برسی نسێ
ئه‌و ڕۆژه‌ی گریان له ده‌رگای دام پاره‌م نه‌بوو ئه‌سرین بکڕم
نیگام هه‌ڵخست باران وه‌یشوا
بۆ وه‌ی ده‌بێ ئاسمان ده‌ستم بگرێ
یا دڵۆپه هه‌ورێک نیسێیه ده کاسه‌مکوشێ
به خوا تینووی نسێم و ده‌ست ناگرمه‌وه
برسیه‌تی به‌ری پێم ده‌کوشێ و ده‌چاوانم‌دا سه‌ری خه‌ونی تێر ده‌شوا
له کۆڵانی خه‌ون ناده‌م ئه‌ستۆم راست ده‌گرم
له پڕ نمه‌ی گریان تێر برسیایه‌تی ده‌خۆم
پێکه‌نین له سه‌ر زگی برسی هه‌ڵناپه‌ڕێ و وه‌ڕه‌زی ده‌که‌م
ساباتێکش نییه ڕۆبێته داخوازم له ژه‌مێک پێکه‌نین میوانی کا
ئه‌وه‌ی هه‌مه نیازه و ئه‌وه‌ی نیشمه هه‌وره و باران و به‌هار
چیت لێ وه‌شارم گه‌لێ کۆڵه خه‌ونم له ژێر ئه‌سرین ماون
فریشک به سه‌ریان‌دا ڕووخاو هه‌می بردن
دڵخۆشییه‌که‌م چه‌ند ئاره‌زوو بوو ئه‌وانیش ده‌ستمیان نه‌کرده پرێسکه و میچ و بانیان
هه‌نوکه چاوم وه‌ستڕه‌وه چڵکی دووریان گرتووه
برسیایه‌تی هاری نه‌کردوون ده‌رمانێکیان بۆ بنووسه
برسیترم له‌وه‌ی نسێم هه‌بێ یا نسێیه بکڕم
پاروویه‌کم بۆ بنووسه له‌مێژه دیمه‌نێکی جوانم نه‌خواردووه
به خوا هار نیم جه‌م مردوویی ڕه‌نگی کردووم
خۆشت به نیشانی ده‌ستم ده‌زانی پاروو له به‌ری هه‌ڵات
کاکه چاوم خه‌ونێکیان هه‌ڵگرتووه چێشته‌که‌ی له‌مێژه نه‌کوڵیوه
ده‌رمانێکم ده‌یه با گلێنه‌ی سپی هه‌ڵگه‌ڕاوم بتوانێ ژه‌مێک کۆڵانی خه‌ون بکرێ
به خوا تینووم و ده‌ستم برسییه نایه‌ڵێ چ بخۆم
کاکه جاری پێشتر خه‌وێکت دامیه نیشانی زگمی نه‌زانی
له‌به‌ر ده‌ستم فێی گرت و له برسان مرد
جێیه‌ک نه‌بوو بینێژم ناچار کردمه پاروویه‌ک
چیم کردبا وه‌هام نه‌کردبا ده‌ستێکی سه‌نگه‌سار کراو
پێشی پێ ده‌گرت هێنده‌ی وه‌دوا ده‌که‌وت تا شل و کوت خه‌و ڕاوی ده‌کرد
ئه‌و چه‌ل یا له‌گه‌ڵ خۆی ده‌خست یا ژن‌به‌ژنه‌ی پێ ده‌کرد
خۆت ده‌زانی ئیمڕۆکه پارووی هه‌ڵوه‌ریو ناکه‌وێته سه‌ر کۆش
هه‌ر بۆ ئه‌م لاو ئه‌و ڵای ده‌خوشێ چاوی له‌وه‌یه له خوانێکی شایانه سوار بێ
نازانێ ده‌نگی ده‌هۆل زۆر له‌وه‌ی دوورتره بتوانێ
ژه‌مێک خۆشه‌ویستی دێم کا ببێته پاروویه‌ک بۆ چاوی ئه‌وینداری
تۆ خوا کاکه ده‌رمانێکم ده‌یه زگم پارووی خۆی بدۆشێ
ئیدی کاری به تێکوشینی دراوسێ نه‌بێ
بابه وه‌هام لێ هاتووه باوه‌ڕ به نسێی خۆناکه‌م
چوون ئه‌و تێره و له چاوی پیس به دوور چوار شانه‌یه
ئێستاکه‌ش خۆی لێ گۆ‌راوه وه‌پێشم ده‌که‌وێ
کاکه کارێکی بکه یا له به‌رم هه‌ستی یا بێ نسێ بم
ده‌نا خۆم ببمه نسێی ئه‌و که‌سه‌ی سه‌رده‌مایه‌ک
خۆشه‌ویستیه‌که‌ی دانار به داناری خه‌ون و ئاوازم پیاسه و کۆڵان بوو
کاکی بژیسک منت ده‌سه‌ر گه‌ڕێ
ده‌توانی نووشتوو‌یه‌کم بۆ بنووسی ده‌رمانه‌که‌ی بکڕم و تازه تێر خه‌و بم له خواردن.
ئه‌میر ئه‌سعه‌د خالیدی نه‌غه‌ده