تۆ نامری...
-وەرن دانیشن ! هەموو بێدەنگ بن!
دەستی درێژ كرد و دەنگی تلویزیۆنەكەی تا ئەو جێگایەی كه كرا زیاد كرد. هەموو ئاوڕمان داوه و تەواو سرنجمان كەوتەسەر بەرنامەكە. تۆش هەروەتر.
ئەوەی دەمان دیت پیاوێكی چوارشانەی بەهەیبەت بوو بەڵام رەنگ بزركاو و بەپەرۆش كه بەوپەڕی ترس و دوورەپەرێزییەوه دەیڕوانییە دەورو بەری خۆی . دیار بوو تازەی ردێن تاشیبوو لیباسێكی خاوێنی لەبەردابوو و دەگەڵ وەی كه دوو كەوس بن پیلییان گرتبوو لاقی لە هەردی دەخشا و تەنانەت هەڵەنگووت و دوو كەسەكه خێرا گرتییانەوه. ئەم شوێنەی كه ئەوییان لێڕاگرت چواردیوارێكی سەرداپۆشراوی پارێزراو بوو كه جگە له خۆی و ئەو دووكەسەی سەر و چاوییان داپۆشیبوو ، كەسێكی تریشی لێبوو كه ئەویش خەریكبوو حوكمی سەزای له سێدارەدانەكەی بۆ دەخوێندەوه. لێوی ئیشك هەڵاتبوو و بە ئاشكرا دەلەرزی و چاوی لەو چوارپایە بڕیبوو كه بڕیاڕ بوو دوامین هەناسەی لە سەر ئەو هەڵكێشێ، نەی دەوێرا سەر هەڵبڕی و چاو لەو تەنافه گرێدراوەش بكا كه دوا بەدوای تەواوبوونی حوكمەكەی لە ملی دەكرا و دەیخنكاند، ئەتۆش هەر وابووی رەنگت زەرد هەڵگەڕابوو و حەولت دەدا به چۆڕەئاوێك گەرووی ئیشكت تەڕ كەیەوه تۆش چاوت له چوارپایەكە بڕیبوو و ئاگات لە دەور و بەری خۆت نەبوو ت تەنانەت نەتدەزانی حوكمەكەش باسی چ دەكا .
-چاوی لێكەن ئەوە دەیبەنه سەر چوارپایەكه! ئەوەتا تەمەشای كەن!
پشووت سوار ببوو و چركە بە چركه هەموو ئاكارەكانی ئەوت له ژێر چاودابوو، بەرووناكی شوشتەی تلویزیۆنەكە چاوی تۆش رووناك داگیرسا دیار بوو چی وا له و چاتر نی! هەموو دانیشتبووین و تۆ وەك هەمیشە بەپێوە بووی.
-ئەوە هەر ئەو رۆژەیە هەموو چاوەڕوانیمان دەكرد!
-ئەی مەڵعوون!
-سەد جاریش له دار درێ هەركەمه! جا توخوا ئەم مردنه بۆ ئەم ناپیاوه كەم نییه؟
-ئاخ ئەگەر دەیاندا دەست من دەمزانی چم دەكرد!
-چت دەكرد؟
-پەتكێكم له ملی دەكرد و دەستەكانیم دەبەستەوه و وەك سەگ بەڕەڵام دەكرد بۆ بەر دەستی ئەم خەڵكه چارەڕەشه!
-ناوەڵڵه ئاواش حەیفه ، له شیشەیەكی دەگرم لەو جێگایەی پەیكەرەكەی خۆیان لێهێنا خوارێ دایدەنێم تا ببێتە گەورەترین شوێنی توریستی جیهان و هەموو دەرسی عیبرەتی لێوەربگرن!
-دا بێدەنگ هەموو !
دەگەڵ وە كه پەتكی سێدارەكەیان خستە ئەستۆی و له سەر چوارپایەكە رایان گرت هەموو بێدەنگ بووین تەنانەت ئامۆژنم به كەشەفه چایەكەوه له جێی خۆی ویشك ببوو.
