شعر كردي ...

[behnam5555]

به برکه‌برکی گۆناته‌وه‌
به‌ند نابێ نیگا!

ئه‌و شکۆفه‌ کوێڕا بوو به‌م سێوه‌ لاسووره‌یه‌؟

نیگابارانت ئه‌که‌م و
چ ده‌ربه‌ست نیم
با به‌ند نه‌بێ و
تا به‌ری پێت دابوخشێت و
زیاتر باڵا بکا
ئه‌م داره‌ سێوه‌!!

هه‌ژان بابامیری

[behnam5555]

ژیانێ له‌ژوان

کچێ تێکه‌ڵی ده‌ق ئه‌بێ
له‌ژێر ساباتیوشه‌دا
ژیانێ له‌ژوان ئه‌ڕه‌خسێ.

****
تاته‌ڕه‌نگی
په‌لکه‌ڕه‌نگینه‌مبۆ بێنن،
با ره‌نگامه‌تری که‌م ئه‌م هه‌له!‌

ده‌فی مانگم بۆداگرن
با ژێر ئه‌م گومبه‌زه‌شینه
پڕکه‌م له‌
ترپه‌ترپه‌ترپیدڵ.
ئاممان،کاتێ که‌سه‌رخۆش بووم
په‌ڕه‌مووچێک له‌بوومه‌لێڵ هه‌ڵژه‌نن و
بوومه‌که‌ی تۆزێ پێ لێڵ که‌ن!
با ئه‌م مه‌حشه‌ری فریشته‌ش
به‌ده‌وری ئه‌م ژووانه‌وه‌
ببێ بی چۆپی و هه‌ل هه‌له !
چیه اژه‌ی جۆبار و
خوڕه‌‌ی قه‌ڵپه‌زه‌ی ئه‌م هه‌رده‌یه‌
به‌شمشاڵێکی جادوویی بژه‌نن
(نه‌وا زریان
نه‌وای چرپه‌کان هه‌ڵگرێ
نه‌واهه‌ور
وێنه‌ی تێکڕژان و تێکه‌ڵ بوونی
ئه‌م دوو گیانه‌بگرێ)

****
تکایه‌هه‌ر هه‌مووتان
کامێراکانتان بوکژێننه‌وه!‌
بێتووبلووتووسی ئه‌م ژوانه‌
ده‌ربچێ
خواکانی چاخی به‌رد
بارانی خاچ
به‌سه‌ر شارا نازڵ ئه‌که‌ن!

****
له‌سنووری ئه‌هریمه‌ن و ئه‌هوورادا
کچێ تێکه‌ڵی ده‌ق ئه‌بێ!



هه‌ژان بابامیری
88/1/12-سه‌قز

[behnam5555]

"سه‌د قه‌ل و به‌ردێ"


فۆلکلۆر

چی سێبه‌ره‌، یه‌کانگیر بوون
ته‌ختێکیان له‌ نه‌فره‌ت هه‌ڵبه‌ست
بۆ خونکاری تاریکایی.


******
بۆ شکانی شکۆی شوومی
ئه‌م شه‌وه‌
تۆ به‌ هه‌ڵایسان بدوێ و
منیش به‌ زمانی هه‌ڵسووڕان
له‌ ده‌ورت!
******
خۆشه‌ویستی،
گه‌رای بوومه‌له‌رزه‌ ئه‌خا
له‌ بن شووره‌ی شه‌وه‌زه‌نگا.
ده‌سته‌وه‌ستان رامه‌وه‌سته‌!
لێوت بێنه‌
سه‌د سێبه‌ر و
چه‌خماخه‌یێ!!


4/1/1388 سه‌قز – هه‌ژان بابامیری

[behnam5555]

ته‌وقه
‌

چه‌پکێ گوڵ بوون،به‌ لاسکه‌وه‌ ‌
یا پێنج په‌نجه‌ی ناسکت بوون
له‌ ده‌ستت نام
له‌ کاتی خواحافیزیدا ؟!

تۆ بڕوانه‌ له‌و ده‌مه‌وه‌
په‌نجه‌کانم
پێنج جۆباری به‌رده‌وامن ،له‌ گوڵاو !!

4/11/1387 سه‌قز- هه‌ژان بابامیری

[behnam5555]

به‌ندیخانه‌

باڵدارێك بووم
به‌سه‌ر ده‌ریای فێداره‌وه‌
سه‌وڵی باڵم لێده‌دان و
سه‌رانسه‌رم بریندار بوو ،
ئه‌نگێورا بوو
ئه‌وه‌نده‌ی چاو هه‌ته‌ر بكا
سروشت هه‌مووی له‌ سه‌ر پاشوو ،
ده‌ریا خجڵی كوده‌تا بوو .
له‌ پڕێكا ،
دامڕوانی و تۆم به‌ دی كرد ،
شاگه‌شكه‌ بوو !
هه‌روام زانی دورگه‌یه‌كی بچكۆلانه‌ی ،
بۆ ئارامی و فه‌رامۆشم داڵده‌ و لانه‌ی ...
كه‌ نیشتمه‌وه‌ تێگه‌یشتم :
تۆ داڵده‌ نیت ،
شیرینترین به‌ندیخانه‌ی !

Abdulla Peshew

[behnam5555]

