من

هه‌موو ساتێکت هه‌ر من بێ و

هه‌موو ساتێکم هه‌ر تۆ بی

ئه‌ی شاجوانی ته‌مه‌نی من

من و ئاشقان

ئه‌مشه‌و چه‌ن عاشقێكی مێژوو میوانم بوون

هه‌ر یه‌ك داستانی ئه‌وینی خۆی ده‌گێڕایه‌وه

یه‌كه‌م خاتوو زین باسی خۆشه‌ویستی خۆی بۆ مه‌م كرد

له‌گه‌ل هه‌موو وشه‌یه‌كدا خوێن به چاویا ئه‌تكایه‌وه

دوای ئه‌و شیرین هه‌ر كه ناوی فه‌رهادی برد

چی ڕسته بوو له‌سه‌ر زاری...وه‌كو مۆمێك تووایه‌وه

نۆره‌ی خه‌جێ بوو باسی سیامه‌ند كا

كه‌چی ده‌نگی خۆی به قوماتی بێده‌نگی پێچایه‌وه

كاتێ شه‌م ده‌ستی به دوواندن كرد

نه‌ی ئه‌زانی ته‌نها ناوی دێوانه بوو به لێویه‌وه

له‌یلا هێشتا چیرۆكی خۆیو مه‌جنونی ته‌واو نه‌كرد

چی ووشه‌یه له ئامێزی خه‌مگینیدا بورایه‌وه

پێش ئه‌وه‌ی جولیێت بتوانێ باسی خۆی كا

گشت یادگاری یه‌كانی ڕۆمیۆ به گیانیدا تلایه‌وه

به‌ڵام گیانه دڵنیابه خۆشه‌ویستی یه‌ كه‌ی من بۆ تۆ

زۆر له‌وه‌ی ئه‌وان به هێز تر بوو

هه‌ر كه ئاماژه‌م به یه‌كه‌م پیتی ناوت كرد

خوااوه‌ند گیانمی كێشایه‌وه

گفتو گۆی ئاكام و ئیڤان له ژێر گڵدا (هۆنراوه‌یه‌ك وه‌ك
وه‌ڵامی ئیڤان و ئاكام بۆ به‌ڕێز ڕێژین ئیبراهیم)



تێبینی: ڕۆژی 21-1-2007 چیرۆكێكم خوێنده‌وه به ناوی (چیرۆكی ڕاسته‌قینه: ژیانێك له
خۆرئاوا بونی مه‌رگدا) له نوسینی به‌ڕێز كاك ڕێژین ئیبراهیم، به‌ڕاستی زۆر گریاندمی
وه وا هه‌ستم كرد ئه‌و دو عاشقه داوام لێ ئه‌كه‌ن ئه‌م گفتو گۆیه‌یان بۆ زه‌مین
بگوازمه‌وه وه به كاك ڕێژین بڵێم ئاكام و ئیڤان نه‌مردوون.......



گفتو گۆی ئاكام و ئیڤان له ژێر گڵدا....



ئاكام:

گوڵه‌كه‌م؟ بۆ بێده‌نگی؟!؟!؟

بیرت ئه‌كه‌م....

من له ژێر ئه‌م گڵه بێڕه‌حمه‌شدا

بڕوات هه‌بێ

چاوه‌ڕوانی چرپه‌یه‌كت ده‌كه‌م

ده سه‌رێكم لێبه !!!

عه‌یامێكه نه‌مبینیوی ئازیزه‌كه‌م



ئیڤان:

من لێره‌وه گوێم لێیه چۆن بانگم ئه‌كه‌ی

ئاگام لێیه چۆن به فرمێسكه‌وه لای فریشته‌كان

هه‌مو ساتێ باسم ئه‌كه‌ی

به‌ڵام چۆن بتوانم بگه‌مه لات؟!؟!؟

تا ئه‌و ماچه‌ی له‌سه‌ر زه‌مین له منت نه‌دی

له‌م مه‌رگه‌دا بۆت كه‌مه خه‌ڵات....



ئاكام:

شازاده‌كه‌م ده پێم بڵێ

چۆنی؟ بیری ژیان ناكه‌ی؟

بیری وڵاته بێ نازه‌كه‌مان و

سۆزی دایه‌ و بابه ناكه‌ی؟

ده بۆم باس كه.....

ئێستا تۆ له كوێیت و چی ده‌كه‌ی؟!؟!



ئیڤان:

من ئێستا له باوه‌شی فریشته‌یه‌كدام

باسی ڕۆژانی زانكۆی بۆ ئه‌كه‌م

باسی ناپاكی و زۆرداری

مرۆڤه‌كانی سه‌رزه‌مینی بۆ ئه‌كه‌م

ئه‌زانی ئه‌م فریشته‌یه‌ی هه‌رگیز منی نه‌ناسیوه

جارێ ئه‌و عه‌شقه‌ی چاوانمانی قه‌ت نه‌دیوه

چه‌نێ گریا بۆ هه‌ردوكمان؟

ئیدی من بیری كێ بكه‌م؟!!!!؟

ئه‌ی ئه‌وان نه‌بونه هۆی له‌یه‌كبونمان؟



ئاكام:

هه‌ناسه‌كه‌م،،،،ئا له‌‌م گۆڕه تاریكه‌مدا

چاوه‌كانت جوتێ مۆمن و

كزه كزه بۆم ئه‌سوتێن....

یادگارییه‌كانت دانه دانه

ده‌بنه نه‌مامێكی سه‌وز و

له‌م گڵه وشكه‌ی سه‌رم ئه‌ڕوێن....

به‌ڵام لێره‌ش هه‌ر لێم دوری !

بۆیه زۆر زو زه‌رد ده‌بن و هه‌ڵده‌وه‌رێن..!!!



