له هه‌موو شوێنێكه سه‌ری من
سه‌رم ، له‌ناو مزراحێك ده‌سوڕێته‌وه
سه‌رم ، له‌ناو تۆپێكه و منداڵانی گه‌ڕه‌ك تێی هه‌ڵده‌ده‌ن
ده‌یخه‌نه ماڵی هاوسێیه‌ك
ئه‌ویش به‌چه‌قۆیه‌كه‌وه دێت و ،
سه‌رم فش ده‌كاته‌وه.
سه‌رم ،له‌ناو سه‌ماوه‌ره‌كه‌ی دایكمدایه و
قوڵپ
قوڵپ
قوڵپ
ده‌كوڵێ
سه‌رم ، له‌ناو سێ به سێی ته‌لاقه‌كانی باوكمدایه و ،
به‌زه‌ویدا ده‌كێشێ.
سه‌رم ، له‌ناو ئه‌و داره‌یه مامۆستا
له‌سه‌ره‌تای قۆناغی خوێندندا
به قونیدا ده‌كێشام.
سه‌رم ، له‌ناو سه‌ری، بووكه‌شووشه‌ی خوشكه بچووكه‌كه‌مدایه و
به‌دیواره‌كه‌یدا ده‌كێشێ
سه‌رم ، له‌ناو دڵی منداڵێكی برسیدایه
سه‌رم ، له‌ناو دڵی میوه‌یه‌كه ناوی نازانم
سه‌رم ، له‌ناو چاڵێكه هه‌زاران پیاو
ڕاوه‌ستاون ، خۆڵی به‌سه‌ردا ده‌كه‌ن .
سه‌رم له‌ناو سه‌به‌ته‌ی مێووژه‌كه‌ی مام زۆراب_ه و
كچێك شوێنی كه‌وتووه: مام زۆراب... مام زۆراب
مێووژم بده‌یێ.
سه‌رم ، له‌سه‌ر پشتی كیسه‌ڵێكه و ڕێ ده‌كا
سه‌رم ، له‌سه‌ر په‌ڕۆی سواڵكه‌رێكی پیره و ،
به‌یانی تا ئێواره سواڵ ده‌كا
كرێی ڕۆشتنه‌وه‌ی پێ نییه.
سه‌رم ، له ژێرپێی تۆدایه
هێواش ، هێواش ، ڕێ ببڕه
با نه‌فلیقێته‌وه
سه‌رم ، له‌به‌رده‌م مێروویه‌كى هه‌زارپێیه
هه‌زارپێی به‌سه‌رمدا ناوه
له‌سه‌ری مندا گۆدۆ هات
به‌دیارییه‌وه دانیشتووم تا بڕوات .
سه‌رم ، له‌ناو له‌پی قه‌ره‌جێكدایه ، ته‌ماشای ده‌كات
ده‌ست به‌كه‌پوویه‌وه ده‌گرێ و ، ده‌ڵێ :-
پیف..له‌و بۆنه پیسه!
سه‌ری تۆ..ئاهـــــ له‌سه‌ری تۆ
پڕیه‌تی له گوو.
سه‌رم ، له‌ناو فنجانێكی قاوه‌یه و
قاوه‌گره‌وه‌كه ده‌ڵێ:-
سه‌ری تۆ زۆركۆنه ، مێژووه‌كه‌ی بۆ هه‌زاران ساڵ ده‌گه‌ڕێته‌وه
له‌وه‌ته‌ی مرۆڤایه‌تی درووستبووه سه‌ری تۆ هه‌یه
ئاهــــ...له‌و هه‌مووشته!
جا چی تێدا نییه سه‌ری تۆ؟
پڕیه‌تی له ته‌په‌تۆر ، كـــا ، پووش و ، په‌ڵاش
وای چه‌ند سووكه سه‌ری تۆ!
چه‌ند خۆشه مرۆڤ ، سه‌ری سووك بێ وه‌ك تۆ!
سه‌رم له‌ناو دێڕێكی ڕامیارمه‌حمود_ه ده‌ڵێ:-
" به‌ڵێ هاوڕێ گیان
بێده‌نگانه به‌ته‌نیشت شپرزه‌بوونی منه‌وه
هاوڵاتیه‌كان هاتوچۆ ئه‌كه‌ن
وه‌ك ئه‌وه‌ی شپرزه‌بوونی من ڕه‌گی نه‌چێته‌وه سه‌رخه‌ته‌ر
من ناژیم له‌گه‌ڵ قه‌ڕنی ئه‌م قه‌ره‌باڵغیه ساخته‌یه‌دا. "
بسیت و ، دووساڵه دڵۆپێك باران له‌سه‌رمى نه‌داوه
ڕیقنه چۆله‌كه‌ى ئاسمان ، هه‌مووى به‌ر سه‌رى من ده‌كه‌وێ
سه‌رم ، خه‌ریكه ده‌مخوا
سه‌رم ، وه‌ك مرۆڤــ
وه‌ك ئه‌وه‌ى خۆم نه‌بم
پێده‌كه‌نێ و ،ده‌خه‌وێ و ،
ته‌ماشاى تیڤى ده‌كا و ،
گۆره‌وى له پێ ده‌كا.