گۆچان

توو ئه‌و چه‌تره‌ی که‌ هاوڕێته‌ ڕۆژی ته‌م و باران و تاو
ده‌ستت ئه‌گرێ و جێت ناهێڵێ تا ئه‌تداته‌ ده‌ستی هه‌تاو
توو ئه‌و ڕێیه‌ی یه‌كه‌م هه‌نگاو ده‌ست پێده‌كات تا دڵی من
خۆزگه‌و ئاهم لێ ون نه‌كه‌یت بیخه‌یته‌ ناو ده‌ریای بێ بن
وشكه‌ داری چه‌ماوه‌ بووم ، بۆ ده‌ستی تۆ بووم به‌ گۆچان
تا له‌ گه‌ڵتا ڕێگابكه‌م ، به‌ دوورت كه‌م له‌ داچه‌مان
دڵم ئێستا وه‌كو ماسی ، له‌ تۆڕی تۆ نابێته‌وه
چاوم وه‌ك مۆم تا دواته‌مه‌ن ، به‌سووتان بۆت ئه‌توێته‌وه
تازه‌ گوڵی چیم بۆ دێنی ، كه‌ من دڵم هه‌ڵوه‌ریوه
له‌ هه‌واری خۆشه‌ویستیت ، هیچ ئارامیم تیا نه‌دیوه‌
عه‌شق وه‌كو ده‌ریا وایه‌ ، چه‌ند شه‌پۆل به‌ی له‌جێی خۆتی
له‌ باڵنده‌ی قه‌فه‌ز ئه‌چێ ، چه‌ن هاواركه‌ی دیل و كۆتی
زۆر ئه‌ترسم ئیتر ناوم نه‌بیستمه‌وه به‌ ده‌نگی تۆ
وا به‌جارێك كاڵ ببمه‌وه ، هه‌رگیز نه‌گه‌م به‌ ڕه‌نگی تۆ
به‌ڵام من هه‌ر دیلی تۆم و قه‌ت ئازادیم ناوێته‌وه
دڵم ڕه‌گی لای تۆ دانا ، هه‌ڵی كه‌نی ناڕوێته‌وه
من دڵۆپێك ئه‌شكی ته‌ڕ بووم ، كه‌وتمه‌ ده‌ریای چاوانته‌وه‌
باڵدارێكی بێ لانه ‌بووم، باڵمدا به‌ ئاسمانته‌وه
وه‌ك دوا گه‌ڵای چڵی شاتوو، به‌شه‌ماڵت هاتمه‌ سه‌ما
گه‌ر بۆ ساتێك ده‌ستم به‌رده‌ی ئه‌مرم له‌ناو ئه‌شك و خه‌ما
ئاسووده‌م تا گیان بسپێرم ، هه‌ر ئه‌وه‌نده‌ی زوو بگه‌م پێت
به‌وه‌رینیش بۆ لای تۆ دێم ، به‌مردنیش دێمه‌ سه‌ر ڕێت
ئه‌ی خۆره‌تاو هه‌ر بۆ ساتێك له‌ به‌رزیتا وه‌ره‌ خوارێ
تا بزانی چه‌ند به‌ ژانه‌ ئاوابوونی لای ئێوارێ
تا بیبینی چۆن گه‌ڵاكان ده‌ست له‌ ده‌ستی یه‌ك به‌رناده‌ن
چۆن باوبۆران به‌ته‌زیویش دوا سات بێ ماچ قه‌ت هه‌ڵناكه‌ن
دڵنیابه‌ من به‌فرێكم ، له‌ ناو پێكتا تووامه‌وه
ڕێگایه‌كی داخراو بووم، له‌سه‌ر ڕێی تۆ كرامه‌وه
تازه‌ له‌ناو شه‌وو ڕۆژتا ، یادگاری من داگیر ساوه‌
ناو نیشانم هه‌ڵبه‌ستێكه ‌، له‌ ناو ‌دڵتا به‌جێماوه
چۆن ئه‌توانی وه‌رزی شیعرو باخی وشه‌م فه‌رامۆشكه‌ی
بێ ئاواز و گۆرانی من ، به‌عه‌شقی تر دواپێك نۆشكه‌ی
كێ وه‌كو من له‌ تاریكیت، خۆری كرد به‌ كانی چاوت
كێ وه‌كو من دیوانێكی پڕ گۆرانی كرد به‌ناوت
له‌ دووره‌وه كێ تۆی برده‌ به‌ر ئاوێنه‌ی ڕوونی كانی
له‌ گریان و پێكه‌نینا، وه‌رزی دڵی تۆی نه‌زانی
له‌ دڵته‌نكی بارانت بوم، له‌ خۆشیدا هه‌ر گۆرانی
وه‌كو گه‌ڵا زوو هه‌ڵوه‌ریم، كه‌وتمه‌ سه‌ر ڕێت به‌ ئاسانی
یه‌كه‌م حه‌رفی ناوه‌كه‌ی تۆ بوو به‌شیرینی زمانم
به‌ڵام گوڵێ دڵنیابه‌، من به ‌بێ تۆ سه‌رگه‌ردانم
نه‌كه‌ی بڕۆی به‌جێم بێڵی دوا ئاوازم بكه‌ی به‌ شین
من سه‌رمه‌ستم به‌ ناوی تۆ ڵێم مه‌به‌سته ده‌رگای ئه‌وین
یادت ماوه‌ تۆ خۆت وتت من به خۆرت ده‌كرێمه‌وه
وه‌كو به‌فر له‌ ناو گڕی ته‌نیایتا ئه‌توێمه‌وه
چۆن فرمێسكێك كه‌ ئه‌وه‌رێ ناچێته‌وه ناو چاوانت
یا كه‌ڕۆژێك تێئه‌په‌ڕێ نایه‌ته‌وه‌ سه‌ر ژیانت
بڕوا بێنه‌ به‌م قه‌ده‌ره‌ی كه‌ من و تۆی به‌یه‌ك ناسان
به‌و ئه‌وینه‌ی به‌ هێمنی هاته‌ دڵت زۆت به‌ ئاسان
بڕوا بێنه‌ به‌ هاتنه‌وه‌و گه‌ڕانه‌وه‌ی به‌فری ئه‌مساڵ
به‌و هه‌ڵبه‌سته‌ی به‌ شێتانه‌ چاوه‌رێته‌ وه‌كو مناڵ
به‌و نامه‌یه‌ی كه‌ باڵده‌گرێ تا ده‌گاته‌ دووره‌ وڵات
وه‌ك چیرۆكی ئه‌فسانه‌یی تا به‌ ده‌ستی خه‌یاڵ ده‌گات
توو ئه‌و خۆره‌ی له‌ چاوتایه‌، تو ئه‌و هه‌سته‌ی له‌ ناختایه‌
له‌ ئێستاوه‌ تا هه‌میشه‌، ده‌رگای دڵم ئاوه‌ڵایه‌
منیش ئاوا له‌ سه‌ر ڕێتا باڵدارێكی هه‌ڵكوڕ ماوم
به‌ڵام چیبكه‌م بۆ له‌ باڵدان كۆرترێكی باڵبه‌ستراوم
توو به‌هارێك كه‌ چاوه‌رێی له‌سه‌ر ئه‌سپی خه‌یاڵم بیت
كه‌ هاتیه‌وه ئارامم كه‌ ته‌نیا چرای ناو ماڵم بیت
تۆ له‌ ‌دڵمای به‌ڵام چیبكه‌م كه‌ من هێشتا له‌ خۆم دوورم
له‌ وه‌ته‌ی هه‌م دڵشكاوم، له‌ ناو عومری سه‌وزو سورم
له‌ به‌هارا ڕه‌نگم دانا، له‌ گه‌ڵ به‌فرا دڵم ته‌زی
به‌نیگای خۆر توامه‌وه‌، له‌ پایزا چاوم وه‌ری
ڕووبار هات و به‌ جێی هێشتم ئاوڕی لێم نه‌دایه‌وه‌
خۆر به‌خه‌نده‌ له‌ من هه‌ڵهات، شه‌وی هێنا به‌ دوایه‌وه‌
تۆ نه‌تدیوه‌كه‌‌ په‌پووله‌ به‌ عه‌شقه‌وه‌ بۆ مۆم ئه‌چێ
به‌ڵام ئه‌و زۆر بێ باكانه‌، ئاگر به‌سه‌ر دڵیا ئه‌نێ
تۆ بڕوانه‌ هه‌نگه‌‌زه‌رده‌، كه‌ به‌سه‌ر گوڵ ئه‌خولێته‌وه‌
شه‌ماڵ ده‌ستی چڵی ئه‌گرێ و گوڵ له‌ ماچ دور ئه‌خرێته‌وه‌
من له‌ ده‌رگای گۆرانیمدا فرمێسكم لێ كرایه‌وه‌
له‌و شوێنه‌ی گوڵی تیا وه‌ری، دڕكێكی لێ ڕووایه‌وه‌
باسی خونچه‌و چرۆ مه‌كه‌ من به‌هارم له‌ ده‌ستداوه‌
زه‌رده‌ خه‌نه‌م كه‌وته‌ سه‌ر ژێرلێو، چرا یه‌كی كز كراوه‌
عه‌شق به‌فری پێش بارینه‌، كه‌ گه‌شته‌ خاك ئه‌توێته‌وه‌
چاوی كزو دڵی پڕه‌ هه‌ر به‌ گریان ئه‌توێته‌وه‌‌
هه‌راسان بووم چونكه‌ عه‌شق سه‌رابێكی پڕغوباره‌
وه‌ك ڕه‌شه‌بای سلێمانی گوڵ شكسته‌ی ناو به‌ هاره‌
ئیتر به‌ گوڵ فریو ناخۆم بۆنی دیاره‌ بێ وه‌فایه‌
‌ساتێك له‌ گه‌ڵ په‌پوله‌داو ساتێك له‌ گه‌ڵ شه‌ماڵدایه‌

