ته‌رزه‌نیگا

[behnam5555]

ته‌رزه‌نیگا

هه‌وری نیگا و ته‌رزه‌ی تماشات


ئه‌مباته‌وه‌بۆ ڕۆژانی بێ ئاوێنه‌ و بێ هه‌تاو و ...


تا ته‌رمی ته‌م به‌تامی تووتێمی تاسه‌م تێر بکه‌م و


سه‌ره‌نخوونی ژانێکی تر


له‌دایک بم


له‌سۆنگه‌ی سووری سروه‌یێ سه‌سه‌رایی و


له‌په‌نجه‌ی سڕ به‌ باڕه‌شی سله‌یمانی


تا یاد و یاد و یاد و یاد


تا ئالبۆمی پڕ له‌هیچ و هیچستانی ئه‌م هه‌رێمه‌


دێمه‌وه‌سه‌ر ته‌رزه‌ی تماشات


ها که‌هه‌ناسه‌و هه‌تاوی


ها که‌هه‌وریت و هه‌راوی


ها که‌هه‌رێم و هه‌ناوی


ئاوێنه‌که‌ی ناڕۆژانی بێ سنوورم


تا سنووری چاوه‌کانت


باوه‌شێ وێنه‌م له‌چاوه‌...


ئه‌رخه‌یانم


شووشه‌ی سنووری نێوانمان


ڕه‌شتر له‌هات و داهاتی


ته‌مترین مژی هیوایه‌


من له‌سۆنگه‌ی ژانێ پیرۆز


حه‌زێ مه‌ست و خرمانێ سۆز


کفنی ژینم ڕه‌پێچکی ئاسۆ کردووه


به‌ئاوازی لانه‌وازی ئه‌م شه‌رابه‌ ئه‌م سه‌رابه


نه‌غرۆ و یاخی


تا جه‌غزی گێژ


تا چه‌په‌ری په‌ڕانه‌وه‌ له‌خۆ بۆ خۆ


که‌ئه‌م ئاوێنه‌ ناژه‌نگێ و


ده‌نگێ له‌ناخی دڵمه‌وه


یا ڕۆحی هه‌رچی هه‌رچییه


هێزێک نا ...


