ساڵێكی نوی، ساڵێك مناڵی كاڵده‌كاته‌وه...
له‌دیسمبه‌ردا هه‌موو خه‌یاڵێك ده‌مباته‌وه،
سه‌ربازگه‌ی كۆتایی..
چۆن ئه‌و خه‌یاڵه بشارمه‌وه،
پێش ئه‌وه‌ی ده‌ست‌و په‌نجه‌كانم، خاڵی كا
له‌زریانی نزا، دڵم ده‌گه‌زێ..
تۆ سه‌یركه له‌باشووری وه‌رزه‌كانه‌وه،
چ مه‌حشه‌رێكه دیسمبه‌ر؟!
هێشتا سێو به‌فریكه‌یی قسه‌ی ده‌كرد،
كه‌چی نه‌رم، نه‌رم ده‌چوویه‌وه سه‌ر،
گوناحێكی سور‌وسپی!
پرته‌قاڵ به‌پێكه‌نینه‌وه مزر بوونی،
خۆی ده‌گێڕایه‌وه،
كه‌چی ورد، ورد ده‌چویه‌وه سه‌ر حوزنی حه‌بیبه...
گێلاس به‌كوڵمی سوره‌وه ده‌گه‌ڕا،
كه‌چی كه‌م، كه‌م ده‌چوویه‌وه ناو
ده‌هلیزه‌كانی ده‌م‌ودان...
هه‌رمێ به‌گرفتی زه‌ردبوونه‌وه،
ئاخی هه‌ڵده‌كێشا،
كه‌چی ده‌م، ده‌م ده‌چوویه‌وه ناو په‌راسووه‌كانی حه‌وا
ترێ له‌به‌رسیله‌وه پیاده ده‌بوو بۆ پێگه‌یشتن،
كه‌چی هێشوو، هێشوو،
ده‌بووه زیندانی كوپه‌ڵه..!!
له‌دیسمبه‌ردا حه‌زێك هه‌یه كۆتایی
(با) هات‌و چرپه‌یه‌كی له‌ده‌ست كه‌وت و ووتی:-
حه‌زم له‌ڕنینه‌وه‌یه، سه‌ری سنه‌وبه‌ر،
له‌سه‌رپۆشی هه‌ور فڕی ده‌م...
باران هات‌و له‌دوگمه‌ی دڵۆپێكیدا،
وتی:- حه‌زم له‌ڕوتبوونه‌وه‌یه،
له‌ستیانی خاكدا گازێك بگرم،
چه‌تر هات‌و ووتی:-
ئیكمال ده‌بم به‌دیسمبه‌ر
پێكه‌نینم درێژبووه وه ئه‌م ده‌س له‌دیواره،
چۆن هه‌ڵكه‌م؟؟
خۆر هات‌و وتی:- له‌م ئه‌زمونی
دیسمبه‌ره‌دا ده‌رناچم،
له‌دێڕی گزنگێكدا،
به‌یانی چۆن هه‌ڵگرم، له‌توحفه‌ی ماچێكدا..!!
زه‌رده‌په‌ڕ هات‌و وتی:- به‌م هه‌موو ئاوابوونه‌وه،
حه‌زێكم نییه نه‌چێته‌وه سه‌ر پیری..
دیسمبه‌ر چی نه‌كرد،
ساڵی نوێ مانای چی؟!
وه‌ی له‌ڕۆحم، به‌م ئاوابوونه‌وه به‌رده‌بمه‌وه..
نام په‌رژێ نامه‌یه‌ك بۆ دڵی شه‌وبنووسم،
باوه‌ڕ نه‌هێنی به‌دڵی یه‌ڵدا....!!
* * *
ده‌خیلتم دیسمبه‌ر ئه‌م هه‌موو ته‌رزه‌ی بیره‌وه‌ریانه
بۆ له‌كۆتایی تۆدا ده‌بارێن‌و
ده‌گه‌نه كونجی قه‌ناعه‌ت...
ته‌ماشاكه مناڵی له‌كانوونی حه‌وته‌وه دێت،
كه‌دێت ده‌ماری شه‌قامێك له‌پێیه‌كانیدا،
مێروله ده‌كا،
كه ده‌گاته تۆشتێك نییه ناوی پیاده بێ...
گوڵ له‌ئینجانه‌دا ئاوه‌دانی ته‌ڕده‌كا،
كه ده‌گاته تۆ ئینجانه ده‌بێته تابووتێك!
جۆلانه له‌كاتی فڕینا چاوی لێ دائه‌گرێ
كه ده‌گاته حزووری تۆ،
له‌باخچه‌ی ئاسماندا به‌تاڵه له كۆمه‌ڵه‌ی فادا...
مه‌ساسه به‌زمانی لوسه‌وه، پێكه‌نین ده‌باته‌وه
چاوه‌كانی.. كه‌ده‌گاته حه‌قیقه‌تی تۆ
زمانێ نییه له‌ته‌رجه‌مه‌ی پێكه‌نین بگا...
مناڵی له‌كانوونی حه‌وته‌مه‌وه دێت...
به‌ڵام كه له‌ڕوانینی كتێبێكدا مه‌ته‌ڵی عیشقی زانی
ئه‌وه سه‌ره‌تای كانوونی حه‌وته‌مه،
به‌ره‌و قاقای دیسمبه‌ر
له‌دڵی دیوارێكا چاوشاركێی بینی،
ئه‌وه دوا خشتی كانوونی شه‌شه‌مه،
له‌ڕۆحیانه‌تی ڕووخان...
له‌گۆمێكا گۆره‌ویه‌كانی مانگی دی...
ئه‌وه دوا ماچی كانوونی پێنجه‌مه،
له‌مه‌رقه‌دی لێوه‌كان...
له‌كێلۆنی ده‌رگایه‌كدا، كلیل كرانه‌وه‌ی پێ ناساند
ئه‌وه داخستنی كانوونی چواره‌مه
به‌ڕووی پیری...!
له‌ناو پشتێنی پایزێكدا،
قژی ئاڵۆزكاوی ئینجانه‌ی بینی،
ئه‌وه قه‌ده‌ری كانوونی سێیه‌مه، قیامه‌تێكه گریان!
له‌ناو فه‌رشی ده‌شتاییه‌كدا، ڕه‌نگی ناسی
ئه‌وه دابڕانی كۆی كانوونه‌كانه،
له‌هۆزی گیا...
له‌ناو حه‌شامه‌تێك شه‌ودا، كه ڕوانی
تاریكی ده‌كه‌وێت به‌ده‌مدا
ئه‌وه باجی كانوونی حه‌وته‌مه،
له‌سه‌عات دوانزه‌دا...
* * *
مناڵی له‌كانوونی حه‌وته‌مه‌وه دێت...
هه‌موو مانگێك نوقڵی بیره‌وه‌ری،
ده‌خسته گیرفانی،
به‌ڵام كه دیسمبه‌ر هات...
(با) نامه‌كانی گوڵی دڕاند...
فڕین له‌باڵه‌كانی جۆلانه‌دا كوژایه‌وه....
جیلوه‌ی عیشق به‌جێماو
ته‌مه‌نی كتێب زه‌ردهه‌ڵگه‌ڕا...
دڵی دیوار به‌شه‌پۆلی په‌یژه‌وه،
هه‌ناسه سوار...
چاوی گۆم تفی كرده گۆره‌وییه‌كانی مانگ...
قفڵ به‌ژه‌نگه‌وه، گه‌نجی ده‌رگای ته‌كاند...
ساڵی نوێ دێت، ساڵێك مناڵی كاڵده‌كاته‌وه،
سه‌خته مناڵی به‌جێهێشتن ئه‌ی دیسمبه‌ر
سه‌خت وه‌ك قسه خۆڵه‌مێشه‌كانی به‌رد،
كپ له‌ئازاره‌كانی...
سه‌خت وه‌ك قه‌مبور بوونی ئێواره،
هه‌ر گۆچانه ده‌بێته هه‌میشه سه‌فه‌ری...
سه‌خت وه‌ك وێرانی بوونی خۆم،
حوزن گرێم ئه‌داو دڵه ڕاوكێ،
به به‌رۆكی تاڵی قژه‌كانمه‌وه ته‌سریحه‌ی گریان‌و
دوودڵی له‌ماڵی ئه‌ندێشه‌دا،
سه‌ودای گه‌ڕان...!!
مه‌یه بۆلام ئه‌ی دیسمبه‌ر...
مشتێ ته‌مه‌نم به‌قه‌رز به‌رێ،
بۆ سه‌یركردنی هه‌نارێك،
كه قریوه‌ی درزی تێ ده‌كه‌وێ،
پڕ له نوكته‌ی سور‌و
پێستی له‌قوڵپی ئاره‌زوو..
مه‌یه بۆلام پێكێك تێڕامانم به‌رێ
با جوانی له‌درزی ئاوه‌ڵناوه‌وه،
چاوبڕكێ بكا...
كه عیرفانێك عاریفانه پێم ده‌ڵێ:-
(رۆژ) تۆ له‌نه‌سلی بارانێكی شینی
له‌ڕه‌چه‌ڵه‌كدا، ده‌چێته‌وه سه‌ر كه‌ناری...!!
عیرفان.... من مناڵانه ده‌گه‌م له‌ژیان
له‌وێوه هه‌نگاوه‌كانم كۆ ده‌كه‌مه‌وه،
كه گۆزه‌یه‌ك به‌كانیه‌كی وتووه:-
دڵی مانگ وا به‌كه‌مه‌ری مه‌غریبته‌وه
مه‌ترسه له‌چاڵ‌و چۆڵی شه‌و
له‌قافیه قه‌به‌كانی تاریكی..
عیرفان... من مناڵانه زه‌نگیانه‌ی
زه‌رده‌خه‌نه ڕۆده‌كه‌مه قۆپچه‌ی
تنۆكێك ئه‌سرین،
مه‌رگ له‌كراسی ژیاندا،
به‌تۆخی ڕه‌نگم ده‌كا...!!
ئه‌ی هه‌موو عاریفه‌كانی دونیا،
به‌دیسه‌مبه‌ر بڵێن:نه‌یه‌ت بۆ لام,
كه‌هات به‌ره به‌ره مناڵیم كاڵ ده‌بێته‌وه
ڕۆژ هه‌ڵه‌بجه‌یی
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )