مردوو...

[behnam5555]

مردوو

پێکه‌نی و ده‌سگیره‌ی ده‌رگاکه‌ی بادا . کوتی :
- ره‌نگه‌ دواهه‌مین شێوم بێت لێره‌. تارا چاوی بڕییه‌ په‌ناملی، به‌ سڵه‌وه‌ مستێکی سره‌وانده‌ نێو شانی.کوتی:
- بۆ وا ده‌ڵێی؟ ده‌مترسێنی(چاوه‌کانی گرژاند، گرینجه‌کانی سه‌رلووتی ده‌ری ده‌خست ته‌مه‌نی...).
له‌ تای ده‌رگاکه‌دا ره‌پ راوه‌ستا. وه‌کوو په‌یکه‌رێک. به‌ سه‌ر ئه‌وه‌دا تا ئه‌و کاته‌ قه‌ت بیری له‌ په‌یکه‌رێکی حه‌په‌ساو نه‌کردبۆوه‌، جیا له‌وه‌ی که‌ قه‌ت نه‌یدیبوو، هه‌ستی ده‌کرد ترسێکی هاوڕێ له‌ گه‌ڵ رێزدا، سه‌باره‌ت به‌و په‌یکه‌ره‌ له‌ خه‌یاڵ یان مێشکی یان...گێژ ده‌خوات. هه‌ڵگه‌ڕاوه‌و، ده‌ستی تارای گرت.کێشایه‌ ژێر تاقی ده‌رگاکه‌. ده‌رگاکه‌ی پێوه‌دا. تارای لکاند به‌ سینگییه‌وه‌ با ده‌سگیره‌ی ده‌رگاکه‌ له‌ سمته‌ خڕه‌کانی گیر نه‌کات .گوتی:
- ئه‌م وڵاته‌ له‌شی ساغی تێدا نه‌ماوه‌. ئه‌رکی من ده‌رکێشانی ئه‌و چڵکانه‌یه‌، بۆیه‌ دایم ده‌گه‌ڕم.
- هه‌ستم کرد ده‌مترسێنی، هه‌رچه‌ند دڵنیام له‌وه‌ ده‌مترسێنی له‌و هه‌موو تیمارگه‌رییه‌ت. (خۆی له‌ باوه‌شی هه‌ڵخلیسکاند و له‌ سه‌ر لێواری تاقی که‌وشکه‌نه‌که‌ دانیشت).
- کاری من ئه‌وه‌یه‌.(سه‌ری هه‌ڵهێنا، لێوی لسته‌وه‌، کوتی چاوت ئه‌ڵێی چاوه‌ کۆتره.
- چاوه‌ کۆترت دیوه‌؟ چۆنه‌؟(به‌ پێکانی جۆلانه‌ی ده‌کرد، ده‌یڕوانییه‌ ئاریا، وا به‌ خه‌مێکی زۆره‌وه‌ خه‌ریکی کردنه‌وه‌ی به‌نی که‌وشه‌کانی بوو و هه‌ناسه‌کانی سوار ببوون ونرکه‌ی ده‌هات). - نا، کۆترم دیوه‌ به‌ڵام چاوی نا(له‌ سه‌ر جله‌کانییه‌وه‌ سه‌ر چۆکی ماچ کرد و که‌وشه‌کانی ئه‌ویشی له‌ پێی داکه‌ند)، له‌ به‌ر ئه‌وه‌ چاوی به‌ستبوو، ره‌نگه‌ نه‌شیبه‌ستبێت من وام بینیبێ.

- سه‌یره‌ ،قه‌ت نه‌مبیستووه‌. نه‌تده‌توانی چاوی بکه‌یته‌وه‌، بزانی چ ره‌نگێکه‌؟(له‌ سه‌ر لێواری تاقه‌که‌ هه‌ستا).
- نا،کاتێک ده‌گه‌شتینه‌ سه‌ریان،گیانیان تێدا نه‌مابوو(سه‌ری تارای توند گرت و نێو چاوی رامووسی ).
- چۆن ده‌تکوشتن؟(سه‌ر لێوی وشک هه‌ڵاتبوو، وه‌کوو ئه‌وه‌ جنۆکه‌ی دیتبێت، چاوی مۆله‌ق وه‌ستابوو).