وێنه‌یێ که‌ئێمه‌ بوونی پێ ئه‌ده‌ین و


به‌هاله‌یێ له‌هه‌ور و هه‌ردی دڵ


ده‌روون سه‌ما ده‌کا


خه‌مێکی گه‌ش به‌بۆنی عه‌تری مۆسیقا و ده‌ف و سه‌ما


له‌زێڕکفتی ده‌ریای حه‌ز و له شه‌وقی ساردی ئاوه‌وه‌


گه‌ڕامه‌وه‌


به‌تاڤگه‌و به‌هاژه‌وو به‌هاڕه‌وه‌


بۆ ناخی ئامانجی نه‌بوون


بۆ هه‌بوون و چوون و نه‌چوون


کاکه‌شانی سه‌وزی نیگات


چاوه‌کانم مه‌ست ئه‌کات


ئه‌بارێم و تنۆک تنۆک به‌ناخی خۆما ئه‌چمه‌خوار


له‌ئاوه‌زی حه‌زێکی ئاگرینه‌وه‌


ئه‌ستێره‌ی چاو ده‌دره‌وشا و چاویش لانکی ئه‌ستێره‌کان


به‌فه‌لسه‌فه‌ی هه‌ساره‌وو ته‌قینه‌وه‌و


گڕ و عه‌شق و هه‌بوو نه‌بوو


ته‌قڵه‌ی درگای ژین لێ درا و


جارێکی تر له‌قه‌تماغه‌ی برینێکی زۆر کێماوی


ئایه‌تێ تر هاته‌دنیا


من له‌کڵپه‌ی سوور هه‌نارێکه‌وه‌ گریام


به‌ماچی سێوێ پێکه‌نیم له‌ڕوومه‌تی ئاوی کانی


به‌پڕژه‌ی قه‌ڵبه‌زێ هه‌ژام


به‌قه‌وزه‌ی چاوێ هه‌ڵ خزام


که‌شللێره‌ی نه‌رمه‌قژ و سه‌مای شه‌پۆلی چه‌پکه‌یێ


ئێوارانه‌ تامی بارانی پێم ئه‌دا و من ئه‌گریام


تا خه‌وێکی خاو خه‌نده‌ی خه‌م


تا خرمانی خه‌رامانی و هه‌راسانیم


تا ده‌سکه‌نه‌ی بۆنێکی تر


له ڕه‌نگی شینی ئاسمان


ئه‌مه‌ستێنێ


دوو چاوی جوانی جوانی جوان‌


شازاده‌که‌ی به‌ری به‌یان


ئه‌ها ده‌سته‌قژی ئاسمان


تاڤگه‌ی گڕ و تین و ژیان


تامه‌زرۆیی ئه‌ستێره‌کان


ئه‌مێستا ئه‌بڵه‌ق و وڕماوی دوو چاوی ئه‌وێندارم


به‌بادی بازنه‌ی به‌زمێکی ڕه‌ندانه‌ بریندارم


هه‌ساره‌و مانگ و ئه‌ستێره‌ی کلکداریش ده‌خیلم بن


گوڕ و گێژ و گه‌مه‌ی ده‌ستی زه‌مانه‌و داری دیدارم


به‌هاژه‌ی چاوێکی پڕ له‌ مرواری


پرسیار و پرسیار و پرسی یار


له‌کۆچه‌وه‌تا سه‌فه‌ر


که‌گه‌ڕانه‌وه‌ کۆچ ئه‌کا به‌سه‌فه‌ر


جوانترین سه‌فه‌ر


له‌شه‌پۆلی چه‌مێکی چاو


بۆ که‌ناری خه‌وێ


که‌خیابان بێت و به‌فر بێت و


دارتێلی سه‌ر شه‌قام و بارانی به‌فر


وه‌من له‌ژێر چه‌تری تۆ


له‌چاوه‌کانمه‌وه‌


دێمه‌ هاوینترین هه‌ناسه‌ت


ته‌نیا سنوور شاشه‌یێک و هیچ هیچ هیچ


بابان وێران هه‌ناسه‌کانی ته‌نیاییم


که‌ساغ و بێ ده‌رد


له‌سه‌ر ته‌ختی خه‌سته‌خانه‌


خه‌م په‌نجه‌ره‌م و ته‌م چاوه‌کانم


خیابان چۆڵترین جێگای شانۆیێکی تاریکه‌


ئه‌کته‌ره‌کانی ئه‌ستێره‌ن


له‌سینگی ئاوی به‌جێماو له‌ناو جۆگه‌کان و


نووری لێڵ له‌ نشێوی ناڕێکی شه‌قام


ئه‌بێته‌ سه‌هۆڵێکی تیشکاوی


له‌ژوورێکه‌وه‌ سه‌یر ئه‌که‌م


که‌نازانم له‌کام په‌ڕه‌ی مێژووی ئه‌م شه‌وه‌م نووسراوه‌


که‌نابڕێته‌وه‌


سامم سواوه‌له‌هه‌رچی نووسین و هه‌ناسه‌ی بێ سه‌ر


دڵنیاییم خولیای خه‌وم ئه‌خاته‌سه‌ر


خه‌وێ که‌خه‌ون نه‌بینم


مه‌رگاویترین هه‌نگاوه‌کان


له‌ته‌ختی سینه‌مه‌وه‌


په‌لاماری قوڕگم بده‌ن


co2که‌دان و ستانی ئۆکسیژن و


تا ته‌ڕترین بۆنی باران


له‌خاکێ مه‌یل بڕه‌وه‌


درێژه‌ی بێ


درێژتر له‌م شه‌وه‌شێعره‌


که‌نه‌خۆشه‌کان


ته‌وه‌ززه‌لی کاتژمێر


ئازاریان ئه‌دا و


من ئازاری ئه‌وان ...


چاوه‌ڕوانی هیچ مه‌بن


که‌ژان


ژیانێکی بڕوا پێ نه‌کراوه‌


هیچی تر نا هیچ


که‌هه‌موو شتێ له‌هیچه‌وه‌ ده‌ستی پێ کرد

فواد جهانی بانه