[behnam5555]

بۆ تۆ و ساڵی نوێ..

بۆ ساڵی نوێ ئەوا دیسان گڕی گەردوون تاڵێکی تر لە پرچی تەمەنم بەبێ رەحمی ئەسوتێنێ ئەوا دیسان با هۆری رەش پەنجەیەکی ناسکی شعرم لەگەڵ خۆیا ئەوەرێنێ جارێکی تر بەجێ دێڵم کۆمەلێ یادگاری خۆش و مشتێ بیرەوەری شیرین بەجێ دێڵم کۆمەلێ خەم لە دنیای پڕ لە فەنتازیا و پڕ لە ئەفسانەیی ئەوین وەک چۆن هەر لەگەڵ گزنگا ئەستیرەیەک ئاوا ئەبی منیش... ئەوا لەم دەورەیە ئاوا ئەبم وەک چۆن بەفر لە بەهارا دەستی لە چیا بەرئەدا منیش ئاوا لەم دوانزە مانگە جیا ئەبم و تۆمار ئەکەم بیرەوەری دوانزە باخی ترش و شیرین هەڵی ئەگرم بۆ داهاتووم پرچی سێ گەڵای پایز شانە ئەکەم و ئەی خەمە باخەڵی شعرم ئەوشعرەی کە لە وەتەی هەم دوای کەوتووم ئازاربەخشە دڵ ئێشەکەم....... بۆ تۆ یەک سال تەمەنی جوانی خۆم سوتاند بۆ تۆ هەرچیم هەبوو بەخشیم پایزی ئولفەتم سڕییەوە و لە نیگارت بەهارم چاند خەمی دنیام بەکۆڵدادا و مەراقی زەریام کۆکردەوە بۆتۆ هەرچی ئەشک هەبوو بۆ کانی خۆیم بردەوە ئێستاش لە دوا ساتی تەمەنی ساڵ و هاتنی چرکەکانی ساڵی نوێ ئەمخەیتەوە سەر سەرەتا؟ سۆمای چاوانم ئەبەیت و ئەمدەیە دەست دڵی بێ ڕەحمی ڕەشەبا؟ بۆچی واتکرد؟ بۆچی هێشتت بۆت بسوتێم لەدوایشا بمسڕیتەوە؟ بۆچی بوویتە میوانی وەرزی تەنیایم و کەچی دواتر بڕۆیت و برۆیت و قەت نەیەیتەوە؟ سەری ساڵە و پێ ئەنێینە سالێکی نوێ بەڵام لای من زمان ڵاڵ و جەستەسارد و هیچ شتێکیش نابیستێ گوێ سەری ساڵە و ئەم جارە من کلوەبەفری شعر و وشەم بەسەر خەما ئەبارێنم ئەم جارەیان لە جێگای گوڵ لە جێگای تۆ تەنیاییەکەی خۆم ئەدوێنم سەری ساڵە و دڵی منیش لە گریانێکا ون ئەبێ و وەک نەورەسی دەریا نادیار ئەشڵەژێت و بەدەوری خۆی ئەخولێتەوە وەک دارستانێکی غەمگین لەخەمی خۆی ئەچزێتەوە و وەکو مۆمێ بەسەر تەنیاییەکەی خۆیا ئەتوێتەوە سەری ساڵە و ئەم جارە من لە ژورێکی سارد و سڕام هەناسەی بارانێک لە شوشەی پەنجەرەکەم ئەداو وشەی خەمناک ئەنوسمەوە لەناو غوربەتێکا ئەژیم هەر ئازارە لەسەر لێومە و لەبەر خۆمەوە ئەیڵێمەوە. کێ بۆ ئەم یادە دڵم ئەبەخشێ بە باخێکی جوان؟ کێ هەناسەیەک بە سینە و جەستەی شعرم هەڵ ئەمژێ؟ تەمەن گەڵایە و ڕوو لە وەرینە یاری بێ وەفاش لە خەمی خۆیدایە و ئاخم ناکێشێ ئاخ.........بۆ ئەم دڵەم کە پڕیەتی لە یادی جوان پڕ لە بیرەوەری خۆشی لەگەڵ تۆ پڕیش لە ئازار, لە خەم ,لە غوربەت لە ڕۆژانی بێ تاقەتی و لە ڕۆژانی دەستەمۆ پڕپڕ لە گۆرانی خنکاو لە دیوانە شعری هەڵ قرچاو پڕیش لە نیگاکردنی عاشقانە لە نازی دوای ماچی باران چەندین پیاسەی ئێواران و خوێندنەوەی چەند شعرێکی ناسک و جوان ئاخ بۆ تەمەنێ کە ئەمانەی هەموو تیایە خۆزگە و بریا پەشیمانی بەسەرهات ،چیرۆک،گۆرانی ئاخ بۆ نیگایەکی ڕوونی پڕ لە گوڵاڵەی ئێوارە بۆ دامرکانەوەی گریەی ئەم دڵە پر لە پرسیارە شەویش سوتا لەهاوارم لە گریەی ژانی بێزاریم مانگیش وەک هەورەبریسکە بێ مەیلی خۆی بەسەر دڵما ئەگرمێنێ تەنیا تەنیایی شک ئەبەم ڕزگارم کا لە جودایم ئاخ ....با هۆری خەم چەند بێ ویژدانە دروێنە ئەکا دارستانی سەرم لە بێزارییا خۆم ئەخۆمەوە کەسێک شک نابەم هانای بۆ بەرم سەری ساڵە...ئاه ...ساڵی نوێ منیش لە سوچێکەوە ئەڕوانمە ئەم گەردونە شعرم سەرگەردان لە جۆڵ و هەردێ تۆ بڕۆ بڕۆ ون بە لەبەر چاوم لە ئاسمانی شعری هەمیشە گریاوم ئەم شعرەشم پێشکەش بە خەم بە ئازار بە دڵێکی دەستەمۆ پێشکەش بێ بە هەموو دنیا جگە لە تۆ.