- ده‌توانی به‌ جێگه‌ی ئه‌و قسانه‌ ماچم بکه‌ی شه‌رابه‌که‌م؟ (گلێنه‌ی چاوه‌کانی ده‌دره‌وشانه‌وه‌ ).
- باش، به‌و مه‌رجه‌ ئه‌مڕۆ بۆ هیچ شوێنێک نه‌ڕۆیت.(نێو چاوه‌کانی ئاره‌قه‌ی ده‌ردابوو، خۆی ده‌یزانی بۆ؟).
له‌ سه‌ر مۆبله‌ دارینه‌ دووکه‌سییه‌که‌ دانیشت. پێکانی هێنا سه‌ر مۆبله‌که‌ و خستییه‌ ژێر له‌شی و چوارمه‌شقی دانیشت با ته‌زه‌که‌ی بڕوات. به‌فر راوه‌ستانی نه‌بوو. به‌ سه‌ر ئه‌وه‌شدا کۆته‌که‌ی دانه‌که‌ند. چاوی له‌ ئاریا بوو، بێوه‌ستان دیواودیوی ده‌کرد، وه‌کوو پاندۆڵێکی شکاو. ته‌له‌فوونه‌که‌ زریکه‌ی لێ هه‌ستا. ده‌یزانی کێیه‌؛ بۆیه‌ش هه‌ڵینه‌گرته‌وه‌. ئاریا به‌ په‌له‌ له‌ ژووره‌که‌ی خۆی هاته‌ ده‌رێ. ویستی بیستۆکه‌که‌ هه‌ڵبگرێت. تارا گوتی:
- به‌ڵێنه‌که‌ت له‌ بیر نه‌چێته‌وه‌.(چاوی وه‌کوو دوو گۆمی پڕ ترسابوون).
- (هه‌ڵینه‌گرت، قۆڵی عه‌باکه‌ی به‌ری هه‌ڵکرد )قه‌ت "نه‌"م نه‌کوتووه‌، چاکتره‌ هه‌ڵینه‌گرم. (ته‌لی ته‌له‌فوونه‌که‌ی کێشاوه‌ ) ده‌ترسم بڵێم باش. (به‌ ده‌م قوڵپه‌ی گریانه‌وه‌ له‌ به‌رپێی تارادا دانیشت).
سه‌ری له‌ باوه‌ش تارا هه‌ڵگرت. روانییه‌ په‌یکه‌ری سه‌ر ته‌پڵه‌که‌ شووشه‌ییه‌که‌ی سووچی دیواره‌که‌. ده‌دره‌وشایه‌وه‌. ده‌تگوت پێده‌که‌نێ. تازه‌ تێگه‌یشت ئه‌و په‌یکه‌ری دیوه‌. ته‌نانه‌ت پاریش بوو ئه‌و په‌یکه‌ره‌یان به‌ خه‌ڵات پێدابوو، له‌ سه‌ر ئه‌وه‌ له‌ کاره‌که‌یدا زۆر جدییه‌. پاشان که‌ داوایان لێکردبوو، چه‌ند ده‌قه‌، به‌ رێزه‌وه‌ قسه‌ بکات،کوتبووی:
-" له‌م وڵاته‌دا له‌شی ساغ نه‌ماوه‌، بێگومان توانای ده‌رکێشانی ئه‌و چڵکانه‌ زۆر دژواره‌، من ئیدی توانام نه‌ماوه‌ ..."
حه‌وتوویه‌ک پاش ئه‌و رووداوه‌، به‌ خه‌رجی ناوه‌نده‌که‌ی، نێردرابووه‌ لای دوکتورێکی ده‌روونشیکار. نه‌یده‌زانی بۆ؟ رووی له‌ په‌یکه‌ره‌که‌ هه‌ڵگرت. سه‌ری نایه‌ سه‌ر کڵۆی چۆکی تارا.
زه‌ڕه‌ی که‌رێک له‌ ده‌ره‌وه‌ هات و خه‌وه‌که‌ی ئه‌وی زڕاند. تارا وای پێ کوتبوو. کاتێک چاوه‌ تووتکییه‌کانی کرده‌وه‌، هێشتا به‌فر ده‌باری. تارا به‌ جله‌که‌ی به‌ری پێده‌که‌نی. پێی خستبووه‌ سه‌ر لێواری هه‌وه‌ڵین ریزی قه‌فه‌زی کتێبه‌کان و خۆی به‌ سه‌ر فه‌رشه‌که‌دا خاو کردبۆوه‌ و کتێبێکی په‌ڕه‌ لێده‌دا. به‌ پشته‌ده‌ستی چاوی سڕییه‌وه‌، به‌ڵکوو به‌فر نه‌بارێ. دیار بوو هیچ واقیعێک به‌ گۆڕانی ئه‌و، ناگۆڕێ. قامکه‌ که‌ڵه‌ی تارای ده‌دی، له‌ لای راستی لێوییه‌وه‌، تا سه‌ر هه‌وه‌ڵین گرینجی ده‌چێته‌ نێو ده‌مییه‌وه‌ و دێته‌ ده‌رێ. ترسا. عه‌با بێ قۆڵه‌که‌ی پێچایه‌ ده‌وری خۆی. سه‌رمای بوو. هه‌ستایه‌ سه‌رپێ. ده‌یویست جله‌کانی بگۆڕێ. هه‌وا له‌ په‌ستا سارد ده‌بوو. ده‌رگای ژووره‌که‌ی له‌ خۆی پێوه‌دا. قرچه‌ی پێکدادانی ده‌رگاکه‌ تارای راچڵه‌کاند. سه‌ری وه‌رگه‌ڕاند. له‌ کۆترێکی مل شکاو ده‌چوو. ترس نه‌یهێشتبوو قامکی له‌ ده‌می ده‌رهێنێ. سه‌ری نایه‌وه‌ سه‌ر فه‌رشه‌که‌. وشه‌کان وه‌کوو چرپه‌ی گه‌ڵا ده‌ڕۆشتن و نه‌ده‌گه‌ڕانه‌وه‌. له‌ به‌ر ئه‌وه‌ ته‌نیا چرپه‌ بوون.
چاوی هێنا به‌ سه‌ر تووکی سوور و بێڕه‌نگی له‌شیدا. تارا دایم پێی ده‌کوت تووکی تۆ هیچ ره‌نگێکی نییه‌. خۆشی نه‌یده‌زانی بۆ واده‌ڵێ؟ قه‌ت نه‌یتوانی گاڵته‌ یان راست بوونی ئه‌و قسانه‌ی تارا ده‌ربخات. له‌ نێو درزی ملیوانی فشو فۆڵی عه‌باکه‌وه‌ چاوی که‌وت به‌ وێنه‌ی هه‌ڵواسراوی گوێره‌که‌ "سێ پا" که‌. یه‌کێک له‌ پێکانی دواوه‌ی له‌ بندا قرپ ببوو. ئه‌و رۆژه‌ له‌ هه‌موو رۆژه‌کان زووتر له‌ هه‌موویان هاتبووه‌ نێو مه‌زرێنگه‌که‌. کاتێک ده‌رگای ژووره‌که‌ی خۆی کردبووه‌وه‌ ، له‌و هه‌موو زووهاتنه‌ی سه‌ری سوورمابوو. پێکه‌نیبوو. رادوێی پاڵده‌ستی هه‌ڵکردبوو و قرچه‌ی لێ هه‌ستاندبوو. پێی خۆش بوو گوێ بگرێت له‌ هه‌واڵی به‌یانییانی رادوێ. بۆڕه‌یه‌کی له‌ ژووری ئاژه‌ڵه‌کانه‌وه‌ بیستبوو. دیار بوو که‌سێک، ئاژه‌ڵێکی نه‌خۆشی هێناوه‌ته‌ ژوورێ. حه‌په‌سابوو.....
گوێره‌که‌که‌ وه‌کوو ئه‌وه‌ی سوپاسی بکات له‌ وێنه‌که‌دا شکابۆوه‌. ئه‌مه‌ دووهه‌مین ساڵه‌ ئه‌و وێنه‌ی وه‌کوو بڕوانامه‌یه‌کی حاشا هه‌ڵنه‌گر داکوتابوو. تارا گوتبووی: له‌ مرۆڤ سیابه‌خت تر ئه‌وه‌. پاشان قامکه‌ دۆشاومژه‌که‌ی نابووه‌ ده‌می و به‌ چاوه‌ مه‌ڕییه‌کانی سه‌یری گوڵی قاڵییه‌که‌ی کردبوو.
