شعر كردي ...

[behnam5555]

کووچه‌

تۆ نه‌بووی، مانگه‌ شه‌وێ چوومه‌وه‌‌ به‌و کووچه‌یه‌ دا

هه‌موو گیانم بووه‌ چاو و، له‌وێ بۆ تۆ ده‌گه‌ڕا
له‌ حه‌ز و تاسه‌ وه‌ها پڕ بوو دڵم ، لێی ده‌ڕژا
سه‌ری هه‌ڵدایه‌وه‌ ئه‌و عیشقه‌ که‌ جاران
له‌ که‌ژ و کێوی ده‌دا
له‌ هه‌موو چۆڵی ده‌روونم گوڵی یادت ده‌ڕوا،
ده‌می سه‌د بیره‌وه‌ری پێده‌که‌نی،
عه‌تری سه‌د بیره‌وه‌ری بوو ده‌گه‌ڕا.

هاته‌‌ بیرم که‌ شه‌وێ
پێکه‌وه‌ له‌و کووچه‌یه‌‌ بووین
به‌ په‌ڕوباڵی ئه‌وین
کوێیه‌ که‌ دڵگر بوو، ده‌چووین.

له‌سه‌ر ئه‌و جۆگه‌یه‌ ساتێ به‌ وچان دانیشتین.
تۆ هه‌موو ڕازی جیهان مه‌یبوو له‌ نێو چاوی ڕه‌شت
من توابوومه‌وه‌ به‌و تینی نیگای گه‌رم و گه‌شت.
شین و ساماڵ بوو شه‌و و،
هێمن و مه‌ند و ئارام،
به‌ختی گه‌ش‌ پێده‌که‌نی و،
ده‌وری زه‌مان ئه‌سپی ڕام.

مانگه‌شه‌و هێنده‌ نه‌وی،
هێشووه‌ گزنگی له‌ ده‌راو هه‌ڵدێنا
دار هه‌موو ده‌ستی لق و پۆپی به‌ره‌و
مانگی ته‌واو هه‌ڵدێنا.

شه‌و و، کۆڵان و، گوڵ و، ده‌شت و په‌رێز
هه‌موو گوێی دابووه‌ ‌ئاوازی مه‌لی شه‌وئاوێز.

دێته‌ بیرم که‌ وتت: ”واز له‌ ئه‌وینم بێنه!‌
”وه‌ره‌ بڕوانه‌ له‌ ئاو، تۆ له‌ خوڕه‌ی ڕامێنه‌ ‌ ‌ ‌
”وه‌کوو عیشق تێده‌په‌ڕێ، سه‌یری که‌ ئه‌م ئاوێنه‌!
”گه‌ر به‌ عیشقی منه‌ ئه‌مڕۆ دڵی تۆ دێته‌ سوێ‌ ‌
”چ ده‌زانی که‌ سبه‌ی چیده‌وێ، ده‌تباته‌ کوێ؟
”تا فه‌رامۆشی بکه‌ی تۆ که‌ گرفتاری منی،
”بڕۆ له‌م شاره‌ مه‌مێنه‌، بڕۆ جێگایه‌کی دی!“

من وتم: ”کوانێ ده‌توانم له‌ ئه‌وینت لاده‌م؟
”چۆن بڕۆم؟ خۆ له‌ نه‌هاتی سه‌فه‌ری وا ناده‌م.
”ڕۆژی ئه‌ووه‌ڵ که‌ دڵم باڵ و په‌ڕی گرت به‌ هه‌وات
”وه‌کوو کۆتر ده‌فڕی ده‌نگی شه‌قه‌ی باڵی ده‌هات،
”هاته‌ گوێسوانه‌یی تۆ و ئیدی نه‌ڕۆی، نیشته‌وه‌ لات.
” نه‌ڕه‌وی لێت، نه‌فڕی ئه‌و به‌ هه‌موو به‌ردی جه‌فات.“
ئه‌وه‌شم وت که‌: ”وه‌ره‌! جوانێ ئه‌گه‌ر ڕاوچی ‌تۆی،
”ئه‌وه‌تا ئاسکی دڵم که‌وته‌ هه‌واری ڕاوت
”ده‌ر و ده‌شتان ده‌گه‌ڕێ
تا بکه‌وێته‌‌ داوت.
”ئه‌وه‌ داوا مه‌که‌ لێم، خۆ له‌ ئه‌وینت لاده‌م
”پێم له‌ گه‌ڵ نایه‌ بڕۆم، قه‌ت سه‌فه‌ری وا ناکه‌م.“

