شعر كردي ... - صفحه 98

**behnam5555** · #**971** 12-04-2010

لە ناکەس کارییا، خاکم بەسەر، ڕۆیی بە با عومرم

لە ناکەس کارییا، خاکم بەسەر، ڕۆیی بە با عومرم
خودا! تۆ بمژیێنە تا لەبەر قاپیی کەسێ دەمرم

بە ضایع چوو لە (ما لا یعنی)یا وەقتم هەموو، یەعنی
دەبێ وەقتێ لە (بوالوقت)ێ بخوازم دا تیا بمرم

ئەجەل دەورم دەدا: حاضر بە، وادەی دەور و تەسلیمە
منی غەفڵتزەدە هێشتا خەریکی مەسئەلەی دەورم

خەیاڵی پووچی دنیا وا دەماغ و دڵمی پێچاوە
قیامەت، هەر مەگەر ڕۆژی قیامەت بێتەوە فکرم

لە پێ کەوتووم و نەفسم بۆ هەوا دەشنێ وەکو منداڵ
لەبەر پیریی سەرم خۆی ناگرێت و، تازە پێ دەگرم

چییە سووچ و گوناهی؟ بۆچی دەیکاتە جەزاخانە؟
لە قەبرهەڵکەن، هەتا ڕۆژی جەزا دەعواچییە قەبرم

سبەینێ (یحشر المرء)ە، براگەل، فرسەتە ئەمڕۆ
تەبەڕڕا بن لە من، با کەس نەبێ حەشری لەگەڵ حەشرم

لە من نازانم ئیتر نەفسی بەدخوو چیی دەوێ ''مەحوی''
کە بەدکردار و بەدڕەفتار و بەدئەفکار و بەدطەورم

مەگەر بەر مەوجی بەحری ڕەحمەتم خا وەصفی سەتتاریی
وەگەرنا، زەحمەتە پابوونەوەم، نامومکینە سەترم

مه‌حوی

**behnam5555** · #**972** 12-04-2010

بە نووری بادە کەشفی زوڵمەتی تەقوا نەکەم، چبکەم!

بە نووری بادە کەشفی زوڵمەتی تەقوا نەکەم، چبکەم!
بە شەمعێکی وەها چاری شەوێکی وا نەکەم، چبکەم!

لە خەزنەی دڵمدا هەرچیی هەیە، هەر داغی سەودایە
دەسا ئەم نەقدە دەردی عیشقی پێ سەودا نەکەم، چبکەم!

لەگەڵ دەستی مەلا ڕێ ناکەوێ زونناری زوڵفی یار
وەکو (شێخ) ئیختیاری مەذهەبی (تەرسا) نەکەم، چبکەم!

لەڕێی ئەو شۆخەدا خۆم کردە خاک و پێی نەنا پێما
دەسا خاکی هەموو عالەم بەسەر خۆما نەکەم، چبکەم!

دەمێکە شاری پڕ شۆری مەحەببەت مات و خامۆشە
بە قانوونی تەجەننون شۆڕشێ ئینشا نەکەم، چبکەم!

لە چاوا نم نەما بۆ گریە، نۆبەی سەجدە بەردەریە
سیاساڵم نەبارە، نوێژی ئیستیسقا نەکەم، چبکەم!

لەسەر تۆم دوشمنە دنیا، قەضییەم (مانع الجمع)ە
کە تەرکی تۆ نەکەم، تەرکی هەموو دنیا نەکەم، چبکەم!

بەجێ ماوم لە یاران، نابەجێ ماوم، ئەجەل ! زوو بە
بە مردن لەم قوصووری ژینە ئیستیعفا نەکەم، چبکەم!

ئەوا لەیلا بە ڕۆژی حەشر ئەدا وادەی لیقا ((مەحویی))
هەتا قامی قیامەت، ئاه و واوەیلا نەکەم، چبکەم!