بیری چووبوو بۆ لای چرچی کتێبه‌ کۆنه‌کانی باوکی. زۆر جار داده‌نیشت و گه‌ڵای کتێبه‌کانی لێده‌دا. بۆنێکی تووتنیو شیرینیان لێ هه‌ڵده‌ستا. له‌ منداڵییه‌که‌ی ته‌نیا ئه‌و بۆنه‌ی له‌ بیر ماوه‌، هه‌ڵبه‌ت خۆی پێی خۆش بوو هه‌ر ئه‌وه‌ی له‌ بیر بمێنێ. رۆژێک که‌ خه‌ریکی بۆن کردنی گه‌ڵاکان بوو، شتێکی دۆزیبۆوه‌. سێدییه‌کی کۆن و رووشاو بوو. هه‌وه‌ڵ زۆر گرینگی پێنه‌دابوو. وایده‌زانی یه‌کێکه‌ له‌و سێدییه‌ چه‌ن پاته‌کراوانه‌ی مه‌ولوونامه‌خۆنی باوکی. باوکی هه‌موو شه‌وێ یه‌کێکیانی وه‌سه‌ر ده‌خست و هه‌مووی به‌ ریزه‌وه‌ داده‌نا و ناچاری ده‌کردن چاوی لێبکه‌ن . خۆشی له‌ به‌رلووتی ته‌له‌ڤزیۆنه‌که‌دا داده‌نیشت و "ئه ڵڵا ئه‌ڵڵا"ی ده‌گوت. جارێکیان میزی کردبوو به‌ خۆیدا. ئیدی باوکی نه‌یده‌هێشت ئه‌و چاوی لێبکات. له‌ ژووره‌که‌ی خۆی ده‌مایه‌وه‌. له‌ ترساندا خۆی ده‌خزانه‌ ژێر پێخه‌وه‌کان و هه‌ڵده‌میزی به‌ هه‌موو شته‌کاندا. پاش ماوه‌یه‌ک پێیان زانی .... هه‌موو رۆژێک کاتێک باوکی له‌ سه‌ر دووکان بوو، ده‌رگاکه‌ی چه‌فت ده‌خست و چاوی ده‌کرد له‌ سێدییه‌که‌. هه‌وه‌ڵ جار ترسابوو. ئه‌و شه‌وه‌ خه‌وی لێنه‌که‌وتبوو. تووشی تێکچوونێکی سه‌یر بوو. پاش ئه‌وه‌ی دایکی له‌ رووداوێکی سه‌یردا ون بوو، به‌ گشتی تێڕمابوو.
دوای ئه‌وه‌ مانگاکه‌ به‌ ساغی لێ بۆوه‌ و به‌ هانکه‌ هانک هه‌ستایه‌ سه‌ر پێ، ئه‌و زیاتر ده‌چه‌قییه‌ نێو خۆڵی گه‌وڕه‌که‌. ده‌تگوت قورسی مانگاکه‌ خۆی ده‌داته‌ سه‌ر ئه‌و. په‌له‌کوتێی گوێلکه‌که‌ وه‌ خۆی هێنایه‌وه‌. ده‌ستی به‌ لێواری ئاخوڕه‌که‌وه‌ گرت و خۆی راست کرده‌وه‌. قوونی نایه‌ سه‌ر لێواری دارینی ئاخوڕه‌که‌و دایه‌ پڕمه‌ی گریان. له‌ به‌ر خۆوه‌ ده‌یگوت: "بزنه‌ چاره‌ره‌شه‌که‌ی عه‌زازیل تۆی". ئه‌و رۆژه‌ زۆر به‌خه‌مه‌وه‌ بوو. وه‌کوو چاره‌نووسێکی دیاریکراو ده‌یڕوانییه‌ رووداوه‌کانی ئه‌و به‌یانییه‌ زووه‌. له‌ به‌رخۆوه‌ ده‌یگوت:" کێیه‌ تاوانی ئێمه‌ی بۆ بدرێته‌وه؟‌" . بیری ده‌کرده‌وه‌ له‌ پێکه‌نینه‌کانی تارا، ددانی ده‌کڕانه‌ یه‌کتر. له‌و پێکه‌نینانه‌ی ئه‌و تێنه‌ده‌گه‌یشت. رق له‌ کونه‌ لووتییه‌وه‌ وه‌کوو توونیی بیبار ده‌هاته‌ ده‌رێ. سه‌ری داده‌خست و خۆی ده‌کرد به‌ ته‌واوی ژووره‌کاندا. هێند ده‌هات و ده‌چوو تا هه‌موو شتێکی له‌ بیر ده‌چوو.
له‌ جه‌ژنی ساڵانه‌ی "دوکتوره‌ ماڵاتییه‌کانی شار" دا خه‌ڵاتێکی تایبه‌تی پێدرا، له‌ به‌ر ئه‌وه‌ توانی حه‌وتوویه‌ک "گولوو" زیندوو رابگرێ. ئه‌و ته‌نها گوتبووی:"پیسی زۆر بووه‌، من ده‌ره‌قه‌تی نایه‌م، تاوانه‌..."
ئیزنیان نه‌دابوو له‌وه‌ زیاتر بڵێ. به‌ رێزێکی تایبه‌ته‌وه‌ هێنایانه‌ خوارێ و له‌ پاڵ ژنه‌که‌یه‌وه‌ دایان نا. تارا ده‌ستی گرتبوو، به‌ڵام له‌و وشانه‌ی‌ زۆر ترسابوو.
پاش ئه‌و رووداوه‌ وێنه‌ی "گولوو" بووه‌ مێوانی ماڵیان.
ته‌نیا شتێک له‌ دایکی دۆزرایه‌وه‌، تایه‌ک له‌ پێڵاوه‌ کانی بوو. چه‌رمێکی قاوه‌یی ونه‌رمی بوو. که‌س نازانێ بۆ ئه‌و رۆژه‌ ئه‌و پێڵاوانه‌ی له‌ پێ کردبوو؟ ئه‌ویش له‌و قوڕ وشڵپاوه‌دا. دڵی خه‌ڵک به‌و لایه‌نه‌ شاراوانه‌ی قسه‌کان، زۆر خۆش ده‌بوو. و خۆش بوو. هه‌موو باسی ئه‌وه‌یان ده‌کرد شۆڕه‌ی دایکی قه‌ت ئه‌و پێڵاوانه‌ی له‌ پێ نه‌کردووه‌. ته‌نیا رۆژی بووکێنییه‌که‌ی له‌ پێی کردووه‌. ئه‌و رۆژه‌ یه‌کێک له‌ ناڵه‌کانی شکابوو، خه‌سووی ده‌یگوت نامانه‌وێ، شه‌له‌ ... دایمه‌ به‌و رۆژه‌ پێده‌که‌نی.
دوای ونبوونی دایکی، ئه‌و تاکه‌ که‌وشه‌ی له‌ لای خۆی هه‌ڵگرت. نازه‌کانی دایکی وه‌بیر ده‌هاته‌وه‌. له‌ لێڵایی سووچه‌کانی خه‌یاڵیدا تێکه‌ڵی شنه‌ی دارێک ده‌بوو که‌ سه‌رانسه‌ر چرۆ بوو و به‌ وزه‌ی نه‌رمی با ده‌شه‌نایه‌وه‌. دایکی ببوه‌ تاکه‌وشێک و خۆی خزاندبووه‌ نێو ژیانی ئه‌و. کاتێک ئاریا خه‌ریکی گیریان بوو له‌ ژووره‌که‌ی خۆی، ئه‌و له‌ گه‌ڵ دایکی پێده‌که‌نی. له‌ سه‌ر ئه‌وه‌ شه‌ڕێکی گه‌وره‌یان پێکه‌وه‌ کرد و ئاریا پێی گوت: "تۆ کافری". تارا پێکه‌نیبوو. ئه‌ویش رووی کردبووه‌ په‌نجه‌ره‌ی ژووره‌که‌یوگریابوو.