ئیڤان:

بڵێم چی ؟ قه‌ده‌رمان وایه

له هه‌مو كوچه‌یه‌كی ژیندا

عه‌شقمان پێ ناڕه‌وایه

به‌ڵام بڵێ سوپاس بۆ خوا

به‌س نییه بۆ ده‌ردی دوریمان

ئا له‌م مه‌رگه لوت به‌رزه‌دا

گۆڕینه‌وه‌ی ئه‌م نامانه‌ ده‌وایه؟!؟!؟



ئاكام:

ده‌ستت بێنه وه‌ره بفڕین

به‌م ئاسمانه چۆڵه به‌رینه‌دا

به‌س خۆم و خۆت.

وه‌ك په‌روانه باڵ بگرین

سڵاو له ئه‌ستێره‌كان ئه‌كه‌ین و

له لای مانگیش پشو ئه‌ده‌ین...

با وابزانین ئاسمان ده‌ریایه

هه‌وره‌كانیش كه‌شتین و

زه‌ویش هه‌ژدیهایه !!!!

ده وه‌ره نازداره‌كه‌م

ده‌ستت بێنه..............



ئیڤان:


ئای له‌و ساته‌ی به تۆ ئه‌گه‌م...!!

یه‌ك سات به ئازادی و دور له ترس

نیگایه‌كی چاوت ئه‌كه‌م

به‌ڵام چی بكه‌م ژیانه‌كه‌م

ئا له‌م گۆڕه بێڕه‌حمه‌شدا

هه‌رچی لاواچه داخراوه

ده‌ست و پێشم به ئه‌سرینی ئه‌ستێره‌كان

به خه‌می په‌پوله‌كانی ئێره به‌ستراوه...!!!



ئاكام:

سه‌برت هه‌بێ باوانم

یه‌زدان زۆر به ڕه‌حمه

بۆیه منیش باش ده‌زانم

هه‌ر ڕۆژێ دێ به‌یه‌ك بگه‌ین

تا ئه‌و ساته منیش هه‌رده‌م چاوه‌ڕوانم

تا ئه‌و ده‌مه ده‌بیه ڕوناهی شه‌وانم

ئێمه لێره به ئازادی چاوه‌ڕوانی یه‌كدی ده‌كه‌ین

بۆیه هه‌تا ماوم من مه‌منونی ئاسمانم....

گوڵم دڵته‌نگ مه‌به تاقانه‌كه‌م

من و تۆ بۆیه‌ك كراوین

هه‌ر پێك ئه‌گه‌ین باوانم



ئیڤان:

خۆشم ئه‌وێی

به قه‌د مه‌رگ به‌قه‌د ئه‌وین

هێنده‌ی خه‌مه‌كانی سه‌رزه‌مین..!!

خۆشم ئه‌وێی

هێنده‌ی ئاسمان

به‌قه‌د بێ نازی كوردستان..!!

خۆشم ئه‌وێی

زیاتر له بێ ویژدانی مرۆڤه‌كان

قوڵتر له ده‌ریای فرمێسكی كیژۆڵه‌كان..!!

دڵنیابه له‌م گۆڕه‌شدا و

له ڕێگا گوڵزاره‌كانی به‌هه‌شتیشدا

چاوه‌ڕێتم........

به‌ڵێ.... من خۆشم ده‌زانم

مردویه‌كی ئێجگار شێتم..!!!!



ئاكام:

گه‌ر تۆ شێت بی من شێت ترم

به‌م مردویه‌تیه‌ش من ئاماده‌م

سه‌د جاری دی له پێناوی نیگایه‌كت بمرم..!!

خۆشم ئه‌وێی

زۆر زیاتر له‌وه‌ی خۆت ده‌زانی

هێنده‌ی جوانی و خه‌مباری شه‌وانی سلێمانی

خۆشم ئه‌وێی

به ڕادیه‌ك دور له زانین..!!

زۆر زیاتر له خۆشه‌ویستی مه‌م بۆ خاتو زین

خۆشم ئه‌وێی

ئێجگار زیاتر له خۆشه‌ویستی فه‌رهاد بۆ شیرین

زیاتر له زۆردارانی سه‌ر زه‌مین..!!

خۆشم ئه‌وێی

خۆشه‌ویستییه‌ك......

دوو هێنده‌ی ئاسمان فراوان

سه‌د هێنده‌ی ئازاره‌كانی نیشتیمان..!!



ئیڤان:

توخوا به‌سه هه‌‌ناسه‌كه‌م

ئه‌م وشانه‌ت شێتم ئه‌كه‌ن

به‌ره‌و ژوانه‌كانی زانكۆ و

زه‌وتی كه‌س و كارم ئه‌به‌ن

من و تۆ هه‌رچه‌ند نێژراوین...

به جه‌سته‌ و ڕۆح له نێو ژیانا نه‌ماوین

به‌ڵام خه‌ونه‌كانمان گشتیان زیندون...!!

هیچ له خۆزگه‌كانمان نه‌مردون..!!

من و تۆ له ڕۆژی قیامه‌ت

ده‌بینه خه‌ج و سیامه‌ند



ئاكام:

خۆشه‌ویستی من و تۆ؟

نه زه‌ریایه‌ و نه ئاسمانه

نه داستانی عاشقانه

نه فرمێسكی كوردستانه..!!!!

خۆشه‌ویستی من و تۆ؟

نه كۆرپه‌ی سه‌ر زه‌مینه

وه نه شه‌هیدی ئه‌وینه..!!!!

خۆشه‌ویستی من و تۆ؟

پاكترین به‌هره‌ی یه‌زدانه

ناوی ئاكام و ئیڤانه....!!!!




كانی هه‌ڵه‌بجه‌یی - هۆڵه‌ندا