مه‌حوی

**behnam5555** · #**973** 12-04-2010

پەنجەره

پەنجەرەێک بۆ بینین
پەنجەرەێک بۆ بیستن
پەنجەرەێک کەوەکوو ئەڵقەی بیرێ
بەجەرگەی ئەرز ئەگات لە ئاخری خۆیدا
و بە لای پانایی ئەم دلۆڤانییە پەیتا پەیتای شین ئەکرێتەوە
پەنجەرەێک کە دەسە چکۆلەکانی تەنیایی
لە بەخشیشی شەوانەی عەتری ئەستێرەکان دەسواز
دارماڵ ئەکات
و لەوێووە ئەکرێ
خۆرەتاو میوان کرێ بە دوورەوڵاتی گوڵە شەمانییەکان
پەنجەرەێک بۆ من بەسە
من لە وڵاتی بەبلانەکان دێم
لە ژێر سێبەرە دارەکانی قاغەزی
لە باخی کتێبێکی وێنەدار
من لە وەرزەکانی وشکی ئەزموونەکانی بێبەری هەڤاڵی و ئەوین دێم
لە کۆڵانە خۆڵاوییەکانی بێتاوانی
لە ساڵانی گەشکەی پیتە ڕەنگ فڕیووەکانی ئەڵفوبێ
لە پشتی مێزەکانی قۆتابخانەی سیلاوی
ئا لەو ساتەکە منداڵان توانییان
قسەی بەرد لەسەر تەختە بنووسن
و ڕیشۆلە هوولەکان پەڕین لە دارەکەڤنسال.
من لە نێو بنەگیاکانی گوشتخۆر دێم
و ئێستاکەش مێشکی من
دارماڵە لە قیژ و هەرای پەپوولەێک کە ئەویان
بە سنجاخێ لە پەڕاوێ چوار مێخەیان کردبوو.
کاتێ کە بیڕ و بڕوای من لە گوریسی خاوی دادیەری هەڵواسرا بوو
و لە تەواوی شار
دڵی ڕووناکییەکانی منیان لەت و پەت ئەکرد
ئەو کاتە کە چاوە مناڵانەکەی ئەوینی منیان
بە دەسماڵی ڕەش و ناشیرینی یاسا ئەیان بەست
و لە گێجەنەپەشێوی ئاواتی من
فیچقەی خوێن بوو کەبۆ دەرەوەئەپژا
ئەو کاتەکە ژیانی من ئیتر
شتێ نەبوو، هیچ شتێک بەر لە تک تکی کاتژمێرەکەی دیڤەر
زانیم ، پێویستە، پێویستە، پێویستە
کە خۆشم بووێ شێت ئاسا.

*

پەنجەرەێک بۆ من بەسە
پەنجەرەێک بۆ ئێستای شارەزایی و نیگا و بێدەنگی
ئێستا نەمامی گوێز
ئەونە زۆر هەلچووە کە ئەتوانێ دیڤەر بۆ گەڵا گەنجەکانی خۆی
مانا بکات.

*

لە ئاوێنە پرسیار کە
ناوی ڕزگارکەرەکەت
ئاخۆ ئەرز کە لە ژێر پێی تۆدا دەلەرزێ
تەنیاتر لە تۆ نییە؟
پەیخەمبەران، پەیامنێری کاولی
لەگەڵ خۆیان بەسەتەی ئێمە هێناویانە
ئەم تەقینەوانەی لە پەستا پەستا ،
و هەورە ژاراوییەکان،
ئاخۆ زایەڵەی ئایاتی پیرۆزن؟
ئەی هەڤاڵ ، بەرادەر ، هاوخوێن
کاتێ بەمانگ گەیشتی
مێژووی کۆکوژی گوڵەکان بنووسە.
هەموو دەمێ خەونەکان
لە بەرزایی سافیلکەیی خۆیان پەرتاو تەبوون و مردن .
شەوەرێکی چوارپەڕ بۆن ئەکەم
کەشین بووە لەسەر قەبری چەمکێکی کۆن
ئاخۆ ئەو ژنە کە لە جامەمەرگی چاوەڕوانی و داوێنپاکی خۆی ناشتراوە،
لاوەتی من بوو؟
ئاخۆ دیسان سەرەکەوم لە پیلکانەکانی مڵ و مۆی خۆم
تا بە خوای باش کە لە سەربان پیاسە ئەکا سڵاو کەم ؟

هەست ئەکەم وەخت تێپەڕیوە
هەست ئەکەم مێز بەینێکی درۆیینەیە لە نێوان قژەکانی من و دەسەکانی
ئەم نامۆ پەژارە .
قسەیکم لەگەڵ بکە
ئاخۆ ئەو کەسەی کە دڵۆڤانی جەستەێکی زیندوو بە تۆدا ئەبەخشێ
بێجگە لە فامی هەستی زیندووبوونی خۆی، چی لە تۆ ئەوێ؟
قسەیکم لەگەڵ بکە
من هانا ئێنم بۆ پەنجەرە
لەگەڵ هەتاو پەیوەندیم هەیە .

ورگیرانی:
بابەک سەحرانەوەرد

**behnam5555** · #**974** 12-04-2010

خودایە کوفر ناڵێم

شیعری: دکتۆر عەلی شەریعەتی

پەرێشانم
تۆ چیت دەوێت لە ڕۆحم؟!
منت بەبێ ویستی خۆم دیلی ژیان کرد
ئەی خوداوەند
ئەگەر رۆژێک لە عەرشەکەت بێیتە خوارێ
بەرگی هەژاری بپۆشیت
غرورت بۆ تیکە نانێک
‌بخەیتە ژێر پێی نامەردانەوە و
شەو لەسەرخۆ و ماندوو
دەست بەتاڵ و زوبان بەستراو
بەرە و ماڵ بگەڕێتەوە
کوفر بە زەوی و ئاسمان دەڵێیت
دەیڵێیت؟!
ئەی خوداوەند
ئەگەر لە ڕۆژی گەرمی هاویندا
لەشت بدەیتە بەر سێبەری دیوار
لێوت بخەیتە سەر کاسەی مسی رەش هەڵگەڕاو و
هەندێک لەولاوەتر
کۆشکە مەڕمەڕینەکان ببینی و
شێت بووبیت بۆ عانەیەک.. ئێرەو ئەوێ بۆی بگەڕێیت
بە زەوی و ئاسمان کوفر دەڵێیت
نایڵێیت؟!
ئەی خوداوەند
ئەگەر رۆژێک بوویت بە مرۆڤ‌
لە حاڵی بەندەکانت ئاگادار بوویت
پەشیمان دەبیتەوە لە چیرۆکی خیلقەت .. لەم بوونە، لەم ئەفراندنە
خودایە تۆ بەرپرسی
خودایە تۆ دەزانی کە مرۆڤبوون و مانەوە
لەم دونیایە چ دژورارە
چ ڕەنجێک دەکێشێت ئەو کەسەی کە مرۆڤە و هەستی پڕ .. پڕە