پەرۆیەكی رەشییان بەسەر چاویدا هەڵكێشا، بە ئاشكرا دەلەرزی، دەیزانی لەوكاتەدا هەموو جیهان تەمای له سەر كوشتنی ئەوه و له نێو میلیۆنها مرۆڤ دا هیچ دەستێك بۆ فریا كەوتنی نایگاتێ. چەشنێك نائومێدێكی مەرگاوی بە هەیبەتی داچەمیویدا دیار بوو...هەردوابەدوای خوێندنەوەی حوكمەكەی پاڵێكییان بەچوار پێیەكەی بن لاقییەوه نا! سێ چوار پەلەقاژه و ئیتر هەموو شت هەروا بە سووك و ئاسانی كۆتایی پێهات...لە پڕ بەرنامەكە گۆڕا و بە دەیان و سەدان فش فشه له حوای كران و ئاهەنگی شادی و هەڵپەركێی جەماوەرێكی بێئەژمار هاته كایه...
-ئەو شیرنییەی بێنه بازارمان شیرن كەین!
بوو بەهەراهەرا دەست لێكدانەوه و پیرۆزبایی لە یەكتر. كچە چكۆلەكەم كه مێشكی هێشتا ئەم خۆشی و ناخۆشییەی بۆ لە پەنا یەك خڕ نەببۆوه بە سەرسامییەوه خۆی له باوەشم هاویشت.
ئەتۆم دیت كه دەستت برد بۆ شیرنی ، مامم یان واچاتره بڵێم زڕبابت، بە تەسحێبه درشتەكەی یەكی وای له دەستت ڕاكێشا كه وەك فەنەر دەستت گەڕاوه پشتەوه، هەموو خەریكی شیرنی خواردن بوون و تۆ دەستی ڕەش و شین هەڵگەڕاوت دادەماڵی، تەنیا دایكت لە تاوی تۆ دمی له شیرنی نەدا...زڕبابت هەموو جارێ شیرنێكی بە خڕوە لە زاری دەنا و چا كوڵیوەكەی بەسەردادەكرد، وەك گەرووی تەنەكە بێ وابوو. قامكە ئەستوورەكانی چی وانەمابوو ئیستیكانە ناسكەكەی گەڵامێو له دەستیدا ورد كا:
-خێرا بە ملت بشكێنه ئەو چایەش تێكەوه!
دەنگی قاقا و پێكەنینیان تێكەڵاوی بەزم و رەزمی بەرنامەی ئەوبەری شیشەی تلویزیۆنەكە ببوو و تۆش بەپەله پڕت دا ئیستكانەكە و هەڵاتییە دەرێ. ئاگام لێبوو هەر دەڕۆیشتی و ئاوڕت دەداوه ئەگەر چی زڕبابت بەدواتەوه نەبوو بەڵام سێبەری پڕهەڕەشەی ئەوت لەسەر خۆتدا هەست پێدەكرد بۆیە زۆر بە توندی هەڵەنگووتی و بەربوویەوه...
كتێبی «خەباتی من»بە دەستمەوه هەرچی دەكەم تەواو نابێ قەت وانەبووه ، گەورەترین رۆمان‌كانیش ئەوەنده بەدەستمەوه نەماونەتەوه ، جۆریك قورساییم لەسەر دەكا و دەڵێی لە نوسینەوەی ئەودا منیش وەك هەزاران كەسیتر تاوانبارم، رێك لەو جێگایەدا ماومەتەوه كه باسی كێشانەوەی تابڵۆكانی قارەمانی كتێبەكە‌یه مرۆڤێكی هەستیار كه جگه له تێكەڵاوكردنی رەنگەكان بە سەر جوانترین وێنەكان بیر له هیچشتێكی تر ناكاتەوه بەڵام زڕ باب و برسییەتی دەستێك بوو بەلاو‌ه دەهات و هەموو ئەم رەنگانەی لێدەشێواندو ئیتر رەنگەكانی بۆ لێك نەدەكراوه له دوایی دا دوامین تابڵۆی كێشاوه كه تەنیا یەك رەنگ بوو ئەویش ڕەش ڕەش و بە گەورەیی هەموو جیهان ، ئیمزای بن تابڵۆكەش جەنازەی خۆی بوو كه بەدەستی خۆی گوللەیەكی له سەری دابوو...ئەوە دوامین شتێك بوو كه لە كتێبەكەم له بیر مابوو...