وشه‌کان وه‌کوو چرپه‌ی گه‌ڵا ده‌ڕۆشتن و نه‌ده‌گه‌ڕانه‌وه‌. له‌ به‌ر ئه‌وه‌ ته‌نیا چرپه‌ بوون. بۆنی گه‌ڵای کتێبه‌که‌ی کرد. تۆزه‌که‌ی مه‌ستی کرده‌وه‌. سه‌گێک له‌ نێو بێده‌نگی به‌فری ده‌ره‌وه‌ ده‌یقورووسکاند. کتێبه‌که‌ی لاخست. زوو هه‌ستایه‌ سه‌رپێ.له‌ سه‌رمای داڵانه‌که‌دا ئاره‌قه‌ی ده‌ردابوو. ته‌وسابوو. چه‌قۆکه‌ی له‌ نێو کاڵانه‌که‌ی ده‌رێنا. ده‌ستی هێنا به‌ سه‌ر ئاسنه‌که‌یدا. سارد بوو. ترسی که‌م ببۆوه‌. جووته‌ پێڵاوه‌که‌ی دایکی گرتبوو به‌ ده‌ستی راستییه‌وه‌. چه‌قۆکه‌ی له‌ نێو تای راستیدا شارده‌وه‌. رۆشته‌ پشت ده‌رگاکه‌ی. نووکه‌یه‌ک وه‌کوو گیریان ده‌هات به‌ڵام له‌ بێده‌نگی ژووره‌که‌دا نوقم ده‌بوو. له‌ کێلوونی ده‌رگاکه‌ سه‌یری ژوره‌که‌ی کرد. ئاریا ده‌ستی وه‌کوو خاچێک کردبۆوه‌. له‌شه‌ پانه‌که‌ی وه‌کوو داره‌بییه‌کی کۆن ده‌له‌رایه‌وه‌. سپییه‌تی به‌فر له‌ په‌نجه‌ره‌که‌وه‌ خۆی ده‌دا به‌ نێوه‌ڕاستی ژوره‌که‌دا. تیشکی به‌فره‌که‌ ژووره‌که‌ی لێڵ کردبوو. سێبه‌رێک له‌ ژووره‌که‌دا ده‌جوولایه‌وه‌.
بێده‌نگ بوو. لێوی گه‌ست. چه‌قۆکه‌ی له‌ نێو ده‌ستیدا تاوتوێ کرد. چه‌قۆکه‌ش تین زابووه‌ ده‌سکه‌که‌ی. خستییه‌وه‌ نێو تاکه‌ راستی که‌وشه‌که‌ی دایکی. ده‌ستی نا له‌ ده‌رگاکه‌وه‌. لێوی ده‌رگاکه‌ شه‌قڵی برد. تیشکی به‌فری ده‌ره‌وه‌ی ژووره‌که‌ نه‌یده‌هێشت هیچ ببینێ. وه‌کوو ته‌ڵه‌زمه‌ شووشه‌ ده‌چوو به‌ گلێنه‌یدا.که‌وته‌وه‌ یادی سێدییه‌که‌ی باوکی. هێدی، بێ ئه‌وه‌ی بشڵه‌ژێی، زۆر به‌ ناسکی، چه‌قۆکه‌ ببه‌ ژێر گه‌رووی، ئه‌و لووله‌ بته‌قێنی ته‌واوه‌. ئه‌ویش زه‌جرێکی زۆر ناکێشێ. هه‌نگاوێک له‌ نێو سپیایی ژوره‌که‌دا ده‌چێته‌ پێش. هه‌ناسه‌کانی، کونی گوێچکه‌کانی ئاخنیوه‌. هیچ ده‌نگێک نابیسێ. بێجگه‌ له‌ ده‌نگی دایکی. له‌ نێو مێشکی ئه‌ودا وه‌کوو ئه‌شکه‌وت ده‌نگ ده‌داته‌وه‌. بیر له‌وه‌ ده‌کاته‌وه‌ چۆن قژه‌ کۆته‌ره‌که‌ی باداوه‌و چه‌قۆکه‌ی ناوه‌ته‌ سه‌ر ملی. قرخه‌ی دایکی ده‌بیستێ و لیکه‌کانی... . ئیدی بۆی گرینگ نییه‌ مردووه‌، به‌ڵکوو له‌و تێکشکانه‌ی ده‌ترسێ. خوێن له‌ قووڵکه‌ی ملیه‌وه‌ ده‌ڕژێته‌ نێو سینگ و به‌رۆکی. ده‌ڵێ: " تارا