وەرگێڕانی لە فارسییەوە: عومەر سەیدە

**behnam5555** · #**975** 12-04-2010

شه وانەی 2

ئەحمەد شاملوو

خۆشم ئەوێت
چونکە دەیناسم
بە هەڤاڵی و تاقانەیی،
- شار
هەموو نامۆیی و دژمەنایەتییە.-
ئەو کاتێ کە دەسە دڵۆڤانەکەی بە دەسمەوە ئەگرم
لە تەنیاییە خەمبزوێنەکەی تێئەگەم.
پەژارەکەی
ڕۆژپەرێکی دڵگرانە
لە دوورەوڵاتی و بێکەسییدا
هەروا کە خۆشییەکەی
هەڵاتنی تەواوی هەتاوەکانە
و ناشتا
و نامی گەرم،
و پەنجەرەێک
کە بەیانیان
هەوای خاوێن
ئەکرێتەوه،
و تەرچکی گوڵەشەمانییەکان
لە پاشۆرەی حەوز.
کانیاوێک
پەپوولەێک و گوڵێکی چکۆلە
لە خۆشیدا
دارماڵی ئەکات .

و بێ هیوایی بێ گوناهانە
لە پەژارەێک
گرانباری ئەکات:
ئەمەی کە"بامداد" ی ئەو ، زۆر وەختە
هۆزانێکی نەهۆینوە.
ئەونە کە بڵێم
" ئەمشەو هەڵبەستێک ئەڵێم."
بە لێوانێکی بزەدارەوە خەونێکی هێمن دای ئەگرێت
هەروەکو بەردێ
کە بە زرێبارێ
و بووداش
بە نێریڤانا.
و لەم کاتەدا
هاوچەشنی کیژێکی مێرمندالە
کە بووکە دڵخوازەکەی
توند و سەخت لە ئامێزی گرتبێت.
ئەگەرەکو بڵێم کە بەختەوەریی
ڕووداوێکە کە لە بناخەوە هەڵەیە،
مەراق
سەرتاپێ ی دا ئەگرێت .
هەروەک زرێبارێ
کە بەردێک و
نێریڤاناش
کە بوودا .
چونکە خۆشبەختی
لە غەیری قەڵەمڕەوی ئەویندا، لە هیچ جێ نەیناسراوەتەوە
ئەوینێ کە
بەر لە لێک گەیشتنێکی ئاشکرا نییە
لەسەر ڕواڵەتی ژیانی من
کە لەسەر ئەو
هەر دەرزێک
لە پەژارەێکی دڵتەزێن باس ئەکات.

ئایدا!
لێوەخەنەێکی لێ خۆش بوووە
لە سەرەتا
زۆر دەم لەوم ڕوانیوه
ئەونە که، هەروەک نیگایەک لێم وەرگرتەوە
لە دەوروبەری من
هەموو شتێک
بە بیچمی ئەو دەرهاتووە
ئەو ساتە ئاگادار بووم کە ئێتر من
لە ئەو
هەڵاتنم نییە.

