[behnam5555]

په‌ندی «گڵۆڵه‌م که‌وته‌ لێژێ که‌س خاسیه‌تم نایێژێ»:


مه‌لاغه‌فوور:


ئه‌گه‌ر گڵۆله‌ی تۆ که‌وته‌ لێژی
به‌ ته‌ما مه‌به‌ که‌س چاکه‌ت بێژی



بێکه‌س:


وا گڵۆله‌ی که‌وته‌ لێژی، باوی ئیستیعمار نه‌ما
هیچ که‌سێ ئیتر به‌ زوڕنا و ته‌پڵی ئه‌و هه‌ڵناپه‌رێ


ئه‌حمه‌د موختارجاف:


ئه‌ی خودا تا که‌ی له‌ ده‌رحه‌ق من وه‌فا و مه‌یلی نیه‌
بۆچ گڵۆڵه‌ی به‌ختی من هه‌ر روو له‌ جێگه‌ی لێژ ئه‌کا؟


چروستانی:


ئه‌گه‌ر کێوی، ده‌بێ بتوێیته‌وه‌ نۆره‌ی نه‌هاتت دێ
گڵۆڵه‌ت که‌وته‌ لێژی، مان و ژینت مردن و ژانه‌


ئاوات:


ئه‌مڕۆ گڵۆڵه‌ی من که‌وتۆته‌ سه‌ره‌و لێژی
هیچ که‌س نیه‌ خاس بێژی تا خۆ که‌مه‌ قوربانی