بپارێزه‌". چه‌قۆکه‌ له‌ نێو تاکه‌وشه‌که‌ی دایکی ده‌ردێنێ. هیچ ده‌نگێک نابیستێ. هه‌نگاوێکی تر ده‌چێته‌ پێشه‌وه‌. "گولوو" وه‌کوو دایکی ته‌ماشای ده‌کات. ده‌ڵێی دایکیه‌تی. خۆی نوقمی رووناکییه‌که‌ ده‌کات. ده‌ستی خۆی له‌ سپییایه‌تی نێو ژووره‌که‌دا نوقم ده‌کات. خرمه‌یه‌کی خۆش له‌ ژێر مه‌ڵاشویدا هه‌ست پێده‌کات. ده‌ستی له‌ نێو سپییایه‌تییه‌که‌ دێنێته‌ ده‌رێ. سوورییه‌که‌ی دایده‌چڵه‌کێنێ. وه‌ئاگا ده‌بێته‌وه‌. چه‌قۆکه‌ی فڕێ ده‌دا. ئاریا له‌ نێوه‌ڕاستی ژووره‌که‌دا درێژ بۆته‌وه‌. خوێن رژاوه‌ته‌ نێو تووکی ژێر ملی. بیلبیله‌ی چاوه‌کانی سپی ببوونه‌‌وه‌. له‌ به‌رخۆوه‌ ده‌قرخێنێ:"ده‌مزانی دواهه‌مین شێومه‌". قسه‌و خوێن وه‌کوو ره‌سته‌یه‌ک له‌ مێژوو تێکه‌ڵی یه‌کتر بوون. " کوشتم به‌ڵام ..." . نه‌یتوانی ره‌سته‌که‌ی ته‌واو بکات. له‌ لرفه‌ که‌وتبوو. مه‌رگ و ژیان سنووره‌کانیان که‌ پاڵ یه‌کتردایه‌. وه‌کوو په‌ڕی لووت. شتێکی ساردی له‌ شوێنی پشتێنده‌که‌ی هه‌ست پێده‌کرد. هه‌ستی کرد کزه‌یه‌ک له‌ ژێر مه‌مکه‌کانییه‌وه‌ ده‌هات. پێستی مه‌مکه‌کانی تینێکیان هه‌ست کرد. تینێکی لینج و خاو وه‌کوو تینی میزی نێو جێگه‌. "ئه‌و هه‌ر پێده‌که‌نی". گوێچکه‌کانی ‌زرینگانه‌وه‌. هه‌ستی کرد که‌سێک له دواوه‌یه‌تی. ئاوڕی دایه‌وه‌. ده‌سته‌ قه‌په‌کانی باوکی له‌ سه‌رشانی چه‌قیبوون. " ژیان پیس بووه‌". ئه‌و ره‌ستانه‌ی به‌ ده‌م هانکه‌ هانکه‌وه‌ ده‌گوته‌وه‌. چه‌ن جار. چاوه‌کانی پێکدا نا و خه‌یاڵێکی سست به‌ مێشکیدا ده‌هات. مێشکی له‌ په‌ستا سستر ده‌بوو. "ئه‌وه‌ خه‌ریکه‌ باوکی ده‌کوژێ". له‌ خه‌یاڵدا وه‌کوو شێرێکی مێو خه‌ریکی قه‌ڵخ کردنی گۆشتی باوکییه‌تی. خه‌یاڵ پانکرنه‌وه‌ی واقیعه‌. نووزه‌ی سه‌گه‌که‌ له‌ په‌ستا له‌ گه‌ڵ خۆردا ون ده‌بوو و داده‌چوو.
په‌یکه‌رێکی پانو پڕ له‌ نێوه‌ڕاستی ژووره‌که‌دا وه‌ستابوو و له‌ لێڵایی ژووره‌که‌دا رووی کردبووه‌ په‌نجه‌ره‌که‌ و ده‌ستی هه‌ڵهێنابوو. گڵۆپه‌کانی هه‌ڵنه‌کردبوو. خۆی له‌ گڵۆپه‌کان رووناکتربوو. تیشکی قه‌مه‌که‌ی ده‌که‌وته‌ به‌ر خۆره‌ کزه‌که‌و ده‌یدا به‌ نێوه‌ڕاستی گلێنه‌دا. پڕمه‌ی گیریان ده‌هات.

م : دوورگه