له‌ لقی داره‌که‌وه‌، قه‌تره‌‌یێ ئه‌سرین باری
مه‌لی شه‌و ناڵه‌یه‌کی کرد له‌‌ دڵی زاماری
ته‌ڕ ببوو چاوه‌که‌ت و دیم که‌ نمی تێزابوو
مانگه‌شه‌و پێده‌که‌نی هێنده‌ سه‌ری سوڕمابوو.
دێته‌ بیرم که‌ خه‌مۆش بووی و چ ده‌نگت نه‌ده‌‌هات
دڵی من مایه‌وه‌ بۆ حه‌سره‌ت و بۆ ده‌رد و به‌ڵات
دڵ هه‌ر ئه‌و کۆتری جاران بوو که‌ هه‌ڵنه‌فڕی له‌ لات.

به‌ غه‌م و ناڵه‌ به‌سه‌رچوو شه‌وه‌که و،‌
به‌ خه‌فه‌ت زۆری تریش هاته‌وه‌ شه‌وگاری وا؛
نه‌بوو جارێ که‌ بپرسی له‌ دڵێ لێت ڕه‌نجا
نه‌بوو جارێ به‌ گوزه‌ر بێیه‌وه‌ به‌و ژوانگه‌یه‌دا ،

من به‌ڵام ...
چۆن؟ به‌ چ حاڵێک
به‌ ته‌نێ چوومه‌وه‌ به‌و کووچه‌یه دا!

[behnam5555]

وه‌ره‌ پرسیار له‌به‌رد بکه‌ین

له‌ ده‌روونی ئاوێنه‌کان بۆ ده‌ڕوانی ؟ چت لێ ده‌وێن؟

وه‌ره‌ پرسیار له‌ به‌رد بکه‌ین،
بابزانین له‌ چیرۆکی به‌سه‌رهاتی ئێمه‌مانان چ ده‌زانێ؟
وه‌ره‌ پرسیار له‌ به‌رد بکه‌ین، چونکه‌ له‌به‌رد به‌ولاوه‌تر
که‌س نییه‌ که‌س، که‌ چیرۆکی به‌سه‌رهاتی مه‌ بزانێ.
هه‌مووکاتێک، ئه‌وه‌ی لێمان له‌هه‌موو که‌س نزیکتره‌
ته‌نها به‌رده‌!
هه‌میشه‌ له‌ هه‌موان نزیکتر!
تۆ بڕوانه‌!
نیگای هه‌مووان به‌رده ‌و دڵی هه‌مووان به‌رده‌ و
به‌رده‌کانیش چه‌نده‌ سه‌ختن....
چ به‌ردبارانێکه‌ .... هاوار.
وا گریمان به‌ درێژایی هه‌موو عومرت هه‌ر هه‌ڵاتی
په‌نا بۆ کوێ ده‌به‌ی؟
خانه‌ی خوداش به‌رده‌!

به‌ چیرۆکی غه‌ریبانه‌ی خۆم بمبه‌خشن
که‌ من – که‌ سه‌نگی سه‌بوورم–
نه‌ به‌ردم و نه‌ خاوه‌نی سه‌بر و تاقه‌ت.

دڵ که‌ پڕ بوو له‌ خه‌م ده‌شکێ
چ جێگای دڵ، له‌م ماڵه‌دا به‌ردیش ده‌شکێ.
له‌و جێگایه‌ی خوێن له‌گه‌رووی شمشاڵ ده‌تکێ
سه‌یره‌ ئه‌گه‌ر سازێک کوڵی گریانی بێ؟

وه‌ره‌ پرسیار له‌به‌رد بکه‌ین
بابزانین له‌ چیرۆکی به‌سه‌رهاتی ئێمه‌مانان چ ده‌زانێ؟
چونکه‌ ئه‌نجامی کاری جام له‌گه‌ڵ به‌رده‌.
وه‌ره‌ پرسیار له‌به‌رد بکه‌ین.
دواڕۆژ چییه‌ بێجگه‌ له‌وه‌ی
هه‌موو ده‌چینه‌ ژێر به‌رد و
ناومان له‌سه‌ر به‌رد ده‌نووسرێ!
له‌ ده‌روونی ئاوێنه‌کان بۆ ده‌ڕوانی ؟ چت لێ ده‌وێن؟

[behnam5555]

