من كتێبێكم ژنستان
من وورده قیژه یه‌كم له‌پشت عه‌زابه
كه‌سكه‌كانی
ئازاره‌وه چاوم هه‌ڵهێناوه..
كچی شه‌رعی ئازارێكم هه‌موو ڕه‌چه‌ڵه‌كم,
ده‌ڕواته‌وه سه‌ر پرچی په‌لكه ڕێحانه‌یه‌ك...
ده‌نووكی دڕك شلوێی كردووه‌‌و
قوڵپی دڕكه‌زی له‌باڵایا زیندانی ڕواندووه...
به‌چاوێكی كپ‌و به‌جیلوه‌یه‌كی كوتراوه‌وه
له‌درزی كۆڵانه‌كانی چاوه‌ڕوانیا
ده‌نووكی ئه‌ومه‌لانه,
له‌قسه‌كانی قه‌فه‌س به‌تاڵ ده‌كه‌مه‌وه
نه‌یانوێرا...له‌ژێر باشوری غه‌ریزه‌كانی ئاوه‌وه
زامی قژه‌گیایه‌كی په‌مه‌یی,
به‌جریوه ببه‌ستن‌و
به‌ناز‌و عیشوه‌وه سه‌ر له‌كۆماری,
ئه‌وكچه كه ئابانه بده‌ن
ماشۆشیانه له‌زه‌ته‌كانی پاكیزه‌ییان
ڕووخێنرا‌و
پایته‌ختی بێوه‌ژنیشیان,
به‌مه‌راسیمی تیرۆر ئاوه‌دان..
هه‌موو خه‌تای تۆ بوو ئه‌ی شه‌ڕ,
فێری قیژه‌ت كردم, لێنه‌گه‌ڕای
جوگرافیای ئه‌م ده‌ستانه‌م,
خه‌ریته‌یه‌ك ماچ بكا,
ئازار په‌ی پێنه‌بردبێ...خه‌تای تۆ بوو ئه‌ی شه‌ڕ,
له‌سه‌ر شانی قیژه‌یه‌كی‌كه‌نه‌فتا
گوزه‌یه‌كم بینی به‌گریان خۆی پێچابوو..
ئه‌وه حیكایه‌تی كانییه‌ك بوو,
به‌ده‌م مۆسیقای ئازاره‌وه ده‌ڵێ:-
پێش ئه‌وه‌ی شووبكه‌م به‌قه‌وزه‌ی جۆگه‌یه‌ك,
عاتیفه‌م چرچ‌ولۆچ بوو,
به‌ته‌ڵاقی ئه‌و په‌ڕه‌سێلكانه‌ی
هه‌ر بۆ ئه‌وه‌ی سه‌فه‌ربكه‌ن, سه‌فه‌ر
هه‌ر بۆ ئه‌وه‌ی كۆچ بكه‌ن, كۆچ
نیشتمانیان له‌جانتایه‌كی سه‌رئێشه,
هه‌ڕاج كردو..له‌په‌نا
دووبڕگه‌ی شه‌ره‌فیشا,
منیان كوشت.....!!
****
من قیژه‌ی ژنێكمله‌زه‌مه‌نی ڕشانه‌وه‌دام,
پشوویه‌كم نییه بۆ خۆشه‌ویستی...
شه‌وانه دڵی نیشتمانم پڕه له‌حوزنی كاڵ‌كال
ڕۆژانه قژی شانه‌ده‌كا.
به‌قیژه‌ی ترش‌وتاڵ.....
من كتێبێكم ژنستان..
ئاخی لاپه‌ڕه‌كانم تژییه له‌قیژه‌ی هه‌مه‌ڕه‌نگ
قیژه‌ی سپی ده‌ڵێ:- سه‌رپۆشی هه‌ورێكم بینیووه
له‌ژێر یا مه‌مكه په‌ناهه‌نده‌كانی خۆر,
له‌بری قریووه
گژوگیای گریانی گرتووه...
قیژه‌ی ڕه‌ش ده‌ڵێ:- شاڵی شه‌مێكم بینیووه
له‌باوه‌شی وه‌لییه‌كانی دیوارا
قیژه‌ی لێ وه‌ریووه‌‌و قه‌فه‌سی لێچنراوه....
قیژه‌ی سه‌وز ده‌ڵێ:- گسكێكی لاسارم بینیووه
پرخه‌ی پاكژی شه‌قامێك,
له‌چاوه‌كانیا ده‌دڕێنێ‌‌و
به‌ئیمزای ڕه‌شه‌باش,
چینه‌ده‌كا له‌باڵای دره‌ختێكا...
قیژه‌ی سور ده‌ڵێ:- كچێنی پشیله‌یه‌كم بینیووه
له‌ڕه‌حمی پیاڵه‌یه‌ك خوێندا,
ده‌چێته خه‌وی ئه‌به‌دیی‌‌و خنكاوه...