له ورگیرانی : بابەک سەحرانەوەرد

**behnam5555** · #**976** 12-04-2010

ماڵی دووه‌می ته‌نیایی

زانا سامان

که‌ خه‌یاڵ ده‌نووسێ به‌ ژووره‌که‌مدا
به‌ده‌نگی تریقه‌ی پێکه‌نینی
هاوسێکانم په‌ست ده‌بم
ده‌بمه‌وه‌ به‌ کوڕه‌ عه‌جوله‌که‌ی جاران
ده‌ست ده‌به‌م بۆ سێوی شیعرێک و
خۆم له‌ ڕاموسانی باخێکدا ده‌بینمه‌وه‌
ژنه‌که‌م پێی خۆشبێ، یان نا
جنس له‌گه‌ڵ ته‌نیایدا ده‌که‌م و
مناڵێ بۆ ماڵی دووه‌م ده‌خه‌ینه‌وه‌
واده‌که‌ین ته‌مه‌نێکی زۆر درێژی بده‌ینێ
سه‌راب ده‌که‌ین به‌ ڕووخساری
(با) بۆ هه‌ردوو قاچه‌کانی
ده‌سته‌کانیشی دره‌خت و
له‌شی له‌و په‌ڵه‌ هه‌ورانه‌ی
وه‌کو شیعر به‌ده‌م ڕێوه‌ بۆمان دێن و
پاشان ده‌ڕۆن و ڕه‌ت ده‌بن،
ژنه‌که‌م پێی خۆشبێ، یان نا
هه‌ر شه‌وه‌ی
له‌گه‌ڵ کچێنی ڕووبارێکدا ده‌مێنمه‌وه‌ و
ماچ له‌ پریشکی ئاودا ده‌که‌م
کچێنی ڕووبار ناو ده‌نێم
(که‌نار)و خۆشم (شه‌پۆل)
گه‌ر پێمکرا
کچێنی باخیش دێنمه‌ لای خۆم
بۆ ئه‌وه‌ی ته‌ڕێتی
بکه‌مه‌ به‌ری ژیانم و
سه‌رله‌به‌ری خۆم
پڕکه‌م له‌و ساته‌ ناسکانه‌ی
گۆشه‌گیری لێنه‌گه‌ڕا
چێژ له‌ باڵایان وه‌رگرم،
ژنه‌که‌م بێی خۆشبێ، یان نا
ئیتر ئه‌و پیاوه‌ ده‌بم
هه‌ر جاره‌ی به‌بیانوی سه‌فه‌رێکه‌وه‌
ده‌چم ژنێتی هه‌موو ڕه‌زه‌کان ‌و
ژنێتی هه‌موو دارستان و ڕێگاکان
ئه‌زموون ده‌که‌م و
هه‌ر جاره‌ی به‌بیانوی سه‌فه‌رێکه‌وه‌
ژنه‌که‌م پێی خۆشبێ، یان نا
ماڵی دووه‌می ته‌نیایم
پڕ ده‌که‌م له‌ بۆنی مێی
هه‌موو ئه‌و ته‌ڕه ‌شیعرانه‌ی
که‌ ده‌یانگرمه‌ باوه‌شم
خاڵیم ده‌که‌نه‌وه‌ له‌ شوێن
خاڵیم ده‌که‌نه‌وه‌ له‌ کات و
له‌ خۆیاندا ونم ده‌که‌ن.

