/ دڵ پاكی زەوی
بێدەنگی منە
دیاری بە باران درا /
گرێپوچكەیەكی پێخواس
میراتی بابردووی چاوی دۆزەخینی منە
لە حەرامییەتی
بەهێیەكی نەفرەتی،
چ باران بارانێكە
نركەی دڵی من و
نۆشی پەشمینی با
بە شوێن پێی خوادا
لەم گەڕیانە نازی تنۆكەیەكی تەسك
دەخەمە داوی دەستەكانت
فەنتازییای سووتانی ڕوح و
گۆنای گونەهباری تۆ
لە نزایەكی خەڵوەت‌خواز لە ئەستۆی خوا...
دەمامكێكی سێ‌گۆشم
شەقڵی زەوی
تل دەخوا لە سیپارەی جەننەتی من‌دا
ڕاست كڕنۆشی شەو
شەو جازیبەی پێكەنینی پێڵاوەكانی وێرانییە
شاد لە ڕژیمی بێدەنگی و
زاڵی و پڕ و پووچی و
پ
پ
ئای دەوەرە وەرە
كێلگەی تاسەم
خوای من لە مانگ یاغییە
كردەوەی ڕوحی بێدەنگی منە
ساپۆڕتی هەراوی بەهێیەكی دەست‌پیس و
تەنكەی نیوەشەو دەكا
خوایە، دۆزەخ ماڵی منە
چەندم دەدین تاسە سەر
دەست بە هەزار و ڕەنگ بە خەسار
دەسا لە خیلقەتی تێمم
بنواڕە باران
با شەفاعەتی مەمكەكانی
لە ئامێزی تێل‌دڕوو
بپۆشن
با سیخوڕی كوانوویەكی دەست بە قرتماغەم بێ
برین نازێكی زەبوونە
لە من‌دا
كە تا دەوە‌ستم ڕوحی من و ماڵ‌وێرانەكەی دەشەكێ
من
ئەوە بایەكی نامۆیە
سێ‌بەندی زەوی و جەزری شۆفاری تۆ
دەخاتە ئەستۆی ختۆكەیەی سەوز
/ من لە تاوانی پەپوولە تێ‌ناگەم /
سەرمەستی خەساربوونی
گەڵاكانی حینجەت نیم
هەتاكوو باڵی بە سووتان فێر نەبێ
نافڕم
كراسێكی شین لە ڕەنگی دۆزەخ
كەرامەتی دەرگای بێ‌پاسەوانی خوایە
بە بەهێیەكی نازدار دەڵێم
ڕەنگت خۆش
ئەوە هەڵەی نەزمی تەنیایی
حەرامییەك بوو
تا بە نركەی باران و دڵی من
ناسەكنێ
قاقڕە لەززەتی باران-
دەوەرە وەرە
زەمەنی زەندەق‌چوو
ها ئەوە ڕوحی پێخواسی منە
بە دەستی با سپێردراوە
"ئەگەر كە سات بە سات دەیبرد بە تالان
فرسەق بە فرسەق"
من دۆزەخی نەفرەتی ماچ دەكەم
تا بەری بەیانی
دیوار تووڕەیی منە بەرانبەر بە خوا و هەرچی
قەدەری قات‌كراوی من و مانگە
ناسرەوم
بە گژی ڕێ و گەلاوێژ و پشووی خوا
تا تاریكستانی شەتاو
هەراسان
لە گێژاڤی هەناسەكان
پەردە ڕاو دەكەم
ئەوە مەرجی لە دایك‌بوونی منە
كە ڕوح لە بناری بزۆزی قات كرێ و
كەرامەتی ژێرەوەی سیفری من و
لەنجەی شەو
برۆنزەترین قامەتی هەتاو
واژۆ بكەن.
هەوار خزرزادە " شەڤگەش" ــ مه‌هاباد