تۆ لە ئێوارەیەكى پاییزیمدا
كۆچ
شەو لە كۆشى پاكیزەیى و ئاوابووندا لێى راكشام
بە ئەسپایى ، هەنسكىَ قووڵ
چراكەمى كوژاندەوە
تەوارێك بێدەنگیمى كوشت
ترۆپكىَ لە دوور تێیروانیم
تارمایى كۆچێ شەیدایەك
لە خەڵوەتى بێداریدا
گوێ رادێرى جریوە بوو
شوێن ماچێكى لە ژوور سەرما تۆخ كردەوەو ..
ئێستێكى كرد
چنگىَ لە مروارى ووشەى
بۆ بەژنى پەیكەرێك هەڵرشت
خۆزگەى چڵێك
گەرامەوە ..
دایكم بینى ، لە سەر سنگى شیر رەنگییا
چڵىَ خۆزگە ..چرۆى دەكرد
لەگەڵ دەركەوتنى كەل و ..
كووڕبوونەوەى خۆرەتاوا
گەڵاو گوڵى تێكەڵ بوون و
سێبەرێكیان بۆ ماندوویەتى پەپوولەو
شەققەى باڵى مەلێك چێكرد
گەڵا ووتى :
نەمامم دى بەدەم كۆرژنى سەماوە
ئاوازى لەبەرخۆ كرد و ..
دایە باڵاو بوو بە چنار
ماسى چاوى چكۆلانەى بەرەشى شەو كل رێژ كرد و
هەردوو لێوى كۆتكراوى
جێهێشت بۆ كەنارى رووبار
راوچییەك لە خەمى نێچیر
ماندوویەتى خۆى دەتەكان
سۆفییەكیش هەردوو دەستى پاراننەوەى
بۆ ئاسمانىَ بەرزكردەوەو
بەرماڵێك نزاى كرد لە خواو ..
تەسبیحەكەى لە مەچەكى ئاڵان
ئەگەرەكانى بەیەكگەیشتن
بە یەكبگەن ..
ئاشتى ووڵات داگیر دەكات
نە كوشتار و ترس دەمێنێ و
نەش ئەو جەنگەجیهانییەى مرۆڤەكان لێى دەترسن
قەت روو نادات
بەیەكبگەن ..
كام ئۆقیانووس فراوانە
كام تەنگەبەر ترسناك و بىَ ئامانە
دەپەرننەوەو شەقى دەكەن
دڵنیابە بەیەكبكەن ئەو لێوانە ..كە هەردەشگەن
گـــڕ و بەفر..
سەما و ئاواز ..
لە چوارچێوەى تابلۆیەكى رەنگترا
قۆزاخەكان دەشكێنن و..
هێندەى تر ژیان جوان دەكەن ..!.
* فاتیح سەلام *
15/10/2011