**behnam5555** · #**977** 12-04-2010

لیمۆ ژن

ئیسماعیل خورماڵی

خۆت له‌ ئێواره‌ و په‌سێوی دڵ ڕه‌قییه‌ک مه‌ده‌ ، لیمۆ
که ‌دڵت وه‌کوو ئاونگ عه‌یشی سه‌رگه‌ڵای بێده‌نگیان به ‌نه‌عله‌ت ده‌کا
خۆت له‌ بوولێڵی سپیده‌یه‌ک مه‌ده ، لیمۆ‌
وه‌ک ئاو خۆت له‌ مه‌رکانی سێوه‌رێ مه‌نێ ، لیمۆ
که‌ سێوت به‌ لاسک و سه‌ر چڵی سه‌وزه‌وه‌
مه‌یلی په‌نجه‌ و مه‌یلی ده‌ستی‌ مه‌جنوونێ له‌ دۆزه‌خ ده‌کا
کچێ لیمۆ ، ئه‌ی ئاودارترین مه‌خلووقی دنیا
وه‌کوو مینا خۆت له‌ جه‌مالی ئه‌و باڵکۆنه‌ مۆرانه‌ مه‌شاره‌وه‌
عه‌سرانێ به‌ ستیانێکی هه‌ڵخراوی سه‌ر ته‌ناف و
به‌ ژێره‌یه‌کی په‌مبه‌ی هه‌ڵخراو و به‌ عیشوه‌یه‌کی سه‌وزه‌وه
بارانێکت له‌ ختووکه‌ ،
ده‌نایه‌ باوه‌شی کێڵگه‌ باوه‌شێ
باوه‌شێ که‌ پڕ بوو له‌ هه‌ڵوژه‌ی ئاگر
باوه‌شێ که‌ پڕ بوو له‌ گمه‌ی مووچڕکه
باوه‌شێ که‌ پڕبوو له‌ مردنی پیرۆز
کچێ لیمۆ
باوه‌شی عه‌شق چۆڵ مه‌که‌
سه‌راسێیت
به‌ جه‌نجاڵی و به‌عه‌جوولی ئه‌و ڕۆژانه‌ی عه‌شق به‌ره‌وه‌
ئه‌و ڕۆژانه‌ی له‌ ژووانێکدا
یه‌خه‌ت به‌ بای په‌نجه‌ ده‌که‌وته‌ که‌روێشکه‌ و
کۆتره‌ مه‌مت بۆ سه‌رچڵی ده‌ست و په‌نجه‌ی یار هه‌ڵده‌فڕی و
هه‌ناسه‌ت وه‌ک چۆڕاوگه‌ی ئاو ده‌چۆڕایه‌ ده‌می لاسه‌ هاوڕێ و
بێده‌نگ بێده‌نگ ،
وه‌ک لۆکه‌ی ده‌می قۆزاخه‌ی له‌ بارانا ته‌ڕبوو
ته‌ڕ ده‌بوویت و ته‌ڕ ده‌بوویت و له‌وورته‌ وورتێکی جواندا
ده‌تووت خودا مردن هه‌ڵده‌بژێرم و ئه‌مجاره‌ دڵت ناشکێنم
ده‌تووت خودا مردن هه‌ڵده‌بژێرم و تۆش دڵم مه‌شکێنه‌
مردن هه‌ڵده‌بژێرم و ئاگری ئه‌و پیاوه‌ هه‌ڵده‌بژێرم و خودا تۆش دڵم مه‌شکێنه‌
کچی لیمۆ ،
سه‌راسێیت به‌ جه‌نجاڵی و به‌ عه‌جوولی ڕۆژانی عه‌شق به‌ره‌وه‌
خۆ دزینه‌وه‌ له‌ عیشق ، ته‌سلیم بوونه‌ به‌ مردن
مردنێ که‌ ئاسه‌وارێ جێ ناهێڵێ
مردنێ که‌ پڕه‌ له‌ هیچ
مردنێ که‌ پڕه‌ له ‌هه‌ڵاتن
به‌ڵام کچێ تۆ وامه‌که‌
هه‌ڵاتن له‌ ڕۆژی عیشق
هه‌ڵاتنه‌ له‌ ڕۆژه‌ گه‌رمه‌کانی خوا
هه‌ڵاتنه‌ له‌ ڕه‌نگه‌ گه‌رمه‌کانی ژن
کارێ مه‌که‌ ئه‌ی ژن ، ده‌ستمان بچێته‌ خوێنی یه‌ک
با نه‌بین به‌ گه‌ڵا که‌لامی خوڕه‌ی ئاوی درۆیان
با با له ‌ یه‌ک نه‌که‌ین به‌ دوژمن و سه‌ره‌خۆره‌ی یه‌کتر
تازه‌ لیمۆ
عه‌شق هات و
عه‌شق گه‌شته‌
هه‌یوانی دڵ
بۆ کوێ ده‌ڕۆی
نه‌ تۆ ده‌توانی له ‌شیعر و زمانی من هه‌ڵبێی
نه‌ من ده‌توانم له‌ خه‌یاڵی تۆ هه‌ڵبێم
نه‌ من ده‌توانم له‌ مه‌لوولیت هه‌ڵبێم
نه‌ تۆ ده‌توانی له‌ ئاگری ئه‌و شه‌وه ‌نه‌جاتت بێ و
نه‌ من ده‌توانم درۆ له ‌گه‌ڵ خه‌یاڵ و قه‌ڵه‌مدا که‌م