قیژه‌ی شین ده‌ڵێ:- نه‌وڕه‌سێكم بینیووه
تادوا گیانه‌ڵڵای سجود,
به‌عیشقی نوێژه‌كانی ده‌ریاوه,
ڕۆحی شینی له‌ناو له‌هجه‌كانی,
شه‌پۆلا جێهێڵاوه...
قیژه‌ی زه‌رد ده‌ڵێ:- ئێواره‌یه‌كم بینیووه
له‌قه‌هری مانگ خۆی كوشتووه,
له‌هاڕه‌ی ده‌سته‌هار‌و هاجه‌كانیشیه‌وه
خوێنی خۆر نشین,
له‌په‌نجه‌كانیا تكاوه....
****
ئه‌دره‌سی ئه‌م قیژانه ده‌ڕواته‌وه,
سه‌ر نه‌سلی ئینشایه‌ك
گڕوگاڵی ده‌رگایه‌ك نییه
به‌ووتاری قفڵ گۆش نه‌كرابێ..
گوڵدانی ماڵێك نییه,
خورپه‌ی چاوه‌ڕوانی تیایا چرۆی نه‌كردبێ..
ئاسمانی ده‌لاقه‌یه‌ك نییه,
بارانی ڕوئیاسه‌ر له‌ئینجانه‌یه‌كی پیر بدا...
پایپی شه‌معدانێك نییه,
به‌په‌روانه‌یه‌كی په‌ڕه‌وازه بڵێ:-
سكوت به‌سكوت كه‌سك‌وسوری عاتیفه,
قیژه‌یه كه‌له‌بار چووه....!!
قرچه‌ی ملوانكه‌یه‌ك نییه,
به‌گه‌ردنێكی چرچ بڵێ:-
سه‌ر خه‌وێك بشكێنه ئه‌زیزم
لۆچی ئازار ده‌سڕمه‌وه..
هارمۆنی گۆرانییه‌ك نییه,
به‌گمه‌ی كۆترێك بڵێ:- هێواش به‌هێواش
نۆته‌كانی سه‌فه‌ر له‌بیری نیشتماندا ده‌كوژێنمه‌وه...
نه‌شئه‌ی نیشتمانێك نییه,
به‌شه‌ڕبڵێ:- شه‌رم كه, شه‌رم
تازه دارشه‌قی چی؟!
من كه‌م ئه‌ندامناخه‌مه‌ڕۆحی ڕسته‌مه‌وه,
من شومكردووه به‌تاڵێك له‌پێكه‌نین...
****
ئه‌دره‌سی ئه‌م قیژانه ده‌ڕواته‌وه‌سه‌ر,
میزاجی جه‌نگه‌ڵێك
دیالۆگی به‌هارێك نییه,
هه‌تازمانی گه‌ڵا،
به‌پاسارییه‌ك بڵێ:- به‌یانیت سه‌وز هه‌ناسه‌كه‌م
وه‌ره به‌ده‌نووك له‌تابلۆكانی تیرۆر
ڕووت,ڕووتم كه‌ره‌وه‌‌و
له‌بناری قسه‌كانی فڕینتا
كات ژمێری قیژه قه‌فكه....
هێشتا به‌رچینه‌یه‌ك لۆژیك,
مشتێ ماچی سه‌وزه...
دانووستانی ئه‌لفابێتێك نییه,
به‌خه‌یاڵی جه‌نگه‌ڵ بڵێ:- قه‌سابخانه‌ی قیژه لوولكه‌‌و
عاشق به...
هێشتا عیشق له‌سنگی دوو داری ووشكا,
شنه‌شنی ستیانێكی سه‌وزه...
له‌جه‌نگه‌ڵا خوڕه‌یه‌كی سه‌وزنی‌یه,
سوره چه‌تاڵێك چنگی لێ گیرنه‌كردبێ
هه‌تا به‌پێیه‌كانی ئاو بڵێ:-
ئێواره‌یه‌كی سه‌وزتان سه‌وز
گه‌رهاتن...سكون,سكون
له‌هه‌نگاوه‌كانتانا بوه‌شێنن...
باسوهراب خه‌وببینێ:-
ئه‌وانه‌ی قیژه‌ی به‌رد ده‌گرنه په‌نجه‌ره‌كه‌ی
وابزانێ قاقای كچانه!
باگۆران ئارام بگرێ‌‌و تۆزێك سروشت,
له‌و قیژانه هه‌ڵكێشێ,
كه‌لیستی سه‌ربڕین,
ناو نووسی كردن...!!!
ڕۆژ هه‌ڵه‌بجه‌یی ــ سلێمانی