شارە شیرنەکەم، ئەی سەرچاوەێ هونەر، کرماشان
دویر بوو لە خاکت دایم ڕێ زیان و زەرەر، کرماشان
هەرساڵ بەرزتر بوو بەختت لە باڵاێ بیستوین
بێباک لە سیاتی دەس، تووفان و تەشەر، کـــرماشان
سەوزە سەرشانەیلت لە فەسڵ سەخت خەزان
نەرگس وەهارە دەیتە مزگانی بەشەر، کرماشان
چڵەی زمسانە، شەلاق کڕیوەس، تانەێ تووفانە
گڕەێ ئاگرگات دێرێ، نیشانە لە خوەر، کرماشان
لە گەردەنەێ خەتەرەیل ناکاو ئی چەرخ گەردوونە
سەرت هەر بەرز مەێدانە و سینەت سپەڕ، کرماشان
گیروودەێ دەس بێگانە بیتە و زەخم زەمانە دیتە
زامەکانت کەیمە تاجەگوڵ ونەیمەێ سەر، کرماشان
وە ئەسرین دیدەمان، وەل ئاو سەیمەرە و سیروان
خاس شووریم باڵات، لەی خویناو جگەر، کرماشان
تو ئەی سفرە سەرە ڕێ ڕێویاران هند و چین
یادگارە قەیمەکەێ کاکە هوخشتەر، کرماشان
ڕەمز ڕزگاری کوردانی، خاک خێڵ خوەر نیشان
داخم چوی کەس لە هاڵت ناپرسێ خەوەر، کرماشان
دڵگیر نەویت لە گەنی داب گەردوون، مهرەبان شار
چوین باخیچ بێ بەشە دایم لە ساێە و سەمەر، کرماشان
نە گوڵ بگر نە مەداڵ، لە دەس بێگانەیل تەمەدار
یانە بوو گوڵ کەنە ژار، مەداڵیچ وە نەشتەر، کرماشان
دەفتەر یادەکانت بێستوینە، دەفتەردار تو شاهان
سەبتە ئەسرار سەنگینت، لە سەد دەفتەر، کرماشان
مەوزەێ کوردانە، قوێەێ ئاشقانە، ئەو تاقوەسانە
ئەشق شیرین و ڕەنج فەرهادت ناچووتە هەدەر، کرماشان
میلکان کورد دویرە، کاروان شەکەتە و دەلیل نابەڵەێ
هەڵسە وادەێ سەرسواریتە، سەفەر بێ خەتەر، کرماشان
سەرزەوی کتاوە کوچکینەکان، دی خوەت وە کەم مەزان
دڵ خاکت پڕ لە نەخش و نگارە و ئەسەر، کرماشان
هەر لە بەرزیەکەێ پەڕاو، تا دڵ پڕ داخ زەهاو
هوورە،هویلانە و هەڵپەرکەس،چووپیت بێ چەمەر کرماشان
چەو تەمە بڕینەسە باڵاێ بێ نازت، ڕەقیبان ئیسە
کوور کەیم ئەر چەو ناپاکێ وە تو داشت نەزەر، کرماشان
ئەر بڕینەس شەوپەرەستان، گڕەێ ئاگر لە ئاگردان
پەنانی پڕە کویرە دڵ یاران لە شوڵە و شەرەر، کرماشان
دی وەختە باخ تەجربە و پندار نیکت، بکەیمە کردار
خاون ئی خاکە خوەی، بچنێت لەی باخە بەر، کرماشان
عەلی مێهرابی
|