[behnam5555]

م.اخوان ثالث
و: ناسری حه‌قیقی

زستان

سڵاوم کرد و که‌س نه‌یسانده‌وه‌ جارێ سڵاوی من

هه‌موو سه‌ر چوونه‌وه‌ ناوخۆ

مه‌وێسته‌ بۆ وڵام

بێهووده‌ وه‌ستانه

که‌سێ سه‌ر به‌رزه‌وه‌ناکا وڵامێ داته‌وه‌ و چاوێ له‌ یاران کا

هه‌موو که‌س هه‌ر ده‌بینێ پێشی پێی و هیچی تر چونکه‌

خلیسک و رژد و هه‌ڵدێره‌ رچه‌

تاریک وتوومانه‌

ئه‌گه‌ر ویستت له‌گه‌ڵ دۆستێ ده‌سێ لێک ده‌یته‌وه‌ جارێ

به‌نابه‌دڵی له‌ نێو باخه‌ڵ ده‌ری دێنێ ده‌سی گه‌رمی

هه‌وا چونکێ گه‌لێ سارده‌ و سه‌هۆڵ به‌ندانی زستانه

هه‌ناسه‌ت هه‌ر له‌ نێوته‌ندووری سینه‌ت هاته‌ده‌ر

هه‌ورێکی تاریکه‌

له‌به‌ر چاوت وه‌کوو دیوار

نه‌فه‌س وابێ؟

چ سه‌یر وچه‌وته‌چاوه‌ڕوان بی گه‌ر

له‌م خزم و دۆستانه‌

مه‌سیحای مه‌رد و ره‌ندم ئه‌ی فه‌له‌ی پیر و په‌نای مه‌ستان

هه‌وا سارده‌ و ئه‌من سه‌خڵه‌ت

له‌شت ساغ و سه‌رت خۆش بێ

ده‌تۆ جوابم ده‌وه‌ و ده‌رکه‌م له‌بۆ باوێژه‌ سه‌ر پشتان!

منم میوانه‌که‌ی هه‌رشه‌و له‌کۆڵم کۆڵێ ناڵه‌ و خه‌م

منم به‌ردی له‌ جێ هه‌ڵکه‌ندراو سووک و چرووک و که‌م

جنێوی پیس و په‌ستی بوون و ده‌نگی شیوه‌ن و ماته‌م

نه‌ ئه‌ز رۆمم ،نه‌ ئه‌ز زه‌نگم

ئه‌من بێ ره‌نگی بێ ره‌نگم

ده‌جا هه‌سته‌ و وه‌ره‌ و ده‌رکه‌ی وه‌که‌

دڵته‌نگی دڵته‌نگم

وه‌ره‌ و ده‌رکه‌ی وه‌که‌

میوانه‌که‌ی جاران له‌ پشت ده‌رگایه‌ وێستاوه‌

ده‌له‌رزێ عه‌ینی مێژۆکه‌

کڕێوه‌ی چی و ته‌رزه‌ی چێ

ئه‌گه‌ر گوێت لێ ده‌بێ ده‌نگێ

ئه‌وا چیرۆکی سه‌رمایه‌ و ددانه‌

چه‌شنی چیرۆکه‌

ئه‌من هاتووم حیسابی خۆم له‌گه‌ڵ تۆ پا بکه‌م ئه‌وشۆ

حیسابی کۆن و زووی خۆمت له‌گه‌ڵ یه‌ک لا بکه‌م ئه‌وشۆ

ده‌ڵێی چی تۆ که‌ بێ وه‌خته‌ و دره‌نگه‌ و کاتی هه‌ستانه‌

فریوت خواردووه‌ خاڵه‌!

ئه‌مه‌ی دیتت نه‌ سووریی ئاسمانه‌ کاتی کازێوه‌

که‌ گوێ یه‌ و تۆف و سه‌رمای تێ چزیوه‌، ره‌ق بووه،‌ ئاڵه

ئه‌مه‌م لا یادگاری سه‌خڵه‌ت و سه‌رمای زستانه‌

وه‌ زه‌ق و به‌رقی دنیای بێ به‌قا و به‌رته‌نگ و بێ ئامان

به‌ زیندوو یا به‌ مردوویی

له‌ تابووتی ره‌ش و ئه‌ستوور و توێ توێی مردنا

ئاوێته‌یه‌ و شاراو

بڕۆ لاده‌ ، بڕۆ هه‌ڵکه‌ چرای باده‌

که‌ شه‌و یا رۆژ چ فه‌ڕقێکی نیه‌ و

هه‌ردووکی یه‌کسانه‌

سڵاوم کرد و که‌س نه‌یسانده‌وه‌ جوابی سڵاوی من

هه‌وا دڵگیر و خه‌مناکه‌

ده‌رک گاڵه‌ و سه‌ریش ئاودیوی ناولاکه‌

نه‌فه‌س هه‌ور و هه‌ور تاریک و باغه‌ڵ

تاقه‌ جێگه‌ی گه‌رمی ده‌ستانه‌

دڵان غه‌مگین و ماندوو

ئیسکلێتی داره‌کانیش جلکی بللووره‌ له‌ به‌ریانه‌

زه‌وی دڵمردووه‌ و

ئه‌ستونده‌کی تاوڵی سه‌ما خاپوور

ونن مانگ و تریفه‌ی دڵڕفێن‌

خۆر و گزینگ و نوور

ته‌پ و مژ لایه‌که‌ و هه‌ور و هه‌ڵا له‌ولاوه‌

زستانه‌.