ئەو رۆژەم هەر لەبیره كه تۆ بە تووڕەیی ڕۆیشتی ، دایكت پێی گوتبووی پیاو ناگری بەڵام باسی دەرەنجامی تووڕەیی بۆ نەكردبووی و ئەوە كه كاتێك مرۆڤ بۆ هیچ كەس و هیچ شتێك گریانی نەهات چ دەقەومێ؟ ماوەیەك ونم كردی و ئەوان تۆیان دۆزییەوه كه ئەم تووڕە بوونەی تۆ بەكارییان دەهات ، تۆ له بێدەسەڵاتی دەترسای و ئەوان دەسەڵاتییان پێدەبخشی دەگەڵ هەموو ئەوانەشدا هەر دەترسای و دەگەڵ وەی كه بە سەدان رەنگییان شیرنی رەنگاورەنگ له پێشدانابووی دەستت بۆ نەدەبردن و ئەم ترسەی بۆدوامین جار له چاوەكانتدا دیتم هەر دەگەڵت بوون و ... من دوایی بەسەرهاتی تۆم له «كۆماری پڕمەترسی»دا خوێندەوه بڕوابكه باوەڕم بە چاوەكانم نەدەكردن و نەمتوانی ئەوفیلمانەش بەتەواوی چاو لێكەم كه باسی سەر بڕین و چۆنییەتی كوشتنی بە هەزاران مرۆڤ بوو...بەڵام هەموو جارێ ئەو رۆژەم وەبیر دەهاتەوه كه دەگەڵ وەی كه دمت له شیرنی نەدابوو دم و ددانت له خوێندا سوور هەڵگەڕابوون و له كاتێكدا هەموو پێدەكەنین تۆ بەبێدەنگێك دەگریای من هەر ئەو رۆژە بوو كه دوو باڵندەی خۆشەویستیم دیت له سەرت هاتنه دەرێ و بۆ هەمیشه هەڵفڕین و بەجێیان هێشتی...
و سەرەنجاملەو بەری شوشەی تلویزیۆنەكە دەم دیتی كه میلیۆنها مرۆڤ چاوەروانی له سێدارەدانت بوون و دەتزانی كه لەو كاتەدا هەموو جیهان تەمای لەسەر كوشتنی تۆیه و هیچ دەستێك بۆ فریا كەوتنت ناتگاتێ، بۆ ئەوەی ئێمه كەمتەر خەمییەكانی خۆمان و ئەوانیش ئاكار و تاوانەكانی خۆیان له پشت تەرمی هەڵواسراوی تۆ حەشار دەین و بڵێن تاوانبار تۆی و ئەوان و ئێمەش هەر ئەو دوو باڵندە سپییەی خۆشویستین كه رۆژێك له سەری تۆ هەڵفڕیبوون...بۆ ئەوەی هیچكەس بیر لەوە نەكاتەوه كه تۆ و هەزارانی وەك تۆ نامرن و هەر زیندوون چونكه هەر ئێستاش بە هەزاران منداڵی تر دەگەڵ وەی كه زارییان شیرن نەكردووه تووشی كێشە هاتوون و ئەوانەی بەرژەوەندییان له تووڕە بوونی ئەم منداڵانەدایه چاوەڕوانن لەم گێژاوە پڕمەترسییەدا بییان گرنەوه و ...
من دەزانم بۆ چی هەموویان گەمژانه پێدەكەنن؟ پێیان وایه تۆ مردووی و تۆش كه له پەنایەك ڕاوەستاوی دەزانی من بۆیه دەگریم كه دەزانم تۆ نامری و هەر زیندووی.
مریه‌م قازی ــ مه‌هاباد