ئاره‌شی که‌مانگیر

سیاوه‌شی که‌سرایی

کڕێوه‌یه‌ و به‌ فر ئه‌بارێ
به‌ سه‌ر دڕک وگاشه‌به‌رد دا
چیا خامۆش
سه‌ری لووتکه‌ له‌ ته‌م ده‌سوێ،
ده‌ربه‌ند دڵته‌نگ
مژی خه‌می لێ هه‌ڵده‌ستێ،
ڕێگه‌ چۆڵ و، چاوه‌ڕوانه‌
ده‌نگی زه‌نگی کاروانێکی بگاته‌ گوێ

[behnam5555]

به‌هارى دڵشکاو

به‌هار هات و گوڵ و نه‌سرینه‌که‌م نا
شنه‌ش هات بۆنى نه‌ورۆزى نه‌هێنا
مه‌لان هاتن، گوڵانى ده‌شت‌وده‌ر نین
ئه‌رێ بۆچى گوڵ و مه‌ل هاوسه‌فه‌ر نین؟
گوڵستان چى به‌ سه‌ر هات، چى به‌ سه‌ر هات؟
که‌ ئایینى به‌هاران نایه‌ته‌ یاد؟
هه‌ور بۆچى ده‌ناڵێنێ به‌یانى؟
ده‌ڵێ چى وا به‌ گرمه‌ى پڕ له‌ ژانى؟
له‌ به‌ر چى گوڵ دڵى پڕ له‌ برینه‌؟
چ قه‌وماوه‌ له‌ بولبول وا خه‌مینه‌؟
چ ژانێکه‌، چ ژانێکه‌ به‌ ناسۆر،
که‌ گوڵزارى وه‌ها خسته‌ شه‌ڕوشۆر؟
شنه‌ بۆچى هه‌مووى هه‌ر بۆنى خوێنه‌؟
وه‌نه‌وشه‌ چۆنه‌ ئاوا مل به‌ کوێنه‌؟
گوڵى نێرگز له‌ به‌ر چى سه‌رنه‌وى بوو؟
چ بوو قومرى غه‌ریب هات و غه‌ریب چوو؟
له‌ به‌ر چى باڵى په‌روانه‌ شکاوه‌؟
له‌ گشت لا بۆ غوبارى غه‌م پژاوه‌؟
له‌ به‌ر چى ده‌نگى خۆشخوان نایه‌ ئه‌مڕۆ؟
نه‌ما ده‌نگت، له‌ کوێى ساقى، له‌ کوێى تۆ؟
چ ده‌ردێک هات که‌ ئه‌م ده‌شته‌ى ته‌نیوه‌؟
چ ده‌شتێکه‌ که‌وا ڕه‌نگى په‌ڕیوه‌؟
له‌ به‌ر چى خۆر خه‌وى لێکه‌وت و نه‌بزووت؟
به‌هار هات و گوڵى نه‌ورۆز نه‌پشکووت؟
گوڵ و خۆر کام قسه‌ى تاڵیان له‌ کێ بیست؟
که‌ ئه‌م لێوى کرۆشت، ئه‌و مه‌رگى خۆى ویست؟
ده‌ڵێى گوڵ تازه‌بووکى نامراده‌،
که‌ زاوا ڕۆى و... په‌رده‌ش، پڕ له‌ یاده‌
ده‌یندارى زه‌وى بوو خۆر، دیاره‌
له‌ خوێنى هه‌ر شه‌هیدێک شه‌رمه‌زاره‌
به‌هارێ! سه‌رهه‌ڵێنه‌، بێره‌ بۆ لام
بزه‌ت بێتێ، له‌ خه‌م ده‌ربێنه‌ دنیام
به‌هارێ! هه‌سته‌، به‌و هه‌ورى قه‌ده‌م خۆش
بڵێ تێراو بکا ده‌شتى سه‌وزپۆش
له‌ ڕه‌نگ و بۆ زویرن، زه‌رد و بێبۆن،
که‌ سه‌رو و یاسه‌مه‌ن هه‌رچاوه‌ڕێى تۆن
نه‌وایى نوێى ده‌وێ باڵدارى بێجووت
له‌ ته‌نیایى وه‌ڕه‌ز بوو، وا دڵى سووت
له‌ قۆڵ ده‌ربێنه‌ ده‌ستى گوڵ پژێنت!
به‌ سه‌وزه‌ گوڵ ببه‌خشێ، پێ و شوێنت
له‌ تارا ده‌ربخه‌ نۆ بووکى سه‌رچڵ
که‌ نه‌شکێنێ خه‌فه‌ت ئه‌ستونده‌کى دڵ
نه‌سیمى به‌ربه‌یان با بێ به‌جارێ
خه‌وى به‌فرین له‌ چاوى گوڵ بتارێ
به‌هارێ! سه‌یرى که‌، خاکى به‌ڵاگر
که‌ چۆن که‌وتۆته‌ ژێر بارانی ئاگر
به‌هارێ! سه‌یرى که‌، خاکى خه‌فه‌تپێژ
که‌ چۆن هه‌ر پنجه‌دڕکێک بۆته‌ خوێنرێژ!
به‌هارێ! چاو بگێڕه‌، ده‌شتى غه‌مناک
له‌ هه‌رلا کوشته‌یه‌ک که‌وتۆته‌ سه‌ر خاک
به‌هارێ! سه‌یرى که‌، کێو و ده‌ر و دۆڵ
هه‌موو هه‌ر خوێنه‌، بێده‌نگ و کپ و چۆڵ
به‌هارێ! پڕ به‌ کۆشت لاله‌ بێنه‌
له‌ سه‌رى گۆڕى عه‌زیزان، بیوه‌رێنه‌!
دڵى شووشه‌ و قه‌دى سوورگوڵ شکاون
شه‌راب و سووره‌گوڵ وا تێکڕژاون
له‌ هه‌ر دووکیان گڕێک هه‌ستێنه‌ تاوێ
په‌ڵاسی ده‌رد و ژانى تێ‌بهاوێ
به‌هارێ! سۆزى عیشقم باوه‌شێن که‌
به‌ شیر و شه‌کرى ئه‌و عیشقه‌م هه‌وێن که‌!
سه‌رێ بمکه‌ به‌ هاژه‌ى جۆیباران
سه‌رێ بمکه‌ برووسکه‌ى روونى ئاسمان
وه‌ره‌ بمکه‌ به‌ هه‌ورێکى ڕق ئه‌ستوور
که‌ گرمه‌م، پڕ بکا خوار و سه‌ر و ژوور
به‌هارێ! هه‌ر بژى، بژوێنى ژینى
که‌ وه‌رزى خۆره‌تاو، کانى ئه‌وینى
ئه‌مێستاکه‌ش، جه‌وانى لێره‌ ماوه‌
نه‌فه‌س گه‌رمه‌ و، ئه‌وین جێگه‌ى هه‌راوه‌
مه‌ڵێ دارێک شکا و ئیتر وشک بوو
سبه‌ینێ هاکا دیتت خه‌ڵفى هه‌ڵچوو
مه‌ڵێ ئه‌م سه‌رزه‌مینه‌ شۆره‌کاته‌
سبه‌ى، کاتێ به‌هار هات، سووروساته‌
به‌هارێ! گه‌ر بمێنى له‌م دیاره‌
ده‌بینى خوێنى نێو خاک، ئه‌م به‌هاره‌...
هه‌تا پشتێن گوڵاڵه‌ى سوور ده‌هێنێ
وه‌کوو ئاگر له‌ دووکه‌ڵ سه‌ر ده‌رێنێ
گوڵى سوور دێته‌وه‌ به‌رده‌رکى ماڵێ
ئه‌گه‌رچى سه‌د خه‌زانیش ڕاى بماڵێ
به‌هارێ! خۆش بژى و هه‌ر خۆش بمێنى
خه‌ڵاتى گوڵ بکه‌یت و لێى بسێنى
ته‌مه‌ن مه‌ودا بدا سه‌ر هه‌ڵده‌هێنین
دڵ و گیان لێک ده‌ئاڵێنین، ده‌مێنین
ئه‌گه‌ر ئاگر له‌ ڕێ بێت و ئه‌گه‌ر خوێن
شه‌پۆل بێ و گه‌رده‌لوول بێ، ئێمه‌ هه‌ر دێین
که‌ ئه‌مجار هاتى ژینت شادمان بێ
سه‌رت سه‌وز و دڵت هه‌ر ئاوه‌دان بێ
که‌ نه‌ورۆزێکى دی هاتیته‌ دیدار
به‌ ئایینێکی دی بتبینم ئه‌مجار

م : بریا کاکه سوری

[behnam5555]

ئەرخەوان

هووشەنگی ئیبتیهاج

دار ئه‌رخه‌وان!
ئه‌ى هاوخوێنى لق له‌ جه‌سته‌ى خۆم دابڕاو
ئاسمانه‌که‌ى سه‌ر سه‌رى تۆ
ئه‌مڕۆ ڕه‌نگى چ ده‌نوێنێ؟
خۆره‌تاوى گه‌ش و ڕوون و گه‌رمابه‌خشه‌؟
یان هێشتاکه‌
ته‌م و مژى خۆڵه‌مێشی ده‌بارێنێ؟
ئه‌من لێره‌
له‌م گۆشه‌ ته‌ریکه‌ى ده‌ره‌وه‌ى جیهاندا
تاقى شینى هیچ ئاسمانێک
به‌دى ناکه‌م له‌سه‌ر سه‌رم.
له‌ هاتن و ڕۆیشتنى قافڵه‌ى به‌هار
بێخه‌به‌رم.
له‌ چوار ده‌ورم
دیوارێکى ڕه‌ش و ئه‌ستوور؛
هێند نزیکه‌
ئه‌و کاتانه‌ى که‌ هه‌ناسه‌
له‌ سنگمه‌وه‌ دێته‌ ده‌رێ
ئه‌و ڕێگاکه‌ى لێ ده‌ته‌نى و
به‌ ڕووى خۆمدا ده‌یپژێنێ
شووره‌ى ده‌ورم وا ته‌نراوه‌
دواى هه‌نگاوێک
باڵه‌کانى مه‌لى نیگام لێ ده‌شکێنێ.
ورشه‌ى کزى چرایه‌کى زه‌رد و نه‌خۆش
تا به‌یانى
چیرۆکبێژى تاریکانى شه‌وانه‌مه‌
ئه‌ویش بزه‌ى لێ تۆراوه‌.
هه‌ناسه‌م ته‌نگ؛
لێره‌ هه‌وا و سروه‌ى شنه‌ش
هه‌ر وه‌کوو خۆم
بێجووڵه‌یه‌ و به‌ند کراوه‌.

له‌م قوژبنه‌ خامۆشه‌دا
له‌ نێو خولیا و خه‌یاڵى من
یادێک چه‌ترى ڕه‌نگاوڕه‌نگى په‌ڕوباڵى خۆى ده‌نگێوێ و
له‌ گه‌روومدا
کوڵى گریان هه‌ڵده‌ستێنێ:
ئه‌رخه‌وانه‌که‌ى من له‌وێ،
ئه‌رخه‌وانه‌که‌ى من ته‌نیا،
ئه‌رخه‌وانه‌که‌ى من ده‌گرى.
وه‌ک دڵه‌ خوێناوییه‌که‌ى خۆم
فرمێسکى سوور ده‌وه‌رێنێ.

دار ئه‌رخه‌وان!
ئه‌مه‌ چ ڕەمز و ڕازێکه‌
له‌ گه‌ڵ هه‌موو کوچبارێکى به‌هارانه،‌
له‌ گه‌ڵ برینى ته‌شه‌نا و
له‌ گه‌ڵ شه‌پۆڕى شیوه‌ن و تازیه‌باریى دڵى ئێمه‌
سه‌رهه‌ڵده‌دا؟
هه‌موو ساڵێ
خوێنى په‌ره‌سێلکه‌ى عاشق
وشکه‌ زه‌وى تێرئاو ده‌کا.

دار ئه‌رخه‌وان!
ئه‌ى په‌نجه‌ى خوێناویى زه‌وى!
تۆ داوێنى به‌یان بگره‌ و
له‌ سوار چاکى تیژ تێپه‌ڕى خۆر بپرسه‌
که‌ى دەبێ، که‌ى
به‌ مه‌ڵبه‌ندى شیو و دۆڵى ئه‌م خه‌مه‌مدا
بێن تێپه‌ڕن؟

دار ئه‌رخه‌وان!
ئه‌ى هێشووى خوێن!
به‌ربه‌یانان که‌ کۆتره‌کان
له‌ لێوارى به‌ر په‌نجه‌ره‌ى کازیوه‌ دا
ده‌گمێنن
تۆ ئه‌م گیانه‌ گوڵڕه‌نگه‌ى من
بنى سه‌ر ده‌ست
بیبه‌ ته‌ماشاى هه‌ڵفڕین.
ده‌خێراکه‌
هه‌ڤاڵانى وه‌ڕێکه‌وتووى ئه‌م ڕێگایه‌
چاوه‌ڕوانى هاوسه‌فه‌رن!
دار ئه‌رخه‌وان!
ئه‌ى به‌یداخى گوڵ‌گوڵینى وه‌رزى به‌هار!
تۆ بشنێوه‌ و گه‌ردن هه‌ڵکه‌
چاوم له‌ ڕاشه‌کانت بێ.
تۆ شێعرى خوێنبارى منى
چه‌ترى یادى ڕه‌نگاوڕه‌نگى ڕه‌فیقانم
با که‌لامى گوڵشکۆفه‌ى زمانت بێ.
ده‌نگ هه‌ڵبڕه‌، دار ئه‌رخه‌وان!
ئه‌ى شێعرى هێشتا نه‌وتراو!
ئه‌ى هاوخوێنى لق له‌ جه‌سته‌ى خۆم
دابڕاو!

[behnam5555]

گۆرانیی گەورەترین ئارەزوو

ئە حمە دی شاملوو

ئاخ! ئه‌گه‌ر ئازادى سروودێکى وتبا
بچووک
هێنده‌ى گه‌رووى باڵنده‌یه‌ک،
له‌ هیچ کوێ دیواره‌ ڕووخاوێک نه‌ده‌ما.

ساڵیانى ساڵ پێنه‌ده‌چوو
په‌ى به‌م حه‌قیقه‌ته‌ به‌رى
که‌ هه‌ر کاول و وێرانه‌یه‌ک نیشانێکه‌ له‌ ته‌ره‌بوونى ئینسانێک
که‌ ئینسان خۆى
هه‌وێنى ئاوه‌دانییه‌.

1
وه‌ک برینێک
به‌ درێژایى هه‌موو ژیان
خوێناوى لێ بتکێته‌وه‌
وه‌ک برینێک
به‌ درێژایى هه‌موو ژیان
به‌ وشکه‌ژانێک چڵ بدا و
به‌ گه‌رماى خۆى بکولێته‌وه‌،
به‌ هاوارێک چاوهه‌ڵێنان
به‌ نه‌فره‌تێک
له‌ قالبى خۆهه‌ڵبڕان،_

ئاوا له‌ خۆمان ته‌ره‌ بووین
به‌ سه‌رهاتى وێرانه‌ ئاوا بوو.

1
ئاخ ئه‌گه‌ر ئازادى سروودێکى وتبا
بچووک بچووک
چکۆله‌تر ته‌نانه‌ت له‌
کونى گه‌رووى باڵنده‌یه‌ک!

[behnam5555]

ئەحمەدی شاملوو: چاوەکانم

ئەحمەدی شاملوو

سەرم سوڕما
لە حەیرەتی ئەم بەربەیانە ناوەختەو
چاوەکانم نەدەترووکان
لەبەر ڕووناکیی دەربیجەی خۆرەتاوی تیشکهاوێژ
بەنێوچاوانی کازیوەی ئەم‌ڕۆژەوە
کە ژانی زانی گرتووە و،
ئەمن هەرتک دەستی خۆمم
لە زنجیری خەو
ڕزگارکرد.
هاوارم کرد
"ئەوەتانێ ئەوە چرای موعجیزەیە،
وەرن خەڵکە!
بە چاوانی کوێرەوەبووی دڵ و دەروون
ئەگەر هێشتا تین و سۆمای ئەوەی ماوە
کە نیوەشەو لە کازیوە جیا کاتەوە
هەتا لە کیستان نەچووە
وەرن تەماشای کەن تێرتێر
کە خۆرەتاو
بە ئاسمانی شەوەزەنگدا
باڵی گرتووە، هەڵفڕیوە!

بەهەرتک گوێی کپ‌ئاخنراو
گوێ بدەنە ئەم نەغمەیە
کە خۆرەتاو
لە نیو-پەردەی شەوەزەنگدا
دەنگی بەستەی هەڵبڕیوە"


"- دیمان!
(نیوەی خەڵک وتیان)
ئەرێ! دیمان کە خۆرەتاو باڵی گرتووە هەڵفڕیوە!"

نیوەی دیکەشیان بە شادی
لەدڵەوە هاواریان کرد:
"- بە گوێی گیانمان دەنگی بەستەی بلاوێنی خۆرەتاومان
هەڵمژتووە".

