ته‌مته‌مه‌لیولان

[behnam5555]

سجيليگ ئراي مه‌ليوچگ ؟

له باله‌يل بانان
بو خيون و تياره و تفه‌نگ نيه‌تيدي !
له بانان
هيوچگه سجيل دروين
ئراي « مه‌ليوچك » نيه‌وري !
له بانان
هيوچگه مال ئجاره‌ي
ئراي « سيه‌پريوسنك » و
« غلايل سه‌ره‌لي شيواي » نيه‌گري
نخته
سه‌ر تمام
« خه‌ت واحده‌يل »
له بانان ،
هيوچ چه‌مه‌نده‌فه‌ريگ
ريو ئه‌وبانان ريار نيه‌وه‌ي !
: نيوساين !؟
:ده‌س بگرنه‌وبان وه‌تم ؟!
***
كوره
له ژير سپيال شره‌گه‌يه‌و
زانس باوگي هه‌م خه‌و ديه
هه‌لساو له قه‌ي په‌ره‌ي قاقه‌ز درياييگ
نيوسا :
نخته
سه‌ر تمام كولاوانجه‌يل ولات :
له خه‌يال موئلميگ له‌ناو ئاواي بانان ،
كه‌ويگ باله‌وگرت
گ له‌قه‌ي بالي
ناونيشان وه‌هاريگ نيوسيايود
گِ پرله چيوزه‌ي دار و واران و سه‌كامه‌تي بيو
نخته
سه‌ر ...

[behnam5555]

كام دار ئراي هناسيگ ناسيده‌د ؟!

له سيوك هه‌ر كه‌ليمه‌يگ
كه‌سيگ خوه‌ي شارديه سه‌و
تِ هايده سيوك كام كه‌ليمه ؟!
له خه‌يال هه‌ر هساره‌يگ
كه‌سيگ دره‌و شيه‌يد
ت له خه‌يال كام هساره
ئه‌ول ولات بي په‌لامارا
چه‌و چه‌وه‌كي كه‌يد ؟
له ناو
وه‌لنگ هه‌ر داريگ
كه‌سيگ هناس كيشيد
ت كام دار ئراي هناسيگ
ناسيده‌د ؟!
له تيول هه‌ر شه‌وه‌كيانگ
كه‌سيگ منه‌ي خوه‌شي كه‌يد
ت خوه‌شي له گيرفان كام په‌نشه‌مه منه‌ي كه‌ي ؟
له‌سيني هه‌ر ديواريگ
ده‌روه‌چيگ چيوزه‌ دي
له كام ده‌روه‌چ
شه‌وه‌كيانيگ
ئراد باله‌وازي كه‌يد ؟!

[behnam5555]

يه‌ي شه‌وه‌كيان له پشت عيساي چه‌وكاليگ...

شه‌وه كيانيگ تيه‌مه‌و
بي هيوچ پاسبورتيگ
گ نيشان جاشه‌يل وه يل ناونكيه‌يل مه‌رگ و زنياني بيه‌م
وه خورجينيگ
پر له سيفه‌يل به‌هه‌يشت خوداي چه‌و كاليگ
وه له‌چگيگ
پر له چه‌پگه‌گوله‌يل نوئه‌يد مه‌سيحه‌يل بانان
شه‌وه‌كيان شه‌ونم و
واران وه‌هارينيگ
شاهات
ئه‌ول پرزه پرز واران نوويگا
شاهات
ئه‌ول تيوكه‌‌تيوك وه‌فره‌يل كه‌وكه‌وا
شاهات
ئه‌ول مخمه‌لين بال كال په‌پيوله‌يگا
شاهات
ئه‌ول خه‌يال وال كه‌وتره‌يل ئاسمان كورده ماليگا
شاهات
ئه‌ول هيور هيول مناله‌يل ئه‌نفالا
ـ : ته‌تق ! تق تق !
ده‌م له ده‌ر چيوين ماليگ
گ تمام ساله‌يل سه‌وز زنه‌ي
له ناوي ئرادان هيشتيومه‌جي
شه‌وه‌كيانيگ تيه‌مه‌و
گِ تفه‌نگ بووباليوت نيه‌ي
بريو منه‌ي له‌چگ نيه‌كه‌ي
گ
زامه‌يل پاچياي وه پي بوه‌سي
زاگروس
منه‌ي مناله‌يل سه‌راوه‌نيوني نيه‌كه‌ي
گ
له ژير چه‌كمه‌يل بورديزله‌يل دل كوچگين
تليقيايون ! ...
شه‌وه‌كيانيگ تيمه‌و
گ بي ئجازه‌ي حاكمه‌يل سيه‌كه‌ر
خوه‌ر نه‌مر ئاسمانه‌يل بانان
له بان كولاوانجه‌يل ريوته‌ل ولات
مه‌خش هه‌لپه‌رگه‌و
نيورو
زنياني نيوسي
شه‌وه‌كيانيگ تيه‌مه‌و
گ مانگ
له خه‌وف ورسيه‌ري بي كه‌سه‌يل ولات
شه‌واره نيه‌كه‌يدو
هساره له شه‌واره‌گه‌ي
له ناوسيني ديوه‌ته‌يل ده‌سه‌ونجي‌و جه‌ور
مه‌خش دلنيايي نيوسيد
شه‌وه‌كيانيگ تيه‌مه‌و
شاهات له‌شيوه‌ي فريشته‌يگ
شاهات له ره‌نگ هساره‌يگ
شاهات له جنس يه‌ي كه‌پو وه‌يليگ
شاهات له‌وينه‌ي واران نوويگ
گ
وه ‌كلكه‌يل نه‌رميگ
شيشه‌ي ده‌روه‌چه‌گان ته‌قني !
شاهات
له‌وينه‌ي « گلادياتوريگ »
گ له پشت عيساي چه‌وكاليگ
ئه‌ول تمام شه‌وارا
نه‌يده‌ي « كيش كه‌وان » و
رچله‌ك تيه‌ريكي دراري ...
وه گومانم وه‌ر سوو بيو
له‌خه‌و چه‌رمي هزار ويه‌ي ساله‌ي
ئيل له هيوره‌و چيا هلاژيايوم
ديم
بيومه‌سه كيوه‌يگ له كه‌ليمه‌يل ئاسنين
هه‌رشه‌وه‌كيان
هه‌ر كه‌ليمه‌يگم
بيوه « كاوه‌يگو »
له ئه‌وه‌ل سپاي زه‌حاك زمسان
به‌يداخ داكوتا
ئيواره قووشه‌ن شه‌و
له‌ت له‌تيو كردن
وه گومانم وه‌ر سوو بيو
له خه‌و چه‌رمي هزارويه‌ي ساله‌ي
ئيل له هيوره‌و جياهلاژيايوم...

[behnam5555]

له‌ناو په‌ر كوچگين تاريخ

چخچيله‌يل سقان مرديه‌يل ريوته‌ل
له شه‌و زقم وه كوول سه‌ر تاسيگ
ئراي
چه‌پليگ سه‌ونزي ،
گوپيگ ئاو و
گومه‌يليگ ئازادي
كوودتا كردن
ولام كر پاكه‌و كه‌ريگ
وه شمر ملايكه‌ت ئاته‌شه‌داريگ
تمام كه‌ليمه‌يليان
له ناو خه‌يال كتاوه‌يل ولات وه‌يل بانان وايان !
ملايكه‌ته‌يل مه‌ته‌له‌يل ولات ئيمه
تا چه‌ويان كه‌فت له هووز
تياره و
چه‌مه‌نده‌فه‌رو ماشين ،
خوه‌يان وه دزي
ريچه‌رميه‌يل ئاواو پيو ولاته‌و
غه‌لوا كردن
تا گه‌ر
خه‌يال ده‌روه‌چه‌يل چووين
پر بوود له
هناس ئيسگايل ريوئه‌و تيه‌ريكي بانان
*
له‌يره
هه‌يمان وه‌فر وه كورديه‌و واري
له‌يره
هه‌يمان به‌ريو وه كورديه‌و شووكه‌ كه‌ي
له‌يره
هه‌يمان شه‌وار وه كورديه‌و
زليمه‌ري كه‌يد
هه‌رسه‌ي
زاگروس ستيون بتيون زه‌يوه
ولام واي سيه
سه‌ر له داره‌يل و تاشه‌يل شيوانيه
هساره‌گان
له ئه‌وه‌ل شه‌ونشيني وا و زمسان
خه‌و دين
نامه‌ي دلنيايي بريويگ
ئراي تاش سه‌ر به‌رزيگ
له پاچروين كه‌فته‌و ري
له هه‌ر پاسگايك
كه‌ليمه‌يگي گله‌و دان
تا ره‌سي و پاي تاش ،
له نامه‌گه وه‌لنگ چرمييگ مه‌ن
له خه‌يال به‌ريو
شه‌ق‌رته‌يگ چه‌كياوا و
له ئيواريان سه‌رديگ
غلاسيه‌يل
له بان له‌ش وه به‌ور بيو به‌ريويگ
چه‌پله‌ريزان كردن ...
***
هه‌رسه‌ي
زاگروس ستيون بتيون زه‌يوه
ولام
هه‌ر ئيواريان
بريوگ له داواني بووده به‌ور ...
هه‌ر واهات‌و
هه‌ر واهات و
هه‌ر واهات
پرسيار تيه‌ريكيگ پرسي :
له ناونكي
كام « فه‌تاپاشاي » و « گه‌رمه‌شين »
ده‌زيونك ده‌زيوران زنه‌ي
له‌ليد دزين ؟!
م له خوه‌م چيوم
له خوه‌م وله‌هه‌رچگه فريشته‌ي چه‌و كاله !
حه‌تا
له‌ئه‌نار و واران
له رووژه‌يل ريچه‌رمي و شه‌وه‌يل گيجه‌رمي
پرسيار سمه دايودو
ده‌س له قه‌و كه‌وتره‌يل حووز زاناوا نه‌كرد
هه‌ر واهات و
هه‌ر واهات و
هه‌ر واهات

[behnam5555]

مشتیگ ماچ تیه‌ل

نه ! ده‌ر هينه‌ر !
نه ته‌نيا وه‌ت ،
وه زه‌يو و زليمه و زه‌حاك و زمسان چوه ؟!
دنياي ‌م جاي بازي ت نيه !
له‌جي په‌رانتز
له له‌ج شه‌واره‌و
مانگ شه‌ر له‌ر گه‌ريگ داكوتم
له ناوي :
خه‌يال سي‌گله ‌ماسي سيه ،
ئاسمان بي ئاسوويگ ،
خوه‌ره‌تاو بي خوه‌ريگ ،
له دالگيگ
مشتيگ سقان و
كلافيگ گيس و شه‌واريگ ژان
مه‌ليوچك ده‌سه‌و نجييگ و
منال مه‌دره‌سه‌ي بي جوغرافييگ و
شاهات هيوچگاميان
ئيوه‌و
ئووردي شه‌وارو شه‌مشه‌مه كووره‌ك و ته‌مته‌مه‌ليول ،
تيوه نين له جي په‌رانتز به سياييگ ،
خه‌يال مشتيگ تيخ ژه‌نگ داي دارزياي
يا گه‌ر
داس قه‌ناس ده‌م زه‌رديگ بچقنين
[ ده‌ر هينه‌ر ! : ]
« هه‌ناي چيده‌و بان « سن » ،
وه قه‌سي خوه‌د بيه له گرسن
ئي كه‌ش وه دزي خوداوا هلاژيه‌و
وه له‌په‌كوتي
سي گله ماسي سيه
له ئاوه‌يل وه‌يل ولات خه‌يال
بخنكن و
له ئي كه‌ش سيه‌يگ
خوه‌ديش بخنكيد !

[ ئاگرولات رشيا له هه‌له‌ته‌يل گيانم و
وه‌تم : ]
نه !‌ده‌ر هينه‌ر !
هه‌رسه‌ي له شوون چالمه و
برنگ و تيه‌وه‌يل سيه‌ي واران زيوخ ،
سي ده‌فه خنكيامه
له « سه‌يمره‌يل » ورسيه‌ري و
بي ده‌سلاتي و سه‌راوه نيوني ،
خنگانن ماسيه‌يل تافه‌يل ئاوه‌يل ولات
كارم نيه !

بچووله ماسي سيه بيوچگله‌ي سيه‌ل خوه‌راوا بپرس !

م گ په‌ره په‌ره‌ي داره‌يل دارسان ولات
هاله هيورم ،
م گ له‌لام زه‌خم زه‌خم
كه‌ليمه‌يل جه‌ور كيش كتاوه‌يل زنه‌ي
هه‌لته‌كاننه ،
م گ له لام
شاپه‌ر ته‌مام مه‌له‌وه‌ره‌يل نه‌قاشيه‌يل منال مه‌دره‌سه‌يل
هه‌لچنينه ،
م گ هه‌يمان
خوه‌وه‌يلم
پره له هساره‌و په‌ري و هه‌لپه‌رگه ،
له جامه‌ك و حه‌له‌بچه و يووحه‌ننا ،
له شه‌وكيانه‌يل ئاوه‌ريوت و
نيمه‌روانه‌يل ئازيه‌ت و ره‌نجه‌رو ،

هه‌يمان
نه‌گيرفان مه‌ليوچگيگ وشكانمه ،
نه بال وال فريشته‌يگ له پشته‌و به‌سيامه ،
نه رووژناي له‌چه‌و كال كه‌وتريگ هه‌لقه پانمه ،
نه هساره به خت بي كه‌سيگ له ئاسمان كه‌نيمه سه‌و ،
نه شه‌وه‌كيان زمسان بي باوانيگ
سه‌ر ري له خوه‌ر نه‌مر ولات گرتمه

نه ! ده‌ر هينه‌ر !
هه‌ر شه‌و
له ئه وه‌ل كه‌له‌شير هساره و مانگ و نساروتيه‌ريكي ،
سيسه‌دوسي وسي ديوه‌ت ريوه‌ت قژن قژن ،
بيله‌سه‌ر و ده‌ر وه‌ده‌ر و شين كه‌ر وسيه‌له‌وه‌ر ،
يه‌ك جام سيه‌يگ
ـ پر له خيون ـ ها وه‌ ده‌سيانه‌و
و رزاره‌و له شوونم شين كه‌ن‌و
وه ده‌نگ پر له ژاريگه‌و ئيوشن :
هاي باوگه خيون !
هاي باوگه خيون !
وه‌ر سووگه‌ي نزيوله‌و ژان
له شوونيان
تائيواريان ده‌سه‌ونجي و
وه‌فر و كريوه و تيه‌ريكه‌شوي
سيسه‌دوسي‌و سي دالگ ريقه‌و بردي
بيله‌سه‌رو ده‌ر وه‌ده‌روشين كه‌ر وسيه‌له‌وه‌ر
يه‌ك مه‌ژمه‌ي ژه‌نگنيگ
ها بان سه‌ريانه‌و
هه‌ر مه‌ژمه سه‌ر برياي شه‌لپان له خيونيگ هاتي
وه رزاره‌و له شوونم شين كه‌ن و ئيوشن :
هاي رووله سه‌ر !
هاي رووله سه‌ر !
ولام م نيه‌زانم
يه چه‌ن ساله ده‌بي سه‌ر
ده‌ر وه ده‌ر ولاتم !؟

ولام
يه زانم گ :
له ئه‌وه‌ل شه‌وه‌يل زه‌لان و زيوخ تاريخ
باپيرم
سه‌ر سيسه‌د و سي وسي كوربرده‌س برياي
ناله‌بان ران وئرايان وه‌ت :
هه‌ناي تاريخ
له وه‌ر داوان دالگ زووله‌زاي ،
مه‌مگ زه‌خم و خيون و په‌ژاره خوارد ،
له سه‌ر سه‌راوه‌گان ئه‌له‌وه‌نه‌يل ولات ،
له سه‌ر برياييگ
شلپه‌شلپه شلپ خيون هات‌و
هه‌ر ئيواريان
دالگه‌يل ولات نهات بسات
كووه‌و بيون وخوه‌نين :
« ئه‌لوه‌ن ئاوه‌گه‌د ها وه خيونه‌وه »
نه ! ده‌رهينه‌ر !
له ته‌مته‌مه‌ليول‌و
بلاچه‌ي ئه‌وه‌ل سال زنه‌ي ،
هه‌ناي ته‌ور هزار سه‌ريه‌ي خوداي فريشتي‌دار
سه‌ر برايل خوه‌رو سه‌كامه‌تي
له پشته‌و برين ،
خوه‌يشكه‌يل هساره‌و
ئافره‌ته‌يل واران بانان
له بن سيازاخ چالاوه‌يل وه يل زمسان
وه ده‌نگ پر له ژاريگه‌و
له بان خه‌مه‌يل چه‌مه‌يل ولات
وه كزه‌و خوه‌نين :
« ته‌مته‌مه ليوله برا !
بن گوله‌م قيوله برا ! »

نه ! ده‌ر هينه‌ر !
م ته‌نيا مه‌نم تا گه‌ر نبوورم گ
هه‌يمان
« هراكلس » و «فرعه‌ون » و « مشتيگ ماچ تيه‌يل »
چيوله خه‌يال « ئاتن » و « قاهره » و
ده‌م چه‌وه‌يل پاسركياي له‌يره وه‌رين
منه‌ي پريوسه‌يگ خوه‌روه‌شتاني
له گيرفان درياي كورديگ كه‌ن
نه ! ده‌رهينه‌ر !
م ته‌نيامه‌نم تا گه‌ر نبوورم
له‌سيوك سليوك ساله‌يل سمنت كرياي
هه‌ناي ئه‌وه‌ل پژمه‌ي عزرايل ويل چه‌يليگ
به‌ريوه‌يل ئيواران بي واران زاگروس نه چرچگيانيه‌سه‌و ،
هناي
ئه‌سر خيون
له چه‌وه‌يل هساره‌يل ئاسمان
چيو تك‌تك واران نه‌تكيايه ،
هناي ئاوه‌يل تافه‌يل بسات هات ونه‌هات
مه‌نه‌ي پيته‌خه‌نه‌ي
گوول چوول بي كه‌سي نه‌يونه،
هه‌ناي ميژنگ ژه‌نگن ملاي گيژويژ ميژو
له‌ته‌نگي تك تيه‌ريكي نه‌تليايه ،
خودا
بوش وريش و
رسك وره‌سن و ريسيور ئاره‌سه‌كه‌ي
تاگر
وجيوله جيون كتاو بجان و
بووپووتين وته‌رم ويتاره
به‌شه‌و بكه‌ن و
مه‌له‌وه‌ر ده‌روه‌ده‌ر بتاسنن‌و
شووفاري هه‌رسات ولات نه‌هات بكه‌ن !

نه‌ ! ده‌رهينه‌ر !
له‌سيوك سليوك ساله‌يل سمنت كرياي
م مه‌نم تاگه‌ر
چوار شه‌مه‌يل هه‌رسات ولات نه‌هات
له بان تاله‌يل ياله‌يل به‌رزشانم
ئاگر گريگ بكه‌مه‌و
تا گه‌ر خه‌يال هيوچ مار سه‌رئاسنينگ
له بان شان ئايه‌مه‌يل زه‌يوه‌يل بانان
چيوزه نه‌يه‌يد
م مه‌نم تاگه‌ر
له بان گومبه‌زه‌يل گيانم
خيون هشار هزار
مه‌ليوچگ ئه‌زانگ ئيوش بريشه‌ي
م مه‌نموو وه‌فره‌يل لچه‌يل دالاهوو !
م مه‌نموو ماسي سيه‌يل ئاو ئه‌لوه‌ن !
م مه‌نموو رووژه‌يل بي ده‌سلات پايز !
م مه‌نموو وه‌لنگه‌يل بي واران ئينترنت !

نه ! ده‌ر هينه‌ر !
هه‌ر سه‌ي چاره‌نيوس مليس سه‌ر چه‌فت
له ناورچين قه‌پالم
زه‌خم و زيوخ و زيلمه نيوسايه ،
هه‌رسه‌ي
هه‌رئيواريان
مه‌ل شه‌ل قه‌ل چه‌ل ده‌م چه‌فتيگ
وه قيره قير قرمزيگ
ولات لات شه‌وارمان داپوششني ،
هه‌رسه‌ي
سيف و هساره و سنار و سه‌كامه‌تي
له گيرفان ئاسمان ئي ولاته
كه‌س وه‌چه‌و نه‌ي ،
هه‌رسه‌ي
شوون به‌ره‌يل زيوخ و زه‌خم و زمسان
له بان شانه‌يلم
عه‌سك ته‌سك
ئه‌وه‌ل سانه‌يل « ئه‌هرام سه‌لاسه » دينه‌سه‌و ،
ولام
چه‌وه‌يلم هه‌يمان
ئيسگاي تمام رووژه‌يل ريار دنياس !
چه‌مه‌نده‌فه‌ر سه‌وز زنه‌ي
له جاده‌ي كه‌شكه‌شاني ئي ولاته
ريار هه‌لوژني !

***

يه‌ي رووژ
پايز وه كوول
ئه‌ول خوه‌يشكه قژن بيوچلگه‌ما
له‌چگيگ
له ئاسمان بي‌وسان و
زه‌مبيليگ
پر له سيه‌پريوسنه‌ك به‌يموو
چيمه‌شوون خوبشكه گه‌وراگه‌ي وه‌هار
چيمن تاواران جاران ئووردي به‌هه‌يشت
تا سروه‌ي واي شه‌وه‌كيانه‌يل « زه‌يچ »
تا هوونكي تاف ئاوه‌يل « سيروان »
چيمن تا
ئه‌وه‌ل كيه‌ني ، كه‌ل ، گول ، گيا !
تا ئاو رووشنه‌وكه‌ر
ئه‌نار ، فريشته‌ ، خودا !
« ئه‌ناره‌يگ هاتيه وه‌لاي دووسه‌وه »
ئيوشم بخوه‌مه‌ي هه‌ر وه پووسه‌وه » !
نه ! ده‌رهينه‌ر !
م مه‌لاي هلاهلاي هزار كتاو نه‌نيوسيايم
تووز په‌يغه‌مه‌ر هزار هووز نه‌هاتم
فريشته‌ي ئاسمان هزار مه‌زار بي ناونكي‌م
م له‌ هيوچ شه‌ليتان چه‌له‌په‌ريگ نه‌كه‌فتمه
هيوچ خودايگ له‌قه‌ي تاش تيئشيگ نه‌وه‌سامه‌سه‌و
وه‌هيوچ دال ئه‌قداليگ
نه‌وه‌تمه‌بايدو سپلي بخوه‌ي !
نه ! ده‌ر هينه‌ر !
هرسه‌ي پچيونه ديونم ،
ولام تمام غيه‌ره‌ته‌يل ولات
چنگ كوتانه له پريوشه پريوشه‌ي گيانم
تمام داره‌يل به‌رز ولات
له‌خيون رشياي م ريشي گرن
تمام ئه‌زره‌ته‌يل كه‌و كه‌و له سيني‌م چه‌پله ريزان كه‌ن !
تمام كه‌وتره‌يل ولات
له بان ميل بژانگه‌يل م سه‌ف به‌سن !

نه ! ده‌رهينه‌ر !
وه‌قه‌سي نيه‌گرم ، نيه‌خنكم ، نيه‌خنكيه‌م !
م منال بازي نييم !
پياي سه‌ر به‌رزييم
دار پر له په‌لوه‌چ ئازادييم !
***
شه وه‌كيان سه‌رديگ
له‌مال كه‌ليمه فه‌فيره‌گان ده‌سه‌ونجي
دالگم ده‌س نديده سه‌ر شانمه‌و
ئيوشي :
هه‌م خه‌و هه‌له‌په‌له ديده رووله !؟
هه‌لسم ، ديونم
دالگم يه سه‌د ساله خنكيايه‌و
له‌لي مشتي سقان مه‌نيه‌و
سي گله ماسي سيه
له تاف كلاف گيسي
له پساي سناو كه‌ن !له تاف كلاف گيسي
له پساي سناو كه‌ن !

[behnam5555]

خه‌م ديوري تنه‌ئي ئه‌وره واري !
*
وه عشق و دووسي‌و وه شه‌وق‌و مه‌يله‌و
خه‌يالد چيوزه ده‌ي وه په‌ل‌وه‌چه‌يله‌و

خه‌م ديوري تنه ئي ئه‌وره واري
وه‌فر ناسه سه‌ر هه‌رچي كيوه‌يله‌و

گول ئه‌سره‌يل ئاهوو
*
شه‌وي زه‌خمه‌يل نوو نوو چيوزه ده‌يدن
شه‌وي ده‌رده‌يل كوو كوو چيوزه ده‌يدن

شه‌وي وه ئزن شاي گه‌وره‌ي خوراسان
گول ئه‌سره‌يل ئاهوو چيوزه ده‌يدن


ته‌رف تيون!
*
گول ئه‌سره‌يل ئاهوو پر له‌خيونه
خودا زاني گ حال ئيمه چيونه

چه‌نيگه كه‌وتره‌يل گومبه‌زه‌يلي
له داخ نوو گوله‌يلد ته‌رف تيونه

عه‌تره‌گه‌ي شه‌وبوو
*
كه‌مي كه‌وتر ، كه‌مي ئاهوو بوارن
خودايا عه‌تره‌گه‌ي شه‌وبوو بوارن

دواره له‌ي كه‌وين گومبه‌زه‌يله
ده‌سيگو يه‌ي عه‌له‌م چيو كوو بوارن

چه‌نيگه ...!
*
چه‌نيگه ژان به‌ش باله‌يل ئيمه‌س
چه‌نيگه شه‌و ره‌نگ تاله‌يل ئيمه‌س

عه‌له‌مدار و خه‌م وخيون و په‌ژاره
چه‌نيگه مه‌خش ئي ساله‌يل ئيمه‌س

ئاگر به‌ره‌يل!

خودايا شين و وه‌ي چوه‌س له‌ي شه‌وه‌يله
چماني رو رو ئاگر به‌ره‌يله

دواره شام عاشووراس و شين كه‌ن
فريشته‌يل فه‌له‌ك راي بي‌سه‌ره‌يله

[behnam5555]

زه‌لان هات‌و...
*
چنگي واران ، چنگي گيسه ، چنگي خيون
زه‌لان هات‌و وه‌قينه‌و هه‌لكه‌ني سيون

به‌ش ئات و عه‌يالد ده‌ردو داخه
حوسه‌ين گيان ! خه‌يمه‌گاند جار تر بيون

*
دواره هاتيه رووژي‌گ ده‌رده
دلم گير خه‌مه‌يل ده‌وره‌گه‌رده

دواره ئمته‌حان سه‌خته ياران
ئراي ياري حوسه‌ين كي له‌يره مه‌رده ؟!

*
به‌شم ئاگر له‌ئي زمسانه بارن
رچگياس ئاسووه‌يلي گ ديارن

هزار و سيسه دو چه‌ن سال سه‌خته
تمام ئه‌وره‌گان خيون له‌يره وارن
*
تمام ئه‌وره‌گان گيرن وه داخه‌و
تمام وه‌لنگه‌گان شين كه‌ن وه باخه‌و

هزار وسيسه دوچه‌ن ساله سه‌ركه‌ن
تمام شامه‌گان وه بي چراخه‌و
*
بيه‌ن ئاگر له ئازاگه‌ي سقانم
گ شايه‌د زه‌خمه‌گه‌ي گيان هه‌لكلانم

له‌داخ ئه‌و عه‌له‌مدار شه‌هيده
عه‌له‌مدار خه‌مه‌يل خيون وه شانم
*
هه‌ناي ئي مانگه‌تي ئاگر گري گيان
مه‌له‌يل خه‌م خوه‌نن له سه‌ر كلاوان

ته‌مام شانيه‌يلي به‌ش به‌شه‌و كه‌ن
خه‌م مه‌رگ حوسه‌ين داوان وه ‌داوان
*
هه چيو دارِ به‌ريو زه‌خمي زه‌لانم
هساره‌ي شارياي لاي ئه‌وره‌گانم

نه قيقه‌ي چه‌ومه‌سي تي نه رياري
م تاش زه‌گروسم ته‌م ها له شانم
*
كه‌مي شه‌وبوو بنه له وه‌ر قه‌ود به‌و !
بواران گيسه‌گه‌ي جوور شه‌ود به‌و !

چه‌وه‌ريدن له نوو ئي ده‌روه‌چه‌يله
تنوو گيانِ چه‌وه‌يلِ كه‌وكه‌ود به‌و !
*
تِ واراني گِ تك تك له‌يره واري
خه‌م كوو كوو دلم له‌ي شاره شاري

گلاي زه‌رد شه‌واره‌يل خه‌زانم
ت داره سه‌وزه‌گه‌ي فه‌سل وه‌هاري
*
هه‌لس باسه‌يل نوو نوو هه‌لچنيمن !
له ئحساسه‌يل نوو نوو هه‌لچنيمن !

جوانيمان وه‌هار پر گوليگه
هه‌لس ياسه‌يل نوو نوو هه‌لچنيمن !
*
وه‌هاره و سه‌ركلاوان وه‌خت سه‌يره
به‌ش داره‌يله‌گان سه‌د كوومه خه‌يره

په‌مي ئه‌ورِ خودا ها ئاسمانه‌و
دجاره پرزه پرزه پرزه له‌يره
*
دجاره پرزه‌پرزِ نه‌رمه‌واران
به‌ش زه‌يو ده‌ي خوه‌شي داوان وه‌داوان

له نوو مه‌خش زنه‌ي نيوسي له‌بانِ
حه‌ريره سه‌وزه‌گه‌ي وه‌لنگه‌يل داران
*
وه‌هاره و خوه‌زه‌يه‌وِ كال مه‌ليوچگ
خه‌يال كه‌و كه‌و و وال مه‌ليوچگ

له نوو گووش منالي بان جه‌ره‌و ده‌ن
كه‌سي دي نه‌شكني بال مه‌ليوچگ
*
وه‌هاره‌و عه‌يده بان هه‌م نوو نووه‌و بوون
مناله‌يل ديوه‌كه‌يني بان كووه‌و بوون

كوره قه‌در دِ رووژه‌ي گول بزانن
له نوو پر له گول « دالاهووه‌و» بوون
*
وه‌هاره و نم نم واران له ئيره
له دووسه‌يل دِره‌نگ ، دل سيرسيره

دلد خوه‌ش بوو ره‌فيق رووژ شادي
له‌وينه‌ي به‌ليه‌كه‌يل سه‌وز «ديره»
*
وه‌هاره‌و فه‌سل گول له‌ي گه‌رمه‌سيره
خوسه دنيا له قه‌يرانِ تِ سيره

دِ روژه‌ي گول قه‌راريو وا بوه‌يده‌د !
تِ دي مه‌ي مار كوو كه‌يدن له ئيره ؟