سه‌رم ، جڕت لێده‌دا
سه‌رم ، ئینته‌لاى كردووه
سه‌رم ، هێنده هێڵنجى داوه
وه‌خته بیركردنه‌وه‌م بپسێ .
پاسۆردى سه‌رم لاى خه‌ڵك هه‌یه
ده‌یكه‌نه‌وه و لاقه‌ى ده‌كه‌ن .
سه‌ری من ، سه‌ری هه‌موومرۆڤێكه
سه‌ری من ، جه‌نگی هه‌ڵگیرساند
سه‌ری من ، مۆله‌ت نادا ئاشتی به‌رقه‌رار بێ
سه‌ری من ، كاره‌ساتی گه‌وره‌ی ئافراند
سه‌ری من ، یه‌كه‌مین گولله‌ی ته‌قاند
سه‌ری من ، یه‌كه‌مین خوێنی تكاند
سه‌رى من ، یه‌كه‌مین سێكسى كرد
سه‌رى من ، یه‌كه‌مین سێوى خوارد
سه‌ری من ، ساڵانێكه واده‌كا له كاتژمێرێكدا
دووسه‌د منداڵ ، له‌برسان بمرن
سه‌ری من ، یه‌كه‌م ئوتومبیلی ئاژووت و ، هه‌ریه‌كه‌م شتێكیش
به‌ژێر تایه‌كانییه‌وه كرد، سه‌ر بوو .
سه‌رى من ، سه‌رى خه‌ڵك ده‌شكێنێ
ئێواره دێنه سه‌رباوكم و
منش ئاگادار نیم !
سه‌رى من ، خۆى له‌سه‌رى خه‌ڵك ده‌گۆڕێت
سه‌رى من ، جار ، جار ، ده‌چێته سه‌ر به‌ده‌نى باوكم و
به بێ ئاگادارى منئاراسته‌ى ده‌كا.
به‌پێى نوێترین توێژینه‌وه
سه‌ر كردوویه‌تى و ،
له‌سه‌ر چه‌ند سه‌رێك ئه‌نجامداروه
ده‌ركه‌وتووه ،
سه‌ر ، گه‌وره‌ترین گرفته بۆ مرۆڤ
سه‌ر ، لاسارترین ئه‌ندامى له‌شه .
سه‌رم ، به‌جه‌سته‌مه‌وه خۆی ناگرێ
جه‌سته‌م ، به سه‌رم ، ڕازى نییه
چه‌ند سه‌رێكم به لاشه‌مه‌وه كرد بۆى نه‌بوو
یان زۆر بچووك بوو
یان زۆر گه‌وره بوو بوو .
ده‌بێ ، سه‌رمان فڕێبده‌ین
ده‌بێ ، شتێكی نوێ بدۆزینه‌وه ، تا له جێی سه‌رمانی دابنێین
ده‌بێ ، سه‌رمان له‌نێو زبڵدانێك بخه‌ین و ،
دواتر بیسووتێنین.
سه‌رم ، بێ ڕه‌وشت بووه
به‌ده‌م پشیله‌كانى كۆلآنه‌وه بۆم ده‌هێننه‌وه
بێ پرسى من بۆ هه‌موو شوێن ده‌ڕوات.
سه‌رم ، له‌ناو سندقێك كرد و ، فڕێمدایه ناو زه‌ریا
سه‌رم ، له‌ناو قوماتێككرد و ، له‌به‌رده‌م مزگه‌وتێك دامنا
كه‌س هه‌ڵى نه‌گرته‌وه
سه‌رم ، له‌ناو هێلكه‌ی مریشكێك نا
پیسی كرد و ، هه‌ڵی نه‌هێنا
سه‌رم ، له‌ناو سینگی كچێك كرد
هێنده عه‌جول بوو تا ده‌ریكرد
سه‌رم ، له‌ناو به‌فرگری ماڵه‌وه كرد
تا بۆن نه‌كا و خراپ نه‌بێ
شوینێك نییه ، تاكوو سه‌رمی تێدا فڕێ بده‌م
شوینێك نییه ، سه‌رم له ئامێز بگرێ.
ئاشووبه‌كانی سه‌رم ده‌ژمێرم
ده‌گه‌مه پێش كۆتایی و ، ژماره‌كانیانم لێ تێك ده‌چێ
دیسان ، له سه‌رتاوه ده‌ست پێده‌كه‌مه‌وه
هه‌موو شتێ ، له‌سه‌ری مندا و
سه‌ری من ، له‌هه‌مووشوێنێكدا
جێگه‌یان نابێته‌وه .
سه‌رم ، قورس و ، لاشه‌م سووك بووه
جه‌سته‌م ، ده‌خه‌مه سه‌ر سه‌رم و ،
رێده‌كه‌م ، تا هێنده‌ى ده‌مگه‌ێنێته
شوێنێك و فڕێى ده‌ده‌م
سه‌رم ژماره‌ى چل و دووه
گه‌ر دۆزیتانه‌وه بۆم مه‌هێننه‌وه
نامه‌وێ .
هێمن عــوسمان عه‌بدوڵڵا ــ قه‌زای سه‌یدسادق
*/ له‌ژماره (6) ى گۆڤارى كۆنسێپت بڵاوبووه‌ته‌وه