ئەمجار ئەمن
سەری کاسی سەرسوڕمانم بۆ لەقاندن:
"نارەوایە،
نەبیستراوە
قەت نەکراوە
هۆ خەڵکینە!
ئێوە مەست و وڕوکاسن
یان بە ئەنقەست
خۆتانی لێ نەبان دەکەن؟
شەو هێشتاکە دوو دانگی‌تر لە دوویەتی.
ئەگەر ئێوە موسوڵمانی تۆبەکار و نەزەرپاکن،
کەی دیوتانە
کە چاوەشان
بانگی نوێژی بەیان بدەن؟
o

گەندەزەلکەی قووڵکەی دەمی هەر مانگایەک
لە من دەبوو بە بورکانی تووڕەیی و ڕق:

"- وەرن لەو گەوجە بڕوانن، بۆ ڕووناکیی خۆرەتاویش
هاتووە ئێمە سوێندی بۆ بخۆین."

تۆفانی پێکەنین هەستا ...

"- خۆرەتاوی گەش نابینێ
بەتەمایە
کوترەکوتر، بە دەستەکی سەعاتەکەی سەر دیواری،
بە کۆمەڵی خەڵکی هەژار بسەلمێنێ
کە شەو هێشتا
لە نیوەشی تێپەڕ نەبووە."

تۆفانی پێکەنین هەستا...
o

من
برک و ژان لە دەمارم
حەسرەت لە مۆخی ئێسقانم
شتێکی چەشنی ئاگریش لە سەرتاپێی گیانم
گەڕا.

شتێک دەتگوت سەرتاخواری ئازای لەشمی
لە نێو چنگی خۆیدا گوشی
تا دڵۆپێک وەک قرچەی خۆر
لە هەرتک چاوم هەڵقوڵی
لە تاڵاوی گشت دەریاکان
پیاڵەیەکم هەڵچۆڕاندە نێو فرمێسکی داماویی خۆم.

ئەوان عەوداڵ و دڵبەستەی خۆرەتاو بوون
چون خۆرەتاو
تەنیاترین حەقیقەت بوو لەلایان و
چەژەی تامی واقعییەت
لە ژینیاندا.

بە ڕووناکی و بە گەرماکەی
مانای بێگەرد و بێ‌ڕیای دۆستایەتی و
بە پرشنگی گەشی خۆشی
مانای بێخەوش و ساکاری ڕاستگۆیی بوو.

(هەزار خۆزگە توانیبایان
لە خۆرەتاوەوە فێر بن
کە وەکوو ئەو بێدرێغ بن
لە ژان و شادییەکانیاندا
تەنانەت
بە نانی وشکی سفرەی ماڵیان-.
قەتیش چەقۆ لە کالانێ دەرنەهێنن
ڕۆژی دابەشکردن نەبێ.)
o

حەیف و جەخار
کە خۆرەتاو
هەر خۆی مانای دادگەری بوو،
ئەمانیش عەوداڵ و دڵبەستەی داد بوون و
ئێستاکە وا
بەم شێوەیە
بە دێوجامەی خۆرەتاوێک
دڵیان بردبوون.

ئەی خۆزگە من بمتوانیبا
خوێنی دەمارەکانی خۆم
دڵۆپ
دڵۆپ
دڵۆپ
بگریم
هەتا باوەڕم پێ بکەن.

ئەی خۆزگە من بمتوانیبا
-بۆ یەک لەحزە بمتوانیبایە ئەی خۆزگە-
ئاپوورەی ئەم جەماوەرە بێ‌ئەژمارە
بنێمە سەر هەرتک شانم
بە چوار دەوری گۆی زەویدا بیانگێڕم
تا بە هەرتک چاوی خۆیان ببینن کە
خۆرەتاویان لە کام لایە و
بڕوام پێ بکەن.

ئەی خۆزگە
بمتوانیبا!

[behnam5555]

ته‌رمی لێڕ

... ڕێبوارێک

جگه‌ره‌یه‌کی فڕکدا..........

دارستانێک سووتا............

کیسه‌ڵێک ته‌قا.....

روانه‌وه‌

... شنه‌یه‌ک...

... تۆفانێک...

دار به‌ڕویه‌ک رما

ده‌نکێک له‌ بنیه‌وه‌ رووا...!

سه‌ردار

... ژنێک...

... کوته‌کێک...

... مارێکی سه‌ربڕاو...!

نزیکی بزر

وه‌یلان

وه‌یلان

وێڵ

له‌کام ئه‌ستێره‌دا بتدۆزمه‌وه‌!؟

ئه‌ی نزیکی بزر بوو له‌ من!؟

چرای ته‌مه‌ن

تک.....!

تک.....!

تک.....!

توایه‌وه‌

به‌فری کوێستانی ته‌م گرتووی دڵم

که‌ چرای ته‌مه‌نت هه‌ڵگرسایه‌وه‌.....!

تراویلکه

من...
تۆ...
ئه‌و...
هه‌ر هه‌‌مومان.....!
ئوقیانووسین.....!
به‌س تراویلکه‌.....!

وبلاگ عبدالرحمن رحيمي نيا

[behnam5555]

ستران

... لانکێک...

منداڵێک...

دایکێکی گۆرانی بێژ....

تاق تاق

مانگه‌شه‌و و

پۆلێک ئه‌ستێره‌...

قیژه‌ی ژیژگ و

ده‌نگی تاقتاقکه‌ره‌...

سه‌ردار

ژنێک...

... کوته‌کێک...

... مارێکی سه‌ربڕاو...!

که‌زی زێڕت

ئه‌ی روجیاری به‌ره‌به‌یانی
ده‌م که‌لی سوورێنی مه‌زن!
زۆر جار له‌ ده‌لاقه‌ی
بیره‌وه‌رییه‌ هه‌ڵپڕووکاوه‌کانمدا
که‌زی زێڕت ده‌رده‌خه‌یت و
هه‌ر که‌ ده‌ته‌وێت شانه‌ی که‌یت
نسێی نه‌گریسی هه‌ورێک دێت و
مه‌خابن!
جه‌خار!
ئه‌م دیمه‌نه‌ یه‌زدانییه‌ به‌له‌ز ده‌شواته‌وه‌...!

هه‌تاوی سه‌هۆڵین

...و منی گێل
ده‌ستی ساردم
برده‌ ئه‌و دیو په‌نجه‌ره‌وه‌
به‌ڵکوو هه‌تاو گه‌رمی کاته‌وه‌
که‌چی نه‌مزانی
هه‌تاویش جامۆڵکه‌یه‌ سه‌هۆڵه و ئه‌توێته‌وه‌‌...!

بای ته‌مه‌ن

......شه‌نگه‌ هه‌زبێکه‌م!
نه‌م گوت ته‌مه‌ن وه‌کوو "با"یه‌
دوێنی وه‌کوو شه‌یپوور ده‌لرقاینه‌وه‌
ئه‌مڕۆ به‌زۆریش ده‌نگمان ده‌رنایه‌!!.....

هه‌ڵۆ

له‌گه‌ڵ "با"دا
چ پیرۆزه‌ ئه‌م چۆپی‌یه‌
هه‌موو جیهان
له‌ ژێر چه‌خماخه‌ی پێتا گه‌رم ئه‌بێ
ته‌نیا ده‌ستی "دۆ"ی "با" ئه‌گری
هه‌سته‌! ها، هه‌سته‌!
ئه‌م شه‌لانه‌
هاکا هه‌موو دنیای سووتاند!
هه‌سته‌!

وبلاگ عبدالرحمن رحيمي نيا

[behnam5555]

شه‌ڕ

شــــــــــار مه‌شـــــێوێنه بڕۆ ماڵه‌وه
شــه‌ڕ مه‌خه نێو كۆڕی كوڕ و كاڵه‌وه

چه‌شنی هه‌ڵۆ رایده‌پێچن نه‌چیــــــر
چاو و برۆی تیــــــــژ به سه‌ر خاڵه‌وه

بمكه به دارا به ســــــــــــه‌ردارئه‌بم
دابله‌قـــــــــێم به‌و كه‌مه‌ره‌ی لاڵه‌وه

ئاده‌مه ئه‌مــــــــــــجاره‌كه حه‌ووا نیه
ئاشقه به‌و ســـێوی چه‌نه‌ی چاڵه‌وه

ناز به ســـــــه‌ر گۆی زه‌ویدا ده‌كه‌ی
نازێ زه‌وی ، نه‌یخه‌یه ژێــــــر ناڵه‌وه

گــــرژی ، كه‌چی ‌گیان ده‌بووژێنیه‌وه!

خۆشــه به‌هار به‌و هه‌نییه‌ی تـاڵه‌وه

پۆلی نیگا،خێڵی ئه‌سێره‌ن له دووی
خۆری ‌مه‌كۆی رۆشـــنی خرخـاڵه‌وه

شار ئه‌مه‌یێ تۆ نه‌بی،نا،پاشـگه‌زم!
با بهه‌ژێ شــــــــار ، مه‌ڕۆ ماڵه‌وه !!

عبدالرحمن رحيمي نيا