دوێنێ لەقەراغ چۆمێکی
وەڕێ کەوتووی دووندی قەندیل
لە بناری ئاسۆی سوورا
دوو سوێسنی چاو بەفرمێسک
بە دەم سۆزی
شمشاڵێکی شارەزوورا
دەگەڵ قاسپەی
کەوی تینووی سەرسنوورا
پرسەی خەمێکیان دەگێڕا
سنەوبەرێ ئەیوت خۆم دیم
شاعیرێ گڕووی کۆچی بوو
بێ کەسێ تەرمی خۆی دەناشت
چنگی لە خاکا گرتبوو
رووبار ئەیوت
باشە ئیستە
من قەڵەمی
کامە شاعیرێ بڕفێنم
تاسەی ئەو خەمە چۆن دەکرێ
بەسیروانی ڕاگەیەنم
چۆن فڕینی
پەپولەی هەست
لەو دەربەندە بترازێنم
هەنگ لەبەر دەم
خەڵفێکی ماتەمینەوە
ئەیوت لە شیلەی
کام شێعری
گوڵی کێوی
تامی دڵداری بستێنم
ئیستە من چۆن
لەسەر شاهۆ
مۆمی هەنراوەی کۆست کەوتوو
داگیرسێنم
ئەو گریانە
چۆن بە خەمێکی کاڵ بۆوە
بناسێنم
ئەو باڵندە سەربزێوە
چۆن بوو لێرە ئارامی گرت
چوو بەرەو بیرە خەوێکی پڕگوڵاوو
بەرامەی لە زۆزانەوە تا پێدەشتی
ئارانی گرت
شوانێ بەتەمایی پشکۆیەک
لەهۆنراوە
بۆداگیرسانی ئاگری سەر دوندی شاخ
لاوی ئاشق بۆ چنینی دووگوڵەباخ
حەیرانێکی کۆک وپۆشتە
شەوانە دێو
سەردانی مالانی سەوزی
سلیمانیە وسابڵاغ دەکا
شەو درەنگە
شەو درەنگەو
مۆمە شێعرێ
واگرەکەی دێتە کز بوون
شەوی تەمەن
دەڵێی دەگەڵ
جگەرەیەکی داگیرساو
لەو دەربەندە بێ هەناوە
ملەیانە بۆ تێپەڕ بوون
کاتی لاواندنەوەی خاکو
دڵدانەوەی خۆرە تاوە
دارو بەردوو خاک و قەڵم
هەموو چاویان پڕ لە ئاوە
پۆلێ خۆزگەی دوایین نەفەس
بوونە کۆترە شینکەی فڕیو
بوون بە شێعری
شێرکۆ بێ کەس
ویرایش توسط fatemiii : 08-31-2013 در ساعت 09:25 AM
|