نه‌ من ده‌توانم ، له‌ ده‌فته‌ری له‌ززه‌تێکدا
جێ پێی خۆشاوترین شه‌وی عوومر بسڕمه‌وه و‌
نه‌ تۆ ده‌توانی لیمۆ گییان
له‌ به‌ر لیمۆی خه‌یاڵی ئه‌و شه‌وه‌دا خۆت ڕاگری و
وه‌کوو ئه‌وه‌ی له‌ به‌رده‌متا لیمۆیه‌ک ڕووت که‌نه‌وه‌
ئاو نه‌ڕژێته‌ ده‌م و له‌شت
نه‌ منیش ده‌توانم باوان شێواو
نمه‌ی سوێر و بۆڵی مه‌م و گه‌زۆی گه‌مه‌ و
باران و خوڕه‌ی هه‌ناسه‌ت له‌ بیر به‌رم
ئاخه‌ر چۆن چۆن بتوانیین هه‌ی باوانه‌که‌ی شیعر
درۆ له‌ گه‌ڵ هه‌نگوینی ئه‌و شه‌وه‌ دا که‌ین
درۆ له‌ گه‌ڵ مانگی نیوه‌شه‌وی عه‌شقدا که‌ین
درۆ له‌ گه‌ڵ ڕووتبوونه‌وه‌ و
درۆ له ‌گه‌ڵ جریوه‌ی مه‌می ناو گه‌ڵای ستیاندا که‌ین
درۆ له‌ ته‌ک ته‌نکه‌ جلی ژێر و
درۆ له‌ ته‌ک ماسی له‌شدا بکه‌ین
درۆ له ‌ته‌ک هه‌مس و
درۆ له ‌ته‌ک ترسی موباره‌کدا بکه‌ین
ئاخه‌ر لیمۆ ، هه‌ی لیمۆ ژن ، چۆن بتوانین
چۆن بتوانین
درۆ له ‌ته‌ک به‌ڕه‌زای کوێستانی ژن و
ڕێواسی ئاو داری پیاودا بکه‌ین
چۆن بتوانین درۆ له ‌ته‌ک گۆرانی مه‌ساتایه‌تییه‌کدا که‌ین
گۆرانییه‌ک وه‌ک ئاشقه‌ و ماشقه‌ گرێی ده‌داین
گۆرانییه‌ک له‌ له‌زه‌تدا ده‌یکردین به‌ کڵافه‌ی گۆشت
گۆرانییه‌ک که‌ سه‌ری ده‌ناین به‌لاسه‌ری یه‌که‌وه‌
گۆرانییه‌ک که ‌ده‌می ده‌ناین به‌ لا له‌شی یه‌که‌وه‌
سوبحانه‌ڵڵا
ده‌بووین به‌ نیشتیمانی ئاڵییه‌تی و
هه‌ر له‌ خۆوه‌
ده‌ممان پڕ ده‌بوو له‌ سکڵی جه‌هه‌نه‌مم و
ده‌ممان پڕ ده‌بوو له‌ ئاقیقی جه‌ننه‌تی ژیان
گۆرانییه‌ک
که‌ باعیسی جه‌ننه‌تی خاوبوونه‌وه‌ و
هه‌ڵدانی دواین چۆڕی شه‌رابی شه‌و بوو شه‌و
گۆرانییه‌ک
که‌ باعیسی ته‌ڕبوونی ڕۆح و ته‌ڕبوونی له‌ش بوو
گۆرانییه‌ک
که‌ باعیسی هه‌ڵکردنی بای ڕووته‌نی و بای ئاگر بوو ئاگر
ئیتر لیمۆ ،
هه‌ی لیمۆ ژن ،
بڵێ بڵێ
چۆن ده‌توانی جه‌ننه‌تی شه‌وێک له ‌یادکه‌ی
شه‌وێک لیمۆ
شه‌وێک که‌ ئاومان به‌ لیمۆی یه‌که‌وه‌ نه‌هێشت
شه‌وێک لیمۆ
شه‌وێک که‌ چڵمان به‌ سه‌ر چڵه‌وه‌ نه‌هێشت
شه‌وێک لیمۆ
شه‌وێک که‌ له ‌تاو ڕاژه‌نین
وه‌ک گوڵ له‌ به‌ر بادا ، خۆمان به‌ پێوه‌ نه ‌ده‌گرت
وه‌ک کلووی باریوی مه‌غریب ، وا سه‌ما با
له‌گۆشه‌ی جێیه‌کدا سره‌وتمان نه‌ده‌گرت
ئیدی بڵێ چۆن بتوانم ،
هه‌ی لیمۆ ژن
له‌م جه‌نگه‌ڵه‌ تاریک و بێ ئامانه‌دا
ئه‌دره‌سی خاوبوونه‌وه‌ی ئه‌و شه‌وه‌ و
شیله‌ و ته‌ڕایی سه‌ر زمانی ئه‌وشه‌وه‌ و
نووری هه‌وه‌سی ڕژاوت
له‌ یاد که‌م من
بڵێ چۆن چۆن ،چۆن بتوانم ئه‌ی لیمۆ ژن
بڵێ چۆن چۆن ؟
که‌ من نیوه‌م بووه‌ و به‌ تۆ و
که‌ تۆ نیوه‌ت بووه‌ به‌ من
بڵێ چۆن ؟؟

ئه‌ڵمانیا/ 2009

**behnam5555** · #**978** 12-04-2010

كۆڵانه‌كانى پیرى

عه‌بدولموته‌ڵیب عه‌بدوڵڵا

"پیرى ده‌ریا"

له‌به‌ر ئاوێنه‌ى پیرى ده‌ریا
باران پرچى كرده‌وه‌
ئاو به‌ له‌نجه‌یه‌ك كه‌ دڵ ده‌با
كه‌ چاو مه‌ست ده‌كا
كۆڵان كۆڵان
ده‌ستى ماسییه‌كان ده‌گرێ
له‌ ژێر تاشه‌ به‌ردێكدا ماچ به‌ ماچه‌وه‌ ده‌كه‌ن
ژیان به‌ ژیان
زه‌وى ده‌خه‌نه‌ سه‌مایه‌كى شین
ئاسمان ده‌خه‌نه‌ سه‌مایه‌كى شین
كۆڵان كۆڵان
سه‌یرى ماسییه‌كان بكه‌ و
ده‌ریا بگۆڕه‌وه‌ به‌ با
"پیرى با"
له‌به‌ر ئاوێنه‌ى پیرى با
به‌ر له‌وه‌ى دنیا بخه‌یته‌ ده‌ره‌وه‌ى خۆت
به‌ر له‌وه‌ى ته‌وقه‌ له‌گه‌ڵ شه‌و بكه‌یت
به‌ سپێده‌ى خه‌یاڵدا بڕۆ
بزه‌یه‌ك هه‌ڵده‌ به‌ تامى سه‌فه‌ر
گوڵه‌كانى ئاو له‌ ئامێز گره‌
كۆڵان كۆڵان
سه‌یرى باران كه‌و
ئه‌و ساتانه‌ یادكه‌وه‌ كه‌ "با" و "با" جێما
ئه‌و ساتانه‌ى شه‌پۆل شه‌پۆل سه‌رما ده‌یبردى
ئه‌و ساتانه‌ به‌كراسێكى سپى
شه‌ڕت به‌ هه‌تاو ده‌فرۆشت
وه‌ك ئه‌وه‌ى دڵت له‌ دڵۆپێك راست بكه‌یته‌وه‌
كۆڵان كۆڵان
سه‌یرى "با" بكه‌ و
بڵێ ژیان پێشبڕكێیه‌ كات ده‌یچنێ
یان به‌یه‌كجارى بڵێ
ئه‌گه‌ر خه‌یاڵ نه‌بێت
هه‌ڵده‌وه‌رێ مرۆڤ
سه‌یرى ئاوێنه‌كانى ژیان بكه‌ و
ته‌نیایى دڵۆپه‌ ئاوێ
كه‌ حه‌زى كه‌وتن له‌ ئاسمان شۆڕ ده‌كاته‌وه‌
كه‌ په‌یامى زه‌وى به‌ با ده‌كا
به‌ باخێك بچوێنه‌ كه‌ پڕه‌ له‌ سپێده‌
به‌ دڵێك كه‌ پڕه‌ له‌ خه‌ون
كۆڵان كۆڵان
ته‌نیایى دڵۆپه‌ ئاوێ
له‌ خه‌مى به‌فر راستكه‌وه‌.
"پیرى به‌فر"
له‌به‌ر ئاوێنه‌ى پیرى به‌فر
سپى سپى بیرم ده‌كرده‌وه‌
وه‌ك ئه‌وه‌ى ته‌مه‌نم درێژكرنه‌وه‌ى سپێده‌ بێ
وه‌ك ئه‌وه‌ى به‌فر به‌ دزییه‌وه‌
لاسایى ته‌نیایم بكاته‌وه‌
له‌ تریقه‌ى پێكه‌نیم دا
له‌ دڵى خۆم گوتم ئه‌مڕۆ زۆر نووستم
شه‌و پێنازانێ
له‌ دڵى خۆم گوتم
وه‌ك به‌فر له‌ شه‌و راست ده‌بمه‌وه‌
كۆڵان كۆڵان
خۆم به‌ با وه‌ده‌كه‌م
خۆم به‌ ژیان وه‌ده‌كه‌م
ده‌چمه‌وه‌ به‌رده‌م ئاوێنه‌كانى ده‌ریا
باران له‌ ئاو درێژ ده‌كه‌مه‌وه‌
تا قڵپه‌ى پێكه‌نین.

