شیعره کانی ائیبراهیم ئیسماعیل پوور
کەوەکەم ، دەنگی لە نێو شێعرم ئەتۆی
تۆ خوڕەی کاتێ لە نێو خوێنم ئەڕۆی
تۆ دەوەنی پڕ لە گوڵی باغی دەمی
لەشی حەیرانی ئەتۆ بەژنی گەلۆی
چه‌وێڵ
چه‌وێڵ
ده‌خوشێته خێڵ
زار
له مه‌ترسیدا ده‌یترووکێنێ
گرێ
به حه‌نجه‌ره‌دا ده‌قه‌تیسێ
تۆ
ده‌نگی خێڵت به قۆرتێکی گرێجاڕا ده‌سووڕێنی
ده‌بی به داڵکه‌پیرانی خێڵ و
له سه‌قه‌تا باڵا ئه‌که‌ی
پرێسکه‌کانت بۆنی که‌ما و هه‌زبێ ئه‌ده‌ن
به ویزه‌ی سانتافاوه، لۆلۆ گزیرێکی شه‌قاماوی
من
چوومه‌وه «با»
«با» که ده‌وه‌رزێ
ئاووس له سه‌ر حه‌ریری وێرده گۆرانی
له ته‌وافی شه‌مامه‌دا
به‌ری له سه‌فای ویزه‌ی سانتافا و مه‌روه‌ی تۆزی گزره‌لۆ
هاوین ده‌ڵێ
که ترێ له شنه ده‌تکێ و
مه‌ستاوی به مه‌حشه‌ری ڕه‌نگا ده‌مبا
حه‌یرانی گه‌ڵا
پایز ده‌ڵێ
که کڕێوه‌ی له‌ته‌ره‌ی سه‌رچۆپی دا
له باڕنی گومانا نوقمم ده‌کا و به بیره‌وه ده‌مخورتێنێ
ئه‌وسا
له به‌رزه‌خی هه‌بوونمدا
زستان ئه‌ڵێ
که شه‌نگه ڕۆژ
له په‌ڵه‌ی شه‌رابی سێ شه‌شا
به پرچی سووری مامه نه‌ورۆزدا ده‌جه‌زمێنێ
مانگێکی ڕه‌نگ ئه‌هوورایی
له گه‌ڵ سه‌مای له‌شی تورتی ڕێواسێ
به سه‌ر به‌ستیما
به‌هار ئه‌ڵێ
(په‌نجه‌کانمی سه‌ر له‌شت)
ئه‌حمه‌دی شاملوو وه‌رگێڕانی : ئیبراهیم ئیسماعیل پوور
په‌نجه‌کانمی سه‌ر له‌شت
لقی شه‌هوه‌ت و گوناهن
ته‌نانه‌ت گه‌ر خوداش له یه‌کدیمان ماره بکات
گه‌رمی لێوه‌کانت دۆزه‌خمن
ته‌نانه‌ت گه‌ر فریشته‌کانیش سروودی به‌خته‌وه‌ری بخوێنن
ئامێزت نوێنێکه له کیم و زۆخ
ته‌نانه‌ت گه‌ر ماڵی خوداش شوێنی نووستنمان بێت
زۆڵترین زارۆکی سه‌ر زه‌ویمان لێ ده‌زێ
ته‌نانه‌ت گه‌ر تۆ مریه‌م بی و منیش ڕۆحی پیرۆز
خاتوونه‌که‌م
با سه‌دان ساڵیش عاشقت بم
لێم حه‌رام بێ دزه‌ی نیگا و ماچێکت
گه‌ر تۆ ئه‌وینداری من نه‌بی
11-23-2013
شیعره کانی ائیبراهیم ئیسماعیل پوور
حالت رشته ای