Ahmad Mohammad

[behnam5555]

خه‌وه‌ به‌ردینه‌

له‌ چه‌شنی گه‌رووی که‌و ،
که‌وی دۆمی یه‌خسیری زیندانی داری،
پڕی سه‌وزه‌ به‌سته‌ی خرۆشانی باڕی
ته‌ره‌ی باوه‌شی تاسه‌باری بناری
شه‌پۆلی له‌ گوێن خوێنی شه‌رمی کچانه‌
له‌ سه‌ر ڕوومه‌تی ماتی بووکی ڕه‌زاسووک
به‌تینی بتاوێنێ ڕوانینی زاوا
گه‌رمتر له‌ پڕشنگی تاوی به‌هاری
وه‌کوو نه‌رمه‌ هه‌نگاوی لاوی به‌ره‌و ژوان
له‌ جێ ژوانی زیندوو به‌ گیانی کچی جوان
وه‌کوو گه‌رمه‌ یاوی قه‌شه‌ی ده‌ستی تاراو
له‌ بژوێنی ده‌ریای بلوورینی به‌روێ
به‌ خوڕ خۆ به‌ دیواری کێوا ئه‌دا ئاو
له‌گه‌ڵ گاشه‌ به‌ردا سه‌ر ئه‌سوێ سه‌ر ئه‌سوێ.

****
کچی نوور قه‌تیسی ده‌سی دێوی کێوه‌
له‌ ئه‌نگوسته‌ چاوی دڵی خێوی کێوا
به‌ره‌و ده‌ر، به‌ره‌و شاری ده‌ریا به‌ڕێوه‌.
گه‌رووی ویشک و چاوی سپی چاوه‌کانی
ده‌رووی ڕوونی ئاوه‌
به‌ فانۆسی ئه‌ستێره‌ به‌رچاوی ڕوونه‌
له‌ به‌ر پێی حه‌ریری که‌وه‌ی سێوه‌ڕه‌
به‌ پۆی مانگه‌ شه‌و چندراوه‌.
ئه‌ڵێی بورجی خاپووری مێژووی له‌مێژین
له‌ درزی هه‌زار خشتی ڕۆژ و شه‌وانی
دڵۆپه‌ی چپه‌ی پۆلی په‌ریانی دادا
ئه‌ڵێی پێکه‌نینی کچی سه‌رگوریشته‌ی قه‌دیمی
له‌ ئه‌ندامی تاپۆی وه‌کوو بوومه‌لێڵی
سنووری شه‌وی دوێنێ ئه‌وڕۆی به‌یانی
په‌چه‌ی قورسی نسیانی ئینسانی لادا.

****


ئه‌ڵێی ده‌نگی شمشاڵه‌ ڕه‌شماڵی دۆڵی دڕیوه‌
شه‌ماڵی ده‌ره‌ی دووره‌ شاری
پشووی پڕ له‌ عه‌تری به‌هاری کچی کورد
به‌ بلوێری شووشی گه‌رووی زه‌رد و زۆڵی
له‌ زه‌نوێری زێو ئاژنی سای زرینگانه‌وه‌ی شه‌و
به‌ خوڕ زه‌مزه‌مه‌ی هه‌ڵبڕیوه‌
به‌ ئیعجازی ئه‌نگوستی پاکی موحه‌ممه‌د
شه‌تی نوور به‌ ڕووی مانگی عه‌رزا کشاوه‌
ترووسکه‌ی برووسکه‌ی شه‌وی ده‌م به‌هاری به‌ هه‌وره‌
له‌ سه‌ر عاسمانی زه‌وی ڕاخوشاوه‌.
له‌ هه‌ر گاز و ڕێبازێ وا گازی ئاوی ئه‌گاتێ
نیازی هه‌زاران گه‌زیزه‌ی به‌نازی وه‌دی دێ
ئه‌بووژێته‌وه‌ داری چاکی به‌ ودمی هه‌ناسه‌ی
شنه‌ی نه‌رمه‌ لاوێنی ده‌م بای ئه‌خاتێ.
****
ئه‌ڵێن تاجی زمڕووتی دووڕگه‌ی له‌سه‌ر ناوه‌ ده‌ریا
هه‌تا چاو هه‌ته‌ر کا، شه‌پۆله‌، شه‌پۆله‌
له‌ بوونا له‌ چوونا
به‌ ئاهه‌نگه‌ سه‌ربه‌ندی بزوێنی خۆشی
له‌به‌ر خۆره‌ تاوا ئه‌ڵێی سینگی ژینه‌ ئاهاژێ
ئه‌ڵێی: هانی هه‌ستانه‌ ده‌نگی خرۆشی
سروودی خوناوه‌ی به‌هاره‌ له‌ گوێما
له‌ هه‌ر شێوه‌ جۆبارێ هه‌ر ده‌شته‌ چۆمێ
له‌ دڵمایه‌ بڕوای به‌رینی به‌ ده‌ریا گه‌یشتن
له‌ تاریکه‌ تاراوگه‌که‌م وا به‌سه‌ر چوو
زه‌مانی ته‌ریکیم
ئیتر خێر و خۆشی له‌ ڕێما
****
وه‌هایه‌ :
که‌ کانی به‌ هیوا
به‌هارانه‌ لووزه‌و ئه‌به‌ستن به‌ره‌و شاری ده‌ریا
به‌ڵام داخی جه‌رگم له‌ گه‌ڵ هه‌ر به‌هارێ
که‌ ڕائه‌چڵه‌کن سه‌وزه‌ڵانی
له‌ خاکینه‌ خه‌ونی گرانا
له‌ دڵما خه‌م و داخی ئه‌م ده‌رده‌ سه‌وزه‌:
که‌ ده‌ردی گرانی هه‌موو ڕێبوارێ وه‌نه‌وزه‌
****

له‌به‌ر نووری خۆرا
گه‌لێ کوێره‌کانی شه‌واره‌ن
زنه‌ی ده‌م به‌ هاواری هاری درۆزن هه‌زارن
که‌ ته‌سلیمی سیحر و ته‌لیسمی بنارن
به‌بێ هه‌وڵی هه‌ڵدان و چارانی چارن
به‌ هیوان بگرمێنێ هه‌وری به‌هاری
ڕه‌هابن
له‌ زیندانی به‌ردینی غارا.
که‌چی ، وا که‌وی و ده‌سته‌مۆی ده‌سته‌ڵاتی ڕکه‌ی دۆڵ و شێون
له‌به‌ر سامی ڕێ وا به‌زیو و ته‌زیون
له‌ گه‌ڵ گۆچی کردن گزنگێ،
چه‌واشه‌ن له‌ پێچی نزارا.
****
هه‌تا بیری تاڵی گڕاوێ
به‌دڵما گه‌ڕاوه‌
هه‌تا یاد ئه‌که‌م ئاوه‌ به‌و ورمه‌ به‌ردینه‌ کاری کراوه‌
ئه‌ڵێم سه‌د مخابن
وه‌جاخێ که‌ ڕووگه‌ی هه‌زاران نزای شینه‌ باهۆی به‌تاسه‌ن
وه‌بووژێنه‌وه‌ی هه‌ست و هان و هه‌ناسه‌ن
چلۆنه‌ که‌ بیژووی گڕاوان ئه‌بینن
له‌ نێو چاوی ئه‌و خانه‌دانه‌
له‌هی چۆنه‌ پیتی بڕاوه‌؟
نه‌ سۆزه‌ی بلاوێنی میری، خوناوه‌ی به‌هاری
نه‌ تووکی برای ڕێبواری
له‌ کاسی خه‌وا، فێری ڕاسانی ناکه‌ن
له‌ مانا، به‌ ئامان و بریا
په‌شیمانی هه‌رمانی ناکه‌ن
وه‌ها گه‌ی له‌شی به‌و گه‌ به‌ردینه‌ گاوی دراوه‌
که‌حێلێکه‌، کۆڕژن و حیله‌ی نه‌ماوه‌
وه‌هایه‌ که‌ هه‌ر گیایه‌ له‌و ده‌شته‌ شینن
له‌ سه‌ر ماته‌می ئاوه‌ به‌ردینه‌، سه‌رشین و سه‌رگه‌رمی شینن
****
گه‌لێ گۆله‌ له‌و چۆله‌ یه‌خسیری خاکن
به‌ ڕوویا گه‌ڵا وه‌ک چه‌مۆڵه‌ی کڵۆڵی وه‌ریون
گه‌مارۆی زه‌لی نێزه‌، وا ته‌نگی پێ هه‌ڵچنیون،
که‌ بێ ده‌رفه‌تی پێکه‌نینن به‌ سه‌د به‌رزگی زه‌رده‌ ماسی
لق و پۆپ و هه‌ژگه‌ڵ
وه‌ها ده‌ور و پشتی ته‌نیون
که‌ بێ فرسه‌تی چاوه‌بڕکێ
له‌ گه‌ڵ عه‌ڕشی پاکن

****
هه‌تا جۆگه‌ ئاوێ به‌ وشکی ده‌بینم
ئه‌ڵێی مێرگی ڕوخساری کیژێکی کاڵ و مناڵه‌
به‌ کووزی ته‌مه‌ن جاڕه‌ جوانێکی پڕ خه‌وش و خاڵه‌،
ته‌شه‌نداره‌ جه‌رگی برینم.
به‌ڵێ: دووره‌ گه‌رمێنی ده‌ریا
به‌ڵێ: وایه‌ کانی هه‌ژارن
ئه‌زانم
ئه‌وانه‌ی که‌ پاراوی ئاون بژارن.
ئه‌زانم له‌ ڕێگا،
مه‌ترسی گه‌لێ ژه‌نگ و ژارن.
به‌ڵام کاکه‌ ئه‌و گشته‌ عه‌قڵی خه‌سارن
له‌ناو ئه‌و هه‌موو ئاوه‌ هه‌ر چاوه‌یه‌ک
باوی هه‌نگاوی خۆشه‌
به‌ ته‌نیا ئه‌وه‌ شاره‌زای کۆسپ و که‌نداڵی ڕێ یه‌
هه‌وه‌ڵ مه‌نزڵی زێ یه‌، ئاواتی به‌رزی زرێ یه‌
ئه‌زانێ له‌ هه‌ڵدێره‌ هانی به‌هێزی
له‌ ئه‌سکوند و چاڵایه‌ هه‌ڵدان و گێژی
په‌ڕۆی شینی سه‌رشانی ده‌ریایه‌ ژینی که‌رێزی
ئه‌زانێ له‌پێ ناکه‌وێ پێ یه‌ پێڵاوی تاسه‌ی پیاسه‌ی له‌پێ بێ
نه‌وه‌ستان ده‌وه‌ستێ به‌ ده‌ستێ
که‌ خاراوی ئیش و سواوی سوێ بێ
له‌هه‌ر شوێنێ ڕاماوه‌، داماوه‌، کاری ته‌واوه‌
ئه‌زانێ ئه‌بێ هه‌ر بژی و باژوێ، تا بژی تا بمێنێ
هه‌ناوی به‌ هه‌نگاوه‌، نه‌سره‌وتنه‌ کووله‌که‌ی ڕووحی ئاوه‌.

Sware Ilxanizadeh

[behnam5555]

چه‌پكه‌ گوڵێك بۆ ست فاتمه‌

فاتمه‌ ! دوو چاوی مه‌ستت، پڕ ته‌لیسمی جوانی یه‌
پڕ شه‌رابی خۆشه‌ویستی و ئاره‌قی یه‌زدانی یه‌،
به‌ژن و باڵاكه‌ت نموونه‌ی هه‌یكه‌لی یۆنانی یه‌،
لار و له‌نجه‌ت مۆسیقایه‌، به‌سته‌یه‌، گۆرانی یه‌

بووكی ڕازاوه‌ی خه‌یاڵم ، گیانه‌كه‌م ست فاتمه‌ !
تاقه‌ پڕشنگێكی چاوت ئه‌وپه‌ڕی ئاواتمه‌..

گه‌رچی دڵداری له‌ خاكی ئێمه‌دا ئه‌فسانه‌یه‌
هه‌ر به‌ ته‌نیا بۆ كوڕی خاوه‌ن ته‌لار و عانه‌یه‌
گیانه‌كه‌م ! ئه‌مما دڵی من له‌و دڵه‌ شێتانه‌یه‌
بێ ئه‌وه‌ی هیچ شك به‌رێ، كوژراوی ئه‌و چاوانه‌یه‌

هه‌ر به‌ ته‌نیا خۆشه‌ویستی شك ئه‌به‌م، ست فاتمه‌ !
سه‌روه‌تم ناوێ، بزه‌ی تۆ، ئه‌وپه‌ڕی ئاواتمه‌ ..

خۆشه‌ویستی وا كه‌ نامه‌ی خوایه‌ بۆ پێغه‌مبه‌ران
به‌رز و ناسك، وه‌ك هه‌ناسه‌ی پڕ گوڵاوی دولبه‌ران
نه‌ك وه‌كو حه‌زكردنی دینار و گه‌وهه‌ر په‌روه‌ران
ئه‌و كه‌سانه‌ی بۆ قڕانێ، چه‌نده‌ دڵیان هه‌ڵوه‌ران !

خه‌ڵقی تر پاره‌په‌رستی با بكه‌ن ، ست فاتمه‌ !
من به‌ ته‌نیا ، تۆ په‌رستی ئه‌وپه‌ڕی ئاواتمه‌..

زۆر كه‌ڕه‌ت هانم ئه‌دا داخی ده‌روونی پڕ گڕم
بۆتی هه‌ڵڕێژم سكاڵای ناسكی گه‌رم و گوڕم
داخه‌كه‌م كاتێ كه‌ دێمه‌ به‌رده‌مت، واقی وڕم
وام ئه‌شێوێنێ به‌ جۆرێ نایه‌ڵێ هیچ ده‌ربڕم!


بووكی ڕازاوه‌ی خه‌یاڵم ، گیانه‌كه‌م ست فاتمه‌ !
گوێیه‌ بۆ ئه‌م ڕازه‌ شل كه‌ی، ئه‌وپه‌ڕی ئاواتمه‌.
Herdi

[behnam5555]

ئاره‌زووی فڕین

ژین به‌ یه‌خسیری و دیلی بێ که‌ڵکه‌
بۆیه‌ له‌مێژه‌ له‌ ژینم تێرم
گوزه‌ران بۆ من له‌ناو ئه‌م خه‌ڵکه‌
سه‌خته‌، ناخۆشه‌، چۆنی ڕابوێرم
.....
هێزم لێ بڕا تاکه‌ی ده‌ربه‌رم
له‌ ناو مه‌ینه‌ت و ده‌ردی سه‌رزه‌مین
ئه‌وه‌ به‌ینێکه‌ که‌وتۆته‌ سه‌رم
بیری ئازادی و ئاره‌زووی فڕین
.....
به‌لام داخه‌که‌م نیمه‌ باڵ و په‌ڕ
که‌ بفڕم ، بڕۆم خۆم بده‌م نه‌جات
بچمه‌ شوێنێکی لێی نه‌بێ به‌دفه‌ڕ
له‌ باوه‌ش بگرم نۆبووکی ئاوات
.....
ئه‌ی سروه‌ باکه‌ی به‌یانی! وه‌ره‌
به‌ شنه‌شن و، پشووی خۆت توند که‌
له‌سه‌ر ئه‌و دونیا نه‌ویه‌م لابه‌ره‌
هه‌تا ده‌توانی ئه‌من بڵند که‌
.....
نا نا هه‌وه‌ره‌ ڕه‌ش! ئه‌وڕۆ نه‌وی به‌
له‌و به‌رزانه‌وه‌ وه‌ره‌ به‌ره‌و خوار
که‌م که‌مه‌ وه‌ره‌ ڕێکی زه‌وی به‌
له‌سه‌ر پشتی خۆت ئه‌من بکه‌ سوار
.....
ئه‌وجار هه‌سته‌وه‌، بڕۆ به‌ره‌و ژوور
مه‌وێسته‌ هه‌تا ته‌شکی ئاسمان
بمبه‌ره‌ نێزیک ئاسۆی جوان و سوور
نه‌جاتم بده‌ له‌ کاولی خه‌مان
‌Hemin

[behnam5555]

گه‌ڕان به‌دووای مه‌رگدا

ئه‌مشه‌و
شه‌وی تلانه‌وه‌یه
به‌ناو پێده‌شته‌ به‌رینه‌کانی مردندا
‌به‌ناو ڕۆحی خه‌ونه‌ یاخیبووه‌کاندا
ئه‌مشه‌و‌
شه‌وی گه‌ڕانه‌ به‌دووای مه‌رگه‌ ئه‌به‌دییه‌کاندا و
سنگواڵاکردنه‌ بۆ دورگه‌یه‌ک
دوورتر
له‌ به‌گژداچوونی خۆزگه‌ زینده‌به‌چاڵ کراوه‌کانم

ئه‌مشه‌و
له‌ نیگه‌رانی خۆم ده‌ڕوانم به‌رامبه‌ر به‌ ژیان
خۆم به‌ باڵی شه‌مشه‌مه‌ کوێره‌یه‌کاندا هه‌ڵده‌واسم
به‌ره‌و تارمایی
من ده‌بمه‌ فریشته‌یه‌ک و
باوه‌ش بۆ خودا ده‌که‌مه‌وه‌
باوه‌ش به‌و هه‌ورانه‌دا ده‌که‌م
که‌ هه‌میشه‌ چاویان ته‌ڕه‌ و
به‌ خوڕ فرمێسکیان لێده‌بارێت
ئه‌مشه‌و
خۆم ده‌که‌م به‌ناو شه‌پۆله‌ زله‌کانی تاریکیدا و
به‌ ته‌لبه‌نده‌ دڕکاوییه‌کانی په‌شیمانید هه‌ڵده‌زنێم
ڕۆحیانه‌ته‌که‌م تێپه‌ڕ ده‌بێت و
هه‌ر ووننابم... هه‌ر ووننابم !

ئه‌مشه‌و
به‌نێوانی مردن و ژیاندا تێپه‌ڕده‌بم
له‌به‌ینی ڕۆژگاره‌ فریوخواردووه‌کان و
شه‌وه‌ یه‌ڵداکاندا
ده‌بمه‌ گوڵێکی وشکی بێناز و
به‌ ئه‌سپایی هه‌ڵده‌وه‌رێم
ئه‌مشه‌و
به‌سه‌ر پرده‌کانی ژیان و قیامه‌تتدا
هه‌نگاوه‌کانم جارانی چوار و پێنج ده‌که‌م و
هه‌ر پێی ناگه‌م!

ده‌ڕۆم به‌ناو دوکه‌ڵ و ته‌پوتۆزی غوربه‌تی خۆمدا و
ئاساری وونبووی هه‌زاران مێژووی ووشک ده‌مدۆزێته‌وه‌
که‌چی ئه‌وان هه‌ر خۆیانم لێ لاده‌ده‌ن
قیامه‌ت له‌ پێشوازیمدا ده‌دره‌وشێته‌وه‌ و
ژیانیش هه‌ر له‌کۆڵم نابێته‌وه!

ئه‌مشه‌و‌
من هه‌ر به‌ڕێوه‌م بۆ پێشوازی کردن له‌ مه‌رگ
له‌ بازنه‌ خاڵی و ئه‌نگوستیله‌ئاساکه‌ی خۆمدا ده‌سوڕێمه‌وه‌ و
مه‌رگێک نایه‌ت به‌لامه‌وه‌
هێنده‌ له‌خۆباییه‌ ئه‌و مه‌رگه
ته‌نانه‌ت‌
ئاوڕیشم لێناداته‌وه‌

ئا ی ی ی خودایه‌ !
چه‌نده‌ قێزن و شپرزه‌یه‌ ئه‌م شه‌وی خۆ کوشتنه‌!
تۆ ته‌ماشا بکه‌
‌من له‌ ده‌ریا بێبن و قووڵه‌کاندا ده‌خنکێم و
که‌چی ڕۆحم ده‌رناچێت
له‌ بیابانه‌ لماوییه‌کاندا
لم و گه‌رمییه‌ کوشنده‌کان ده‌مشارنه‌وه‌ و
هه‌ر نامرم
له‌ دوکه‌ڵی دوای خه‌راباته‌کانی
جه‌نگی نێوان مه‌رگ و ژیاندا
تێکه‌ڵ به‌ خوێناوی عه‌شقی مه‌رگێک ده‌بم و
خودای ڕۆژگار هه‌ر نامکوژێت!
به‌ناو ئه‌م نیوه‌شه‌وی مه‌رگه‌ساته‌دا
سه‌ره‌ڕۆیانه‌ و مه‌جنونئاسا‌
هه‌ر ڕێده‌که‌م .. هه‌ر ده‌گه‌رێم
هه‌ر پێی ناگه‌م

ئه‌مشه‌و
هه‌نگاوه‌کانم هه‌ر یه‌ن و ئه‌زه‌لیتر ده‌بن و
پاشقول له‌ یه‌کتری ده‌گرن
موعجیزه‌ئاسا ده‌که‌ونه‌‌ ورووژان و په‌له‌کردن
ئه‌وان
هه‌ر هه‌وڵی گۆڵکردنیانه‌ له‌ ژیان و
ڕسواکردنی دوژمنی مه‌رگ

ئه‌مشه‌و
قاچه‌ بچووکه‌ قڵیشبردووه‌کانیشم
له‌ناو جووتێک نه‌علی لاستیکی دڕاوی سپیدا
هه‌ر پاڵ به‌یه‌کتره‌وه‌ ده‌نێن
بۆ دۆزینه‌وه‌ی کوچه‌یه‌کی تاریکتر
ته‌ماویتر
نادیارتر له‌ کوچه‌ی هه‌بوون و ڕۆحه‌ زیاده‌کان
چونکه‌ ئێمه‌ هه‌موومان زیاده‌ین له‌م ژینه‌دا
هه‌موومان به‌ مانایه‌کی هیچ هاتووین و
دواتر ملکه‌چی ده‌ڤه‌رێکی نادیارتر ده‌بینه‌وه
ده‌ڤه‌رێکی خواوه‌ندی
خواوه‌ندێکی نه‌بینراوی بێڕه‌نگ
دوورتر له‌ ڕاسته‌قینه‌ی ئه‌ندێشه‌ و
وونتر له‌ هه‌موو شتێکی ئه‌م سه‌ر زه‌مینه‌
کێ ده‌ڵێت ڕۆژێک دێت و خواوه‌ند ده‌مان گرێته‌ خۆی
کێ ناڵێت
خالق
ئێمه‌ی لێته‌وقنییه‌ و
توڕمانناداته‌ ئه‌ودیو لێواره‌کانی قه‌بره‌وه‌ ؟؟
من هه‌ر ده‌گه‌ڕێم
هه‌ر ده‌گه‌ڕێم به‌ دووای مه‌رگدا!

ئه‌مشه‌و
هه‌نگاوه‌کانم زۆر سه‌ره‌ڕۆن
ملی ڕێگا چۆڵ و هۆڵه‌کان ده‌گرن
به‌ره‌و ‌کوچه‌ی هه‌ناسه‌دانی ئه‌و "جره‌به‌گزادانه‌ی
که‌ له‌ سه‌رمادا ڕه‌قبوونه‌ته‌وه
بۆلای ئه‌و سواڵکه‌رانه‌ی
که‌ له‌ برسا له‌تێک نانی ڕه‌ق نه‌بووه‌ بیهاوێژنه‌ ده‌میان و
ده‌روونیانی پێتێر بکه‌ن
قاچه‌کانم له "جرپوجۆپدان
بۆ سۆراخکردنی‌
بوونه‌وه‌ره‌ داماوه‌کانی تری ئه‌م که‌وکه‌به‌ قوڕبه‌سه‌ره‌
که‌وتونه‌ته‌ پێشبڕکێ
بۆ دۆزینه‌وه‌ی یه‌که‌م نیگای مه‌رگ
یه‌که‌م سڵا و
یه‌که‌م پێشوازی لێکردنی

ئاییییی ئه‌مشه‌و
ئه‌وانه‌ی له‌ ڕێگا ده‌یانبینم
هه‌ر ده‌دوێن و
ده‌دوێن و
بۆڵه‌ بۆڵیانه‌
ئاخ و ئۆف له‌م عینادییه‌ی من هه‌ڵده‌کێشن
(به‌شوێن مه‌رگدا)
به‌ڕقێکی توونده‌وه‌
له‌ ئه‌رزه‌که‌ی ژێر پێیان تووند ده‌بن و
نایانه‌وێت دووربکه‌ونه‌وه لێم
که‌چی من
به‌ناو تاریکایی ئه‌وانیشدا
تێپه‌ڕ ده‌بم
‌
ئای خالقی به‌هه‌شت و دۆزه‌خ
منی "کروشمه‌کردو
هه‌ر ده‌بێت بڕۆم
هه‌ر ده‌بێت بگه‌مه‌ ئه‌و په‌لکه‌ زێڕینه‌یه‌ی
که‌ پاش بارینی بارانی به‌هارێکی سه‌وز هه‌ڵگه‌ڕاو
به‌ مه‌کر و نازێکی زۆره‌وه‌
عه‌یارانه‌ خۆی ده‌ر ده‌خات و
وه‌ک گه‌یه‌نه‌رێک
له‌به‌ینی ئاسمان و زه‌ویدا
خۆی پێشانی زۆرداریی ده‌دات
وه‌ک جۆلانێیه‌ک
له‌ هه‌وره‌کانه‌وه‌ بۆ وشکانی
له‌ هه‌وره‌کانه‌وه‌ بۆ ته‌ڕایی
له‌ هه‌وره‌کانه‌وه‌
وه‌ک پرچی دایکم
شۆڕ ده‌بێته‌وه‌ بۆ ناوجه‌رگه‌ی تکاکانی ته‌مه‌ن
بۆ ناوجه‌رگه‌ی
نزاکانی به‌رچایی بێوه‌ژنێکی جه‌رگ سوتاو
دواتر
وه‌ک بووکێک
له‌ به‌ینی ڕۆژی خۆ ئاماده‌ کردن بۆ ژیانێکی نوێی تر و
شه‌وی شوکردنیدا ئه‌دره‌وشێته‌وه‌
وه‌ک زه‌رده‌خه‌نه‌یه‌کی خۆشدڵ
له‌سه‌ر نیگای کیژێکی وردیله‌ هه‌ڵده‌قو‌ڵێت و
ڕومه‌ته‌کانی چاڵ ده‌بێت پێوه‌ی
لێوه‌کانی هه‌ر دێن و
ته‌نک و ته‌نکتر و
ناسک تر و
په‌مه‌یتر ده‌بن
من هه‌ر ده‌بێته‌ بگه‌مه‌ ئه‌و په‌لکه‌زێڕینه‌یه‌
هه‌ر ده‌بێت ده‌ستم بگاته‌ ئه‌و "ئه‌سانسیره‌

ده‌بێت بگه‌مه‌ ئه‌و په‌لکه‌ی
که‌ ڕه‌نگه‌ وێڵه‌کانی له‌ خۆی به‌ستوه‌
ڕه‌نگی خۆزگه‌
ڕه‌نگی هیوا
ڕه‌نگی ئارامی
ڕه‌نگی بێده‌نگی
ڕه‌نگی تۆ
دواتر
ڕه‌نگی من
ئه‌مانه‌ هه‌موو ئه‌و ڕه‌نگانه‌ن، که‌ له‌ئامێزی مه‌رگدان
زۆرن ڕه‌نگه‌کان
زۆرتر له‌ ئه‌ستیره‌ تۆراوه‌کان و
بڵندتر له‌و ئاسمانه‌ی پێێوه‌ی نوساون
ئایییی
هه‌ر ده‌بێت په‌لکه‌زێڕینه‌ بمگه‌یه‌نێته‌ مه‌رگ
له‌وێوه‌ ئه‌چم
بۆلای نه‌نکم له‌ ئاسمان
باپیرم
که‌ له‌ سه‌رو هه‌وره‌کانه‌وه‌
ده‌ستی میهره‌بانی و
ڕزگارکردنم بۆ درێژ ده‌کات و
من پێی ناگه‌م!!!!!!!
بۆ باوه‌شی خاڵم
که‌ دڵنیام
له‌ هه‌ر کوچه‌یه‌ک بێت
ئێستا بیرم ده‌کات
بۆ لای هاوڕێکه‌م
که‌ خۆی له‌ به‌رگی سپی ناوه‌ و
له‌سه‌ر په‌ڵه‌یه‌ک له‌ هه‌وره‌کان دانیشتووه
به‌ناو نامۆیمدا تێپه‌ڕده‌بێت و
به‌جووتێک چاوی بریسکه‌داره‌وه‌
لێمده‌ڕوانێت‌
دڵنیام چاوه‌ڕێی من ده‌کات
دڵنیام
چاوه‌ڕێی مه‌رگ ده‌کات ... یان
له‌چاوه‌ڕوانیی
په‌لکه‌ زێڕینه‌دایه‌ بمگه‌یه‌نێته‌ لای ئه‌و
ئای ی ی ی
هه‌ر ده‌بێت بگه‌م
هه‌ر ده‌بێت بگه‌م به‌ مه‌رگ

له‌م شه‌وه‌دا
من که‌ ده‌ستم له‌ خۆم شتووه‌ و
به‌ ته‌نوره‌یه‌کی سپی و
کراسێکی سپی و
قردێله‌یه‌کی سپی و
کۆڵۆنێکی سپیتر و
جوتێک گۆره‌وی دڕاوی دیسان سپییه‌وه‌
به‌ناو ئه‌م بیابانه‌ لماوییه‌دا هه‌ر ڕاده‌که‌م
هه‌ر ڕاده‌که‌م
که‌چی من هه‌ر به‌ مه‌رگ ناگه‌م

به‌ناو تاریکی و ته‌موومژ و
ترسناکی ئه‌م شه‌وانه‌دا غارغارێن ده‌که‌م
هه‌ر پێی ناگه‌م
به‌ناو ڕوخان و تێکچونی خۆمدا هه‌نگاو ده‌نێم
له‌گه‌ڵ مه‌له‌ نووستووه‌کانی شه‌ودا ده‌دوێم
بێزاریان ده‌که‌م به‌ پرسیار
وازیان لێناهێنم
تا ڕێگای مه‌رگم پیشان نه‌ده‌ن
به‌ڵام ئه‌وان هه‌ر پێم ناڵێن
هه‌ر پێم ناڵێن
دڵنیام
ئه‌وان خۆیان له‌ تاڵیی مه‌رگ ده‌دزنه‌وه‌
ئه‌وان به‌وێنه‌ی من وێران نین
به‌ وێنه‌ی من بێزار نین
ئه‌وان ژیانیان خۆشده‌وێت
یان نازانم
پێده‌چێت ژیان ئه‌وانی خۆشبوێت و
وه‌ک له‌زگه‌
وه‌ک موی لوت
خۆی به‌وانه‌وه‌ هه‌ڵواسیبێت
من هه‌ر ڕاده‌که‌م و
به‌ مه‌رگ ناگه‌م... پێی ناگه‌م!

ڕێگام ده‌که‌وێته‌ سه‌ر گۆڕستانێک
له‌وێ.. هه‌ر له‌وێ
زۆرترینی قاو قیژی ئه‌و ڕۆحیانه‌تانه‌ دێنه‌ به‌ر گوێم
که‌ سه‌ر پێچیان له‌ ژیان کردووه‌
که‌ خۆیان کردووه‌ به‌ساقه‌ی گوریسێک و
له‌ ملی خۆیان ئاڵاندووه‌ له‌ بێزاریدا
گوێم له‌ زیکه‌ی ئه‌و کیژۆڵانه‌یه‌
که‌ خۆیان سوتاندووه‌ له‌ ترسی ژیان
ئه‌و منداڵانه‌ی
له‌ نه‌داریدا خۆیان فڕێداوه‌ته‌ نێو ده‌ریا قووڵه‌کان
له‌ به‌ر نه‌بوونی هاو‌ده‌رد و
هاوسه‌فه‌رێک و
له‌به‌ر زوڵمی ڕۆژگار
ئیتر له‌وێ ماسی و جانه‌وه‌ره‌کان خواردوویانن و
ئێستا له‌ حه‌وت ته‌به‌قه‌ن
ئه‌وان ئیستا له‌ به‌هه‌شته‌وه‌ بانگم ده‌که‌ن
ئه‌وان
له‌ دێر زه‌مانه‌وه‌ منیان به‌ مه‌رگ له‌ قه‌ڵه‌م داوه‌ و
مه‌رگیش به‌ من
به‌ڵام من ته‌نها ده‌یانبیستم
نایانبینم
ده‌یانبیستم !

من ناشترسم له‌ مردن
نامه‌وێت ترسنۆک بم
وه‌ک پاڵه‌وانه‌ فیززله‌کان
خۆم ناده‌مه‌ بن دارێک و
چرپه‌یه‌م نه‌یه‌ت
هاوار نه‌که‌م!
یان له‌ ترسی مه‌رگ
بێده‌نگ ببم
نا ..
هه‌رگیز نا

ئه‌ی نابینیت ؟؟
من خۆم بانگی ڕوخساری مه‌رگ ده‌که‌م
ده‌گریم
سێڕیزه‌ فرمێسک ده‌ڕێژم
نایه‌ڵم که‌س ده‌ستی یارمه‌تی به‌ سه‌رمدا بهێنێت و
ماچێکی خۆشه‌ویستیشم لێ بکات
من هه‌ر ده‌کڕوزێمه‌وه‌
وه‌ک منداڵێکی کۆڵان، که‌ چۆن بۆ له‌فه‌یه‌ک قاورمه‌ ده‌گری
یان دایکی له‌گه‌ڵ خۆی نایبات بۆ بازاڕ و
نایه‌ڵێت چمکێکی عه‌باکه‌ی سه‌ری بگرێت
هه‌ر ده‌گریم

من ناگریم بۆ ژیان
منی ماندوو له‌ ژیان
ته‌نها و ته‌نها بۆ مه‌رگ چاوم ته‌ڕ ده‌که‌م
بۆ مه‌رگ له‌ خۆم ده‌ده‌م
به‌رگی سپی بۆ مه‌رگ ده‌پۆشم
نینۆکه‌ ڕه‌شهه‌ڵگه‌ڕاوه‌کانم بۆیه‌ ناکه‌م تا نه‌مرم
به‌ته‌مام
له‌گه‌ڵ خۆمدا شوشه‌ بۆیه‌ په‌مه‌ییه‌که‌م
ببه‌م بۆ ناو گڵ
با له‌وێ سپیده‌کان
په‌رییه‌ ڕاستگۆکان
که‌سانێکی تر
له‌ ئاسمانێکی تر په‌نجه‌م بۆیاخ بکه‌ن
سوراویش ناکه‌م
نه‌کا که‌سێک بێته‌ سه‌ر ڕێگام و
به‌م نیوه‌شه‌وه‌ وه‌ک خێو
لێوم به‌ماچێکی شه‌که‌ت ته‌ڕبکات و
بیرم نه‌چێته‌وه‌ تا ئه‌به‌د
نه‌کا په‌ڕه‌کانی لێوم هه‌ڵوه‌رن و
دوایی بۆنی گوڵاوم لێببڕێت
نا... سوراو ناکه‌م
هه‌ڵی ده‌گرم
تا په‌پووله‌کان ئه‌و لێوانه‌م بۆ سور بکه‌ن
ئه‌وان یه‌که‌م ماچ و
دووهه‌م ماچ و
سێهه‌م ماچ و
دواهه‌مین ماچی لێبکه‌ن
بۆ مردن
بۆ دوورکه‌وتنه‌وه
بۆ ژیانی دووای مردنیش

هااااا ...بیرت نه‌چێت
ناشمه‌وێت بۆ ساتێکی بچوکیش بخه‌وم
هه‌ز ده‌که‌م
ته‌نها چاوم له‌ ئامێزی قه‌بردا بچێته‌ خه‌و

ئایییی ئه‌مشه‌و
من هه‌ر له‌وێ هاوار ده‌که‌م
ده‌ناڵێنم به‌ده‌ست ژیانه‌وه‌
ده‌ڵێم توخوا وه‌رن
ئه‌وه‌ سه‌ری من و ئه‌وه‌ پێله‌قه‌ی ئێوه
ئه‌وه ناوچه‌وانی من و ئه‌وه‌ تفی بۆگه‌نی ئێوه‌‌
ئه‌وه‌ دڵی من و ئه‌وه‌ چنگ و نینۆکی چڵکنی ئێوه
بیگوشن و خوێنه‌که‌ی دڵم بۆخۆتان به‌رن!‌
ئه‌وه‌ش جه‌سته‌م و ئه‌وه‌ فیشه‌کی ئێوه‌
ئه‌وه خاکی به‌ر پێتان و ئه‌وه‌ش پاچی ئێوه‌
هه‌ڵیکه‌نن گۆڕێک بۆم له‌ ته‌نهایی
گۆڕێک
نزیک له‌و ده‌نگانه‌ی، که‌ پێی ناگه‌م
له‌و خۆشه‌ویستیه‌ی، که‌ نایبینم و نه‌مدیوه‌
نزیکتر له‌و رۆحانه‌ی
که‌ سنگیان بۆ مه‌رگ کردۆته‌وه‌
له‌ هه‌موشیان نزیکتر له‌م دڵه‌ی من
که‌ جارێک ڕۆشنایی نه‌دیوه

ئه‌مشه‌و‌
هه‌ر ده‌ڕۆم و ڕێده‌که‌م
به‌ناو تاریکیدا ده‌ناڵێنم
جل و به‌رگم شڕو پڕ ده‌بێت
ده‌نگم ده‌نوسێت و
وه‌ک ئاوازی ده‌نگی ژنێکی به‌ساڵاچوو ناخۆش ده‌بێت
چیتر ناتوانم بقیژێنم به‌گوێچکه‌ی که‌ڕی ژیاندا
ده‌سته‌کانم ده‌که‌ونه‌ له‌رزین و
پیاڵه‌یه‌ک زوخاویتریشم پێهه‌ڵناگیرێت!!!
ئیتر گۆچانی پیریش خۆیم لێده‌دزێته‌وه‌
سه‌رم سپی ده‌بێت و
پڕی ده‌بێت
له‌ ڕشک و ئه‌سپێی چاوزه‌ق و برسی
چاوه‌کانم له‌ بینین ده‌که‌ون و
ته‌نانه‌ت تارمای و
سێبه‌ره‌کانیشی پێنابینم
قاچه‌کانم له‌ پێ ده‌که‌ون و
ئیتر ناتوانم ئه‌و ڕێگایه‌ ببڕم بۆلای مردن
که‌فته‌کاری سه‌ر جێ ده‌بم و
نوزه‌ی ده‌نگم ده‌رنایه‌ت
به‌ڵام هه‌ر چاوه‌ڕوانم
گوێم هه‌ڵخستووه‌ بۆ خشپه‌یه‌ک
له‌لای مه‌رگه‌وه‌ بێت
له‌ ده‌رگای ژووره‌ ساردو سڕه‌که‌م بدات و
ده‌ست بنێت به‌ په‌نجه‌ره‌ که‌ڕووخواردووه‌که‌مدا و
له‌وێوه‌ ڕۆحم فێری فڕین بکات به‌ره‌و کۆتایی

من
له‌ شوێنێکی قووڵتر له‌ ڕۆحمدا
قوڵتر له‌ هاوارکردن به‌ تاریکیدا
هه‌ر ده‌گه‌ڕێم
هه‌ر سۆراخده‌که‌م
هه‌ر ڕاده‌که‌م
له‌ دامێنی چیاکان ده‌پاڕێمه‌وه‌
له‌قه‌راغه‌کانی تاریکییه‌وه‌
هه‌ڕه‌شه‌ی فڕێدانی خۆم ده‌که‌م به‌ناو درۆکانی زه‌ویدا
قه‌ڵه‌مبازی گه‌وره‌ گه‌وره‌ ده‌نێم
به‌ناو زۆنگاو و بڵێسه‌ شوومه‌کانی (با) دا
له‌سه‌ر سنووره‌کانی شێتی گیرۆده‌ی به‌زۆر ژیان ده‌بم
تکا له‌ ئه‌ندێشه‌و و ڕاسته‌قینه‌ی بیابان ده‌که‌م
به‌ناو کێڵگه‌ و ڕه‌زه‌ کرمێیاوییه‌کاندا ڕاده‌که‌م
له‌که‌نار ڕووباره‌ بێئاگاکان
وه‌ک گه‌ڕۆکێکی نائاسوده‌
هه‌ڵوێسته‌ ده‌که‌م و
ده‌پاڕێمه‌وه‌ له‌ ئاو!!!!!

ئه‌مشه‌و
به‌ شێتی خۆم پێده‌که‌نم و
که‌چی خه‌نده‌کانم پڕ ده‌بن له‌ گریان
قاقاکانم لافاوی فرمێسک دروست ده‌که‌ن و
هه‌رچی خۆڵی ژێر پێم و به‌رده‌میشم هه‌یه‌
له‌ گۆڕستانێکی غه‌مگین و بێپاسه‌وان ده‌چن

ئاخخخخ .. ئاخخخ خوایه‌ گیان
که‌ تامه‌زرۆی مه‌رگم
من
هه‌ر له‌دووی مه‌رگ وێڵم و ده‌گه‌ڕێم
به‌به‌رده‌وامی
هه‌نگاو به‌نێو وه‌نه‌وز و شه‌که‌تیمدا ده‌نێم
بۆ دووباره‌ زیندوکردنه‌وه‌ی خه‌ونه‌ ئه‌رخه‌وانییه‌کانم
بۆ بینینی کڵپه‌ به‌ تینه‌کانی ئێوارانی مه‌رگ و
جاده‌ قه‌ره‌باڵغه‌کانی زیزبوون له‌ ژیان ده‌ڕۆم
له‌ خوێنی ئه‌م ته‌نهاییه‌دا مه‌له‌ ده‌که‌م
ده‌فڕم
ڕاده‌که‌م
هه‌ر پێی ناگه‌م
هه‌ر کۆڵناده‌م
وازناهێنم
هه‌ر به‌دووای مه‌رگدا ده‌گه‌ڕێم تا ده‌یدۆزمه‌وه‌ !

دڵنیام
ڕۆژێک دێت و
مه‌رگ خۆی پێشوازیم لێده‌کات
به‌ڵام
به‌ر له‌وه‌ی مه‌رگ پێشوازیم لێبکات
وازم لێبهێنن
با خۆم ده‌رگاکه‌ی بۆ بخه‌مه‌ سه‌ر پشت !!!
من هه‌ر ده‌گه‌ڕێم به‌دوای مه‌رگدا
هه‌ر ده‌گه‌ڕێم .......

Sara Omer

تێبینی :
جره‌به‌گزاده‌ : مه‌لێکی ره‌نگاو ره‌نگی جوانه
جرپوجۆپ : هه‌ڵبه‌ز و دابه‌زی بێفایده
کروشمه‌کردو : کز ، مات
ئه‌سانسیر : گه‌یه‌نه‌ر