**behnam5555** · #**979** 12-04-2010

با شه‌رابێ له‌ ده‌ستی عیشق وه‌ربگرین

كه‌س به‌ ته‌مای چركه‌یه‌ك گه‌ڕانه‌وه‌ی ته‌مه‌ن نییه‌
كه‌س گوێ بۆ ده‌نگێ شل ناكا ....
له‌ودیو ده‌رگاكه‌وه‌ بڵێ :
بیكه‌نه‌وه‌
من زه‌مه‌نه‌ كوژراوه‌كانی ئێوه‌م ،زیندوو بوومه‌ته‌وه‌
ئێواره‌ بێ مه‌یله‌كانتانم ،
هاتوومه‌وه‌ جارێكی تر.....
خۆم له‌ ئه‌ستێلكی ڕه‌نگه‌كان وه‌رده‌م
بیكه‌نه‌وه‌ ،من ئه‌و بارانه‌م
كه‌ نه‌تانوێرا له‌به‌ریا به‌ ڕووتیی باوه‌ش بكه‌ن به‌ یه‌كترا
ئه‌و نامه‌یه‌م پڕكێشیی ئه‌وه‌تان نه‌كرد
به‌ ده‌نگی به‌رز بیخوێننه‌وه‌
بیكه‌نه‌وه‌ ، جارێكی تر ئه‌توانن ئه‌و گۆرانییانه‌ بشنه‌ون
كه‌ جاران حه‌وسه‌ڵه‌ی ئه‌وه‌تان نه‌بوو
له‌به‌ر گریان به‌ دیاریانه‌وه‌ دانیشن
ئه‌و شه‌رابه‌م ، كه‌ نه‌تانتوانی
له‌گه‌ڵ یاره‌كانتانا نۆشی كه‌ن ،
بیكه‌نه‌وه‌ ،
ئه‌فسوونێكم پێیه‌ ئه‌تانباته‌وه‌
سه‌ر مافووره‌كانی هه‌رزه‌یی
شادتان ئه‌كاته‌وه‌ به‌خه‌ت وخاڵی
په‌روانه‌كانی مناڵیی ؛
كه‌س ده‌رگا له‌و ده‌نگه‌ ناكاته‌وه‌
كه‌س متمانه‌ی پێ ناكات و
په‌رده‌ی په‌نجه‌ره‌كه‌ی لانادا بزانێ كێیه‌ ، من نه‌بێ ؛
پێ بزانم یان نا
ده‌ستی گرتووم و به‌ سه‌رتاپای وجودا ئه‌مگێڕێ
خۆی پێم ئه‌ڵێ
من شه‌رابه‌ سووره‌ كه‌ونه‌كه‌ی عیشقم
پێكێكم لێ فڕ كه‌ن ، پێكێ ،
با سه‌رزه‌مین ،
كاژی گوناهه‌كانی داماڵێ ،
وشك بێته‌وه‌ له‌ سێلآوی " ڕیا " و
ته‌به‌ڕڕا بێ له‌ تاوان .....
" تا حه‌شری نه‌بێ له‌گه‌ڵ حه‌شری " ؛
ئه‌ی عیشق منی پیره‌دار
وه‌ك شێتێكی ڕۆح سووك به‌ ئه‌قڵی خامه‌وه‌
خۆم ئه‌خه‌مه‌وه‌ به‌ختی تۆ ،
بۆ كوێم ئه‌به‌ی ،
له‌ كوێ له‌به‌ر ده‌م ده‌روازه‌یه‌كدا توڕم ئه‌ده‌ی
مه‌یلی خۆته‌ ،
دڵنیام جارێكی تر
ناپاكییم له‌گه‌ڵ ناكه‌یت و
نامدایته‌وه‌ ده‌ست چه‌ته‌كانی مردن
**********
من ده‌رگات لێ ئه‌كه‌مه‌وه‌
سه‌ركه‌وه‌ بۆ كۆلێته‌ شێداره‌كانی ده‌روونم
دامگیرسێنه‌ ، با سوره‌ته‌كان
به‌ ڕه‌نگی پرچی ئایشه‌و فاتمه‌ ببینم
وه‌ك چراوگ ڕۆشنم كه‌ ،
من به‌ردی ئه‌و قه‌ده‌ره‌م به‌ كۆڵه‌وه‌یه‌
كه‌ ئه‌بێ عیشق زیندووم كاته‌وه‌
بچۆره‌ ناوچه‌ حه‌رامه‌كانی گیانمه‌وه‌
كه‌سێ لێت ناپرسێته‌وه‌ ، تۆ كوێنده‌رییت
كه‌سێ ڕوت لێ گرژ ناكاو
لێوت لێ هه‌ڵناقوورچێنێ
من خۆم ده‌مێكه‌ ئه‌زانم له‌ مردنما
نه‌ خاك له‌ خۆیم ئه‌گرێت و
نه‌ ده‌ریا پێشوازییم ئه‌كا و
نه‌ ئاسمانیش لایه‌كم لێ ئه‌كاته‌وه‌
چونكه‌ من كوڕی هیچیان نیم ؛
تۆ شك نه‌به‌م ، ناوێرم بمرم ، ئه‌ی عیشق
تۆ نه‌بیت ، لاشه‌م سه‌گ ئه‌یخوا ، ئه‌ی عیشق
تۆم لێ دیار نه‌بیت ، ئه‌وه‌نده‌ به‌ غیره‌ت نیم
چاو له‌ مردن زیت كه‌مه‌وه‌ ، ئه‌ی عیشق
تۆ مۆمێكم پێ نه‌به‌خشیت
زاتی نووسینه‌وه‌ی قه‌سیده‌یه‌كی تازه‌م نییه‌ ، ئه‌ی عیشق ؛
من كوڕه‌ بچكۆله‌كه‌تم
بیرت نایه‌ ده‌ستت به‌سه‌ردا هێنام و
وتت ئه‌م كوڕه‌ سه‌ر خڕه‌م ...
له‌وانی تر خۆشتر ئه‌وێ
چونكه‌ لێ ناگه‌ڕێ یاره‌كه‌ی......
بیپه‌رژێته‌ سه‌ر بیركردنه‌وه‌
له‌زه‌مه‌نه‌كانی هه‌ڵنووتان و
به‌ ماچێ ئه‌یهێنێته‌وه‌ ژێر كه‌پری شكۆفه‌كان !
دێته‌وه‌ یادت پێت وتم
كوڕم ، من ده‌ستی موباره‌كی خۆمت به‌سه‌ردا دێنم
له‌ هه‌ر كوێ هه‌ڵوه‌ریین .....
گه‌مارۆی هێرۆ سپییه‌كانی ڕۆحیان دایت
ناوم بێنه‌ ، ئه‌گه‌مه‌ لات !
هه‌ر كات له‌ دوو ڕیانێكا
قیبله‌ نومایه‌كت چنگ نه‌كه‌وت
به‌ تیله‌ی چاوێ سه‌یرم كه‌
له‌ گیرفانی كراسه‌كه‌تا ئه‌مبینیت ؛
ئه‌ی عیشق من فرزه‌ندی تۆم
له‌ لاسارییم زویر مه‌به‌
شێتییه‌ك داگیری كردووم ،
ببینه‌ دواجار چۆن
وه‌ك سه‌ربازێكی هه‌ڵهاتوو
به‌په‌شیمانیی گه‌ڕامه‌وه‌ ئاستانه‌كه‌ت ،
ته‌ماشاكه‌ ملم چه‌ند له‌ موو باریكتره‌
گه‌ردن ئازادیی پێ ناوێ
ئه‌زانم ته‌ورت له‌ گوڵ و
تفه‌نگت له‌ گزنگ و
گولله‌شت له‌تیشكی زه‌رده‌په‌ڕه‌ ،
بنۆڕه‌ شه‌رمنییم ئه‌ی عیشق
به‌ كاڵفامیی خۆم له‌گه‌ڵ كه‌
جێم بكه‌وه‌ ،
له‌ دۆزه‌خی ئه‌م وه‌حشه‌ته‌دا....
نه‌ با ئه‌مجاره‌ به‌ڕاستیی ڕه‌ق ببمه‌وه‌ !!!!
به‌رزان هه‌ستیار