غەمزەدەی خۆتم نیشانەی تیری موژگانم مەکە
عاشقی رووتم عەزیزم تیرەبارانم مەکە
بەس دڵم بشکێنە بەم ئەبرۆیە بۆ ماچی دەمت
بمدە بەر تیغ و لە سەر هیچێ لە گریانم مەکە
چیم لە ئەبرۆت داوە، من پابەندی زولفم لێم‌گەڕێ
کافری عیشقم، بە قیبلەی خۆت موسوڵمانم مەکە
عاشقی خەندەێکی تۆم با بەس بە ئا‌ه و ناڵە بم
بوڵبوڵم، پەروانە نیم، حەز لە سوتانم مەکە
دڵ بە من ناکا لە بەر ئاوری دەروونم دێتە جۆش
تۆ کە سووتانت نەدیوە مەنعی گریانم مەکە
مەمدە بەر تابووی موژگانت هەتاکوو غەمزە بێ
ها بە جارێك بمکوژە، یەخسیری تورکانم مەکە
سەد کەرەت کوژراوی یار بم، لێم مەپرسە ئەی تەبیب!
دەردی یارم خۆشترە، بێهوودە دەرمانم مەکە
عەرزەچی نی تۆ، بەقوربان، پادشاهی عالەمی
دادی مەزڵوومان بپرسە، حەیفە بێدادیی مەکە
پێم بڵێ: یاقووت و رێحان خەتتی کامیان خۆشترە؟
وا عەیارە چاوەکانی، لەعلی خەندانم مەکە
حەقیەتی بەو چاوە کاڵانە کە تاڵانم دەکا
تیفلی نادانم لەسەر ماچێك لە گریانم مەکە
پەنجەکەی پاکی لەسەر خوێنی وەفایی بۆتە گوڵ
دەمکوژێ و پێشم دەڵێ ئالوودە دامانم